Deddf Addysg (Cymru) 2014

(cyflwynwyd gan adran 2(2))

ATODLEN 1 LL+C CYNGOR Y GWEITHLU ADDYSG

Statws LL+C

1 (1) O ran y Cyngor,—

(a) nid yw’n was nac yn asiant i’r Goron, a

(b) nid oes ganddo statws, imiwnedd na braint sydd gan y Goron.

(2) Nid yw eiddo’r Cyngor yn eiddo i’r Goron nac yn eiddo a ddelir ar ei rhan.

Gwybodaeth Cychwyn

I1 Atod. 1 para. 1 ddim mewn grym ar y Cydsyniad Brenhinol, gweler a. 50

I2 Atod. 1 para. 1 mewn grym ar 1.4.2015 gan O.S. 2015/29, ergl. 3(u)

Pwerau LL+C

2 (1) Caiff y Cyngor wneud unrhyw beth a fwriedir i hwyluso cyflawni unrhyw un neu ragor o’i swyddogaethau, neu sy’n gysylltiedig â hynny neu’n ffafriol i hynny.

(2) Yn benodol, caiff y Cyngor—

(a) caffael a gwaredu tir neu eiddo arall;

(b) ymrwymo i gontractau;

(c) buddsoddi symiau nad oes eu hangen ar unwaith at ddiben cyflawni ei swyddogaethau;

(d) derbyn rhoddion o arian, tir neu eiddo arall;

(e) ffurfio cyrff corfforaethol neu gysylltiedig neu gyrff eraill nad ydynt yn gyrff corfforaethol;

(f) ymrwymo i fentrau ar y cyd â phersonau eraill;

(g) tanysgrifio am gyfranddaliadau a stoc;

(h) cael benthyg arian.

Gwybodaeth Cychwyn

I3 Atod. 1 para. 2 ddim mewn grym ar y Cydsyniad Brenhinol, gweler a. 50

I4 Atod. 1 para. 2 mewn grym ar 1.4.2015 gan O.S. 2015/29, ergl. 3(u)

Aelodaeth LL+C

3 (1) Mae’r Cyngor i gael 14 o aelodau.

(2) Ond caiff Gweinidogion Cymru ddiwygio’r paragraff hwn drwy orchymyn i bennu bod y Cyngor i gael—

(a) nifer gwahanol o aelodau, neu

(b) isafswm ac uchafswm penodedig o aelodau.

(3) Gweinidogion Cymru sydd i benodi aelodau.

(4) Wrth i Weinidogion Cymru gyflawni unrhyw swyddogaeth mewn perthynas ag aelodaeth y Cyngor, rhaid iddynt—

(a) rhoi sylw i ddymunoldeb sicrhau bod yr aelodaeth honno yn cynnwys personau â’r profiad a’r sgiliau y mae eu hangen i alluogi’r Cyngor i gyflawni ei swyddogaethau yn effeithlon ac yn effeithiol, a

(b) sicrhau bod y mwyafrif o aelodau’r Cyngor yn bersonau cofrestredig, neu wedi bod yn bersonau cofrestredig yn ddiweddar.

(5) Mae aelodau i weithredu fel unigolion (hynny yw, nid ydynt i weithredu fel cynrychiolwyr unrhyw sefydliad neu gorff y gallant fod yn perthyn iddo, nac unrhyw berson, sefydliad neu gorff sydd wedi eu henwebu).

Gwybodaeth Cychwyn

I5 Atod. 1 para. 3 ddim mewn grym ar y Cydsyniad Brenhinol, gweler a. 50

I6 Atod. 1 para. 3(1)-(4)(a)(5) mewn grym ar 18.8.2014 gan O.S. 2014/2162, ergl. 2(b)(i)

I7 Atod. 1 para. 3(1)-(4)(a)(5) mewn grym ar 1.4.2015 i'r graddau nad yw eisoes mewn grym gan O.S. 2015/29, ergl. 3(u)

I8 Atod. 1 para. 3(4)(b) mewn grym ar 1.4.2015 gan O.S. 2015/29, ergl. 3(u)

Aelodaeth: darpariaeth bellach LL+C

4 (1) Caiff Gweinidogion Cymru, drwy reoliadau, wneud darpariaeth ynglŷn ag aelodau a’u penodi.

(2) Caiff rheoliadau o dan y paragraff hwn, yn benodol, gynnwys darpariaeth am—

(a) cymhwystra person i gael ei benodi;

(b) y weithdrefn benodi;

(c) llenwi unrhyw leoedd gwag yn yr aelodaeth sy’n codi ac eithrio ar ddiwedd tymor swydd aelod.

(3) Caiff rheoliadau o dan y paragraff hwn—

(a) cymhwyso (gydag addasiadau neu hebddynt) unrhyw god ymarfer sy’n ymwneud â phenodiadau i gyrff cyhoeddus, neu

(b) gwneud darpariaeth arall sy’n ymwneud ag unrhyw god o’r fath.

Gwybodaeth Cychwyn

I9 Atod. 1 para. 4 ddim mewn grym ar y Cydsyniad Brenhinol, gweler a. 50

I10 Atod. 1 para. 4 mewn grym ar 18.8.2014 gan O.S. 2014/2162, ergl. 2(b)(ii)

Deiliadaeth LL+C

5 (1) Tymor swydd aelod yw unrhyw gyfnod hyd at 5 mlynedd y caiff Gweinidogion Cymru ei bennu wrth benodi’r aelod hwnnw.

(2) Caiff aelod ymddiswyddo ar unrhyw adeg drwy roi hysbysiad ysgrifenedig i brif swyddog y Cyngor.

Gwybodaeth Cychwyn

I11 Atod. 1 para. 5 ddim mewn grym ar y Cydsyniad Brenhinol, gweler a. 50

I12 Atod. 1 para. 5 mewn grym ar 18.8.2014 gan O.S. 2014/2162, ergl. 2(b)(iii)

Diswyddo LL+C

6 (1) Caniateir i aelod gael ei ddiswyddo drwy bleidlais fwyafrifol gan yr aelodau eraill os yw’r aelod, heb reswm dilys—

(a) wedi bod yn absennol o 3 chyfarfod o’r Cyngor yn olynol, neu

(b) wedi bod yn absennol o gyfarfodydd am gyfnod o 6 mis neu fwy, gan ddechrau ar y dyddiad yr aeth yr aelod i gyfarfod o’r Cyngor ddiwethaf.

(2) Cyn i unrhyw bleidlais gael ei chymryd i ddiswyddo aelod, rhaid i’r aelod gael cyfle i wneud sylwadau llafar i’r Cyngor.

(3) Bydd person yn peidio â bod yn aelod—

(a) os yw’r person wedi ei wahardd o weithgaredd a reoleiddir yn ymwneud â phlant o fewn ystyr adran 3(2) o Ddeddf Diogelu Grwpiau Hyglwyf 2006;

(b) os yw’r person wedi ei wahardd rhag cael ei gyflogi fel athro neu athrawes yn rhinwedd gorchymyn gwahardd o dan adran 141B o Ddeddf 2002;

(c) os yw’r person yn dod yn anghymwys i’w gofrestru o dan adran 9 yn rhinwedd gorchymyn disgyblu a wneir mewn cysylltiad â’r person hwnnw o dan adran 26;

(d) os yw’r person wedi ei anghymwyso rhag cael ei gyflogi fel athro neu athrawes mewn unrhyw ysgol yn rhinwedd gorchymyn wedi ei wneud—

(i) gan Dribiwnlys Ysgolion Annibynnol o dan adran 470 o Ddeddf 1996, neu

(ii) gan yr Ysgrifennydd Gwladol neu Weinidogion Cymru o dan adran 471 o’r Ddeddf honno; neu

(e) os yw’r person yn dod yn anghymwys i’w gofrestru fel athro neu athrawes, neu wedi ei anghymwyso rhag bod yn athro neu athrawes mewn ysgol neu sefydliad addysg bellach, mewn rhan arall o’r Deyrnas Unedig.

Gwybodaeth Cychwyn

I13 Atod. 1 para. 6 ddim mewn grym ar y Cydsyniad Brenhinol, gweler a. 50

I14 Atod. 1 para. 6 mewn grym ar 18.8.2014 gan O.S. 2014/2162, ergl. 2(b)(iv)

Tâl, lwfansau a threuliau aelodau LL+C

7 (1) Caiff y Cyngor—

(a) talu unrhyw dâl, lwfansau a threuliau y mae’n penderfynu arnynt i’w aelodau, a

(b) talu, neu wneud darpariaeth ar gyfer talu, unrhyw symiau fel pensiwn, lwfans ac arian rhodd i aelod, neu mewn cysylltiad ag aelod, y mae’n penderfynu arnynt.

(2) Os yw person yn peidio â bod yn aelod o’r Cyngor a’i bod yn ymddangos i’r Cyngor bod amgylchiadau arbennig sy’n ei gwneud yn briodol i’r person hwnnw dderbyn digollediad, caiff y Cyngor wneud taliad o unrhyw swm y mae’n penderfynu arno i’r person hwnnw.

(3) Caiff y Cyngor dalu unrhyw dreuliau a lwfansau y mae’n penderfynu arnynt i aelodau unrhyw un neu ragor o’i bwyllgorau nad ydynt yn aelodau o’r Cyngor.

(4) Caiff y Cyngor dalu i gyflogwr person sy’n aelod o’r Cyngor (neu berson nad yw’n aelod o’r Cyngor ond sy’n aelod o unrhyw un neu ragor o’i bwyllgorau) unrhyw ddigollediad y mae’n penderfynu arno mewn cysylltiad â cholli gwasanaethau’r person hwnnw.

Gwybodaeth Cychwyn

I15 Atod. 1 para. 7 ddim mewn grym ar y Cydsyniad Brenhinol, gweler a. 50

I16 Atod. 1 para. 7 mewn grym ar 18.8.2014 gan O.S. 2014/2162, ergl. 2(b)(v)

Aelod-gadeirydd LL+C

8 (1) Rhaid i’r Cyngor ethol aelod-gadeirydd o blith ei aelodaeth.

(2) Mae’r aelod-gadeirydd i ddal y swydd am unrhyw gyfnod y mae’r Cyngor yn penderfynu arno.

(3) Caiff yr aelod-gadeirydd—

(a) ymddiswyddo fel aelod-gadeirydd ar unrhyw adeg drwy roi hysbysiad ysgrifenedig i brif swyddog y Cyngor, a

(b) cael ei ddiswyddo fel aelod-gadeirydd drwy bleidlais â mwyafrif o ddwy ran o dair gan yr aelodau eraill.

Gwybodaeth Cychwyn

I17 Atod. 1 para. 8 ddim mewn grym ar y Cydsyniad Brenhinol, gweler a. 50

I18 Atod. 1 para. 8 mewn grym ar 1.4.2015 gan O.S. 2015/29, ergl. 3(u)

Prif swyddog a staff eraill LL+C

9 (1) Rhaid i’r Cyngor gael prif swyddog.

(2) Caiff Gweinidogion Cymru, drwy reoliadau, wneud darpariaeth ynghylch penodi prif swyddog, gan gynnwys, yn benodol—

(a) pennu pwy sydd i benodi’r prif swyddog;

(b) y weithdrefn ar gyfer y penodiad hwnnw;

(c) sut y mae telerau ac amodau’r prif swyddog (gan gynnwys tâl, lwfansau, treuliau a phensiynau) i gael eu penderfynu.

(3) Caiff rheoliadau o dan y paragraff hwn—

(a) cymhwyso (gydag addasiadau neu hebddynt) unrhyw god ymarfer sy’n ymwneud â phenodiadau i gyrff cyhoeddus, neu

(b) gwneud darpariaeth arall sy’n ymwneud ag unrhyw god o’r fath.

(4) Caiff y Cyngor benodi unrhyw gyflogeion eraill sy’n briodol yn ei farn ef.

(5) Mae cyflogeion (ac eithrio’r prif swyddog) i gael eu penodi ar unrhyw delerau ac amodau (gan gynnwys o ran tâl, lwfansau, treuliau a phensiynau) y mae’r Cyngor yn penderfynu arnynt.

(6) Caiff y Cyngor—

(a) talu pensiynau neu arian rhodd, neu wneud taliadau mewn cysylltiad â hwy, i gyflogeion neu gyn-gyflogeion neu mewn cysylltiad â hwy;

(b) darparu a chynnal cynlluniau (p’un a ydynt yn gyfrannol ai peidio) ar gyfer talu pensiynau ac arian rhodd i gyflogeion neu gyn-gyflogeion neu mewn cysylltiad â hwy.

(7) Mae cyfeiriadau yn y paragraff hwn at bensiynau ac arian rhodd yn cynnwys cyfeiriadau at bensiynau ac arian rhodd i ddigolledu cyflogeion sy’n colli cyflogaeth neu sy’n dioddef colled neu leihad o ran enillion, neu mewn cysylltiad â’r cyflogeion hynny.

(8) Os—

(a) yw unrhyw berson, ar beidio â bod yn gyflogedig gan y Cyngor, yn dod yn aelod o’r Cyngor, neu’n parhau i fod yn aelod o’r Cyngor, a

(b) oedd y person hwnnw, drwy gyfeirio at ei gyflogaeth, yn gyfranogwr mewn cynllun pensiwn a gynhelir gan y Cyngor,

caiff y Cyngor wneud darpariaeth i’r person hwnnw barhau i gyfranogi yn y cynllun hwnnw, ar unrhyw delerau ac amodau y mae’n penderfynu arnynt, fel pe bai gwasanaeth y person fel aelod yn wasanaeth fel cyflogai; ac nid yw unrhyw ddarpariaeth o’r fath i ragfarnu paragraff 7.

Gwybodaeth Cychwyn

I19 Atod. 1 para. 9 ddim mewn grym ar y Cydsyniad Brenhinol, gweler a. 50

I20 Atod. 1 para. 9(1)-(3) mewn grym ar 18.8.2014 at ddibenion penodedig gan O.S. 2014/2162, ergl. 2(b)(vi)

I21 Atod. 1 para. 9(1)-(3) mewn grym ar 1.4.2015 i'r graddau nad yw eisoes mewn grym gan O.S. 2015/29, ergl. 3(u)

I22 Atod. 1 para. 9(4)-(8) mewn grym ar 1.4.2015 gan O.S. 2015/29, ergl. 3(u)

Cynlluniau yn ymwneud â thâl etc LL+C

10 (1) Rhaid i’r Cyngor—

(a) llunio cynllun sy’n nodi ei ddull o benderfynu ar y symiau y caiff eu talu—

(i) i aelodau o dan baragraff 7, a

(ii) i gyflogeion o dan baragraff 9 (gan gynnwys y prif swyddog os yw rheoliadau a wneir o dan baragraff 9(2)(c) yn gwneud hynny’n ofynnol), a

(b) cyflwyno’r cynllun i Weinidogion Cymru i’w gymeradwyo.

(2) Dim ond yn unol â chynllun y mae Gweinidogion Cymru wedi ei gymeradwyo o dan y paragraff hwn y caiff y Cyngor benderfynu ar y symiau y mae’n eu talu i aelodau a chyflogeion.

(3) Rhaid i’r Cyngor gyhoeddi cynllun sydd wedi ei gymeradwyo gan Weinidogion Cymru yn y modd y caiff Gweinidogion Cymru ei bennu.

(4) Caiff y Cyngor ddiwygio’r cynllun o bryd i’w gilydd (ac os felly, mae is-baragraffau (1)(b), (2) a (3) yn gymwys i’r cynllun diwygiedig hwnnw).

Gwybodaeth Cychwyn

I23 Atod. 1 para. 10 ddim mewn grym ar y Cydsyniad Brenhinol, gweler a. 50

I24 Atod. 1 para. 10 mewn grym ar 1.4.2015 gan O.S. 2015/29, ergl. 3(u)

Cymhwystra ar gyfer y cynllun blwydd-daliadau LL+C

11 (1) Mae cyflogaeth gyda’r Cyngor ymhlith y mathau o gyflogaeth y gall cynllun o dan adran 1 o Ddeddf Blwydd-daliadau 1972 (p. 11) (cynlluniau blwydd-daliadau o ran gweision sifil ac ati) fod yn gymwys iddi.

(2) Rhaid i’r Cyngor dalu i Weinidog y Gwasanaeth Sifil, ar unrhyw adegau a gyfarwyddir gan y Gweinidog, unrhyw symiau y mae’r Gweinidog yn penderfynu arnynt mewn cysylltiad â’r cynnydd sydd i’w briodoli i is-baragraff (1) yn y symiau sy’n daladwy o’r arian a ddarperir gan Senedd y Deyrnas Unedig o dan y Ddeddf honno.

(3) Pan fo cyflogai’r Cyngor, drwy gyfeirio at y gyflogaeth honno, yn gyfranogwr mewn cynllun o dan adran 1 o Ddeddf Blwydd-daliadau 1972 a hefyd yn aelod o’r Cyngor, caiff yr Ysgrifennydd Gwladol benderfynu bod gwasanaeth y person fel aelod i gael ei drin at ddibenion y cynllun fel gwasanaeth fel cyflogai (p’un a oes budd-daliadau yn daladwy iddo neu mewn cysylltiad ag ef yn rhinwedd paragraff 7 ai peidio).

Gwybodaeth Cychwyn

I25 Atod. 1 para. 11 ddim mewn grym ar y Cydsyniad Brenhinol, gweler a. 50

I26 Atod. 1 para. 11 mewn grym ar 1.4.2015 gan O.S. 2015/29, ergl. 3(u)

Pwyllgorau’n gyffredinol LL+C

12 (1) O ran y Cyngor,—

(a) caiff sefydlu pwyllgorau at unrhyw ddiben, a

(b) os yw rheoliadau a wneir gan Weinidogion Cymru yn gwneud hynny’n ofynnol, rhaid iddo sefydlu unrhyw bwyllgorau at unrhyw ddibenion a bennir yn y rheoliadau;

(ond gweler hefyd baragraffau 19 ac 20).

(2) Yn ddarostyngedig i is-baragraff (3), o ran y Cyngor,—

(a) caiff benderfynu ar nifer yr aelodau y mae pwyllgor a sefydlir o dan y paragraff hwn i’w cael, a

(b) rhaid iddo benderfynu ar y telerau y mae’r aelodau hynny i fod yn y swydd a gadael y swydd yn unol â hwy.

(3) Caiff rheoliadau o dan is-baragraff (1)(b) wneud darpariaeth ynghylch—

(a) aelodaeth pwyllgor a sefydlir o dan y rheoliadau;

(b) y telerau y mae aelodau’r pwyllgor hwnnw i adael y swydd yn unol â hwy;

(c) gweithdrefn y pwyllgor hwnnw.

(4) Caiff rheoliadau o dan is-baragraff (1)(b) hefyd awdurdodi’r Cyngor i wneud darpariaeth mewn cysylltiad ag unrhyw fater y caniateir i ddarpariaeth gael ei gwneud gan y rheoliadau hynny mewn perthynas â hi.

(5) Yn ddarostyngedig i unrhyw amodau a osodir gan reoliadau sydd wedi eu gwneud o dan is-baragraff (1)(b), caiff y Cyngor gynnwys ar bwyllgor bersonau nad ydynt yn aelodau o’r Cyngor.

Gwybodaeth Cychwyn

I27 Atod. 1 para. 12 ddim mewn grym ar y Cydsyniad Brenhinol, gweler a. 50

I28 Atod. 1 para. 12 mewn grym ar 18.8.2014 gan O.S. 2014/2162, ergl. 2(b)(vii)

Dirprwyo swyddogaethau LL+C

13 (1) Caiff y Cyngor awdurdodi’r aelod-gadeirydd neu unrhyw bwyllgor sydd wedi ei sefydlu o dan baragraff 12 i arfer unrhyw un neu ragor o’i swyddogaethau y mae’n penderfynu arnynt.

(2) Nid yw is-baragraff (1) yn effeithio ar—

(a) cyfrifoldeb y Cyngor am arfer y swyddogaethau dirprwyedig, neu

(b) gallu’r Cyngor i arfer y swyddogaethau dirprwyedig.

Gwybodaeth Cychwyn

I29 Atod. 1 para. 13 ddim mewn grym ar y Cydsyniad Brenhinol, gweler a. 50

I30 Atod. 1 para. 13 mewn grym ar 1.4.2015 gan O.S. 2015/29, ergl. 3(u)

Trafodion LL+C

14 (1) Caiff y Cyngor reoleiddio ei weithdrefn ei hun a gweithdrefn unrhyw un neu ragor o’i bwyllgorau (ac eithrio i’r graddau y mae’r Atodlen hon neu reoliadau a wneir oddi tani yn darparu fel arall).

(2) Nis effeithir ar ddilysrwydd trafodion y Cyngor gan—

(a) unrhyw swyddi gwag o ran ei aelodau;

(b) unrhyw ddiffyg wrth benodi aelod;

(c) anghymwyso person fel aelod ar ôl ei benodi.

(3) Rhaid i’r Cyngor roi unrhyw gopïau o unrhyw ddogfennau a ddosberthir i’w aelodau neu ei bwyllgorau i Weinidogion Cymru y bydd Gweinidogion Cymru yn gofyn amdanynt.

Gwybodaeth Cychwyn

I31 Atod. 1 para. 14 ddim mewn grym ar y Cydsyniad Brenhinol, gweler a. 50

I32 Atod. 1 para. 14 mewn grym ar 1.4.2015 gan O.S. 2015/29, ergl. 3(u)

Gosod y sêl LL+C

15 Mae’r weithred o osod sêl y Cyngor i gael ei dilysu drwy lofnod—

(a) yr aelod-gadeirydd neu ryw berson arall sydd wedi ei awdurdodi’n gyffredinol neu’n benodol gan y Cyngor i weithredu at y diben hwnnw, a

(b) un aelod arall.

Gwybodaeth Cychwyn

I33 Atod. 1 para. 15 ddim mewn grym ar y Cydsyniad Brenhinol, gweler a. 50

I34 Atod. 1 para. 15 mewn grym ar 1.4.2015 gan O.S. 2015/29, ergl. 3(u)

Profi dogfennau LL+C

16 Mae pob dogfen yr honnir ei bod yn offeryn sydd wedi ei wneud neu ei ddyroddi gan y Cyngor neu ar ei ran ac sydd i gael ei weithredu’n briodol o dan sêl y Cyngor, neu sydd i gael ei lofnodi neu ei weithredu gan berson sydd wedi ei awdurdodi gan y Cyngor i weithredu ar ei ran yn hynny o beth, i gael ei derbyn yn dystiolaeth a’i thrin, heb brawf pellach, fel ei bod wedi ei gwneud neu ei dyroddi felly oni ddangosir i’r gwrthwyneb.

Gwybodaeth Cychwyn

I35 Atod. 1 para. 16 ddim mewn grym ar y Cydsyniad Brenhinol, gweler a. 50

I36 Atod. 1 para. 16 mewn grym ar 1.4.2015 gan O.S. 2015/29, ergl. 3(u)

Cyllid LL+C

17 Caiff Gweinidogion Cymru roi grantiau i’r Cyngor o unrhyw symiau ac yn ddarostyngedig i unrhyw delerau ac amodau (gan gynnwys o ran ad-dalu) y maent yn penderfynu arnynt.

Gwybodaeth Cychwyn

I37 Atod. 1 para. 17 ddim mewn grym ar y Cydsyniad Brenhinol, gweler a. 50

I38 Atod. 1 para. 17 mewn grym ar 1.4.2015 gan O.S. 2015/29, ergl. 3(u)

Swyddog cyfrifyddu LL+C

18 (1) Caiff Gweinidogion Cymru ddynodi person i weithredu fel swyddog cyfrifyddu’r Cyngor.

(2) Mae gan y swyddog cyfrifyddu, mewn perthynas â chyfrifon a chyllid y Cyngor, y cyfrifoldebau a bennir mewn cyfarwyddyd gan Weinidogion Cymru.

(3) Ymhlith y cyfrifoldebau y caniateir eu pennu mae cyfrifoldebau—

(a) mewn perthynas â llofnodi cyfrifon;

(b) am briodoldeb a rheoleidd-dra cyllid y Cyngor;

(c) am sicrhau darbodaeth, effeithlonrwydd ac effeithiolrwydd wrth i’r Cyngor ddefnyddio ei adnoddau;

(d) sy’n ddyledus i Weinidogion Cymru, Cynulliad Cenedlaethol Cymru neu Bwyllgor Cyfrifon Cyhoeddus y Cynulliad Cenedlaethol;

(e) sy’n ddyledus i Dŷ’r Cyffredin neu Bwyllgor Cyfrifon Cyhoeddus y Tŷ hwnnw.

Gwybodaeth Cychwyn

I39 Atod. 1 para. 18 ddim mewn grym ar y Cydsyniad Brenhinol, gweler a. 50

I40 Atod. 1 para. 18 mewn grym ar 1.4.2015 gan O.S. 2015/29, ergl. 3(u)

Pwyllgor archwilio LL+C

19 (1) Rhaid i’r Cyngor sefydlu pwyllgor (“pwyllgor archwilio”) i—

(a) adolygu materion ariannol y Cyngor a chraffu arnynt,

(b) adolygu ac asesu trefniadau rheoli risg, rheolaeth fewnol a llywodraethu corfforaethol y Cyngor,

(c) adolygu ac asesu darbodaeth, effeithlonrwydd ac effeithiolrwydd y defnydd sydd wedi ei wneud o adnoddau wrth gyflawni swyddogaethau’r Cyngor, a

(d) gwneud adroddiadau ac argymhellion i’r Cyngor mewn perthynas ag adolygiadau a gynhelir o dan baragraffau (a), (b) neu (c).

(2) Rhaid i’r pwyllgor archwilio anfon copïau o’i adroddiadau a’i argymhellion at Weinidogion Cymru.

(3) Y pwyllgor archwilio sydd i benderfynu sut i gyflawni ei swyddogaethau o dan y paragraff hwn.

Gwybodaeth Cychwyn

I41 Atod. 1 para. 19 ddim mewn grym ar y Cydsyniad Brenhinol, gweler a. 50

I42 Atod. 1 para. 19 mewn grym ar 1.4.2015 gan O.S. 2015/29, ergl. 3(u)

Pwyllgor archwilio: aelodaeth LL+C

20 (1) Mae’r pwyllgor archwilio i gynnwys—

(a) o leiaf ddau aelod o’r Cyngor, a

(b) o leiaf un aelod lleyg.

(2) Ni chaiff aelod-gadeirydd y Cyngor fod yn aelod o’r pwyllgor archwilio.

(3) Caiff y Cyngor dalu unrhyw dâl, lwfansau a threuliau i aelod lleyg y mae’n penderfynu arnynt.

(4) Rhaid i’r Cyngor ymgynghori â Gweinidogion Cymru cyn penderfynu ar y tâl neu’r lwfansau sy’n daladwy i aelod lleyg.

(5) Yn y paragraff hwn ystyr “aelod lleyg” yw unrhyw berson nad yw’n aelod o’r Cyngor nac yn gyflogai iddo.

Gwybodaeth Cychwyn

I43 Atod. 1 para. 20 ddim mewn grym ar y Cydsyniad Brenhinol, gweler a. 50

I44 Atod. 1 para. 20 mewn grym ar 1.4.2015 gan O.S. 2015/29, ergl. 3(u)

Cyfrifon ac archwilio allanol LL+C

21 (1) Rhaid i’r Cyngor—

(a) cadw cyfrifon priodol a chofnodion priodol mewn perthynas â hwy, a

(b) llunio datganiad o gyfrifon mewn cysylltiad â phob blwyddyn ariannol.

(2) Wrth lunio datganiad o gyfrifon, rhaid i’r Cyngor gydymffurfio ag unrhyw gyfarwyddyd a roddir gan Weinidogion Cymru o ran—

(a) ffurf a chynnwys cyfrifon o’r fath;

(b) y dulliau ac egwyddorion y mae’r datganiad i gael ei lunio yn unol â hwy.

(3) Heb fod yn hwyrach na 31 Awst ar ôl diwedd pob blwyddyn ariannol, rhaid i’r Cyngor gyflwyno copi o’i ddatganiad o gyfrifon i—

(a) Gweinidogion Cymru, a

(b) Archwilydd Cyffredinol Cymru.

(4) Rhaid i Archwilydd Cyffredinol Cymru—

(a) archwilio’r datganiad o gyfrifon, ei ardystio ac adrodd arno, a

(b) heb fod yn hwyrach na 4 mis ar ôl cyflwyno’r copi o dan is-baragraff (3), osod gerbron Cynulliad Cenedlaethol Cymru gopi o’r datganiad ardystiedig a’r adroddiad.

(5) Yn yr Atodlen hon ystyr “blwyddyn ariannol” yw’r cyfnod o 12 mis sy’n dod i ben ar 31 Mawrth.

Gwybodaeth Cychwyn

I45 Atod. 1 para. 21 ddim mewn grym ar y Cydsyniad Brenhinol, gweler a. 50

I46 Atod. 1 para. 21 mewn grym ar 1.4.2015 gan O.S. 2015/29, ergl. 3(u)

Adroddiadau blynyddol LL+C

22 (1) Heb fod yn hwyrach na 30 Tachwedd ar ôl diwedd pob blwyddyn ariannol, rhaid i’r Cyngor gyflwyno adroddiad i Weinidogion Cymru ar y ffordd y cyflawnwyd ei swyddogaethau yn ystod y flwyddyn honno.

(2) Rhaid i Weinidogion Cymru osod copi o’r adroddiad gerbron Cynulliad Cenedlaethol Cymru.

(3) Caiff y Cyngor gyhoeddi’r adroddiad mewn unrhyw ffordd sy’n briodol yn ei farn ef (gan gynnwys yn electronig).

Gwybodaeth Cychwyn

I47 Atod. 1 para. 22 ddim mewn grym ar y Cydsyniad Brenhinol, gweler a. 50

I48 Atod. 1 para. 22 mewn grym ar 1.4.2015 gan O.S. 2015/29, ergl. 3(u)

(cyflwynwyd gan adran 9(3))

ATODLEN 2 LL+C CATEGORÏAU COFRESTRU

1 LL+C Mae’r golofn gyntaf yn nhabl 1 yn nodi’r categorïau cofrestru ac mae’r ail golofn yn disgrifio’r categori drwy gyfeirio at y personau sy’n dod oddi mewn iddo.

TABL 1

Categori	Disgrifiad
Athro neu athrawes ysgol	Person sy’n athro cymwysedig neu’n athrawes gymwysedig ac sy’n darparu (neu sy’n dymuno darparu) unrhyw wasanaethau a bennir mewn rheoliadau a wneir o dan adran 14 mewn ysgol.
Gweithiwr cymorth dysgu mewn ysgol	[F1 Person sy’n bodloni’r gofynion a bennir mewn rheoliadau a wneir o dan adran 14(1)(a)(ii) ac sy’n cefnogi (neu sy’n dymuno cefnogi) y gwaith o ddarparu unrhyw un neu ragor o’r gwasanaethau a bennir mewn rheoliadau a wneir o dan yr adran honno mewn ysgol.]
Athro neu athrawes addysg bellach	Person sy’n darparu (neu sy’n dymuno darparu) addysg (fel y’i diffinnir gan adran 140(3) o Ddeddf 2002) mewn neu ar ran sefydliad addysg bellach yng Nghymru.
Gweithiwr cymorth dysgu mewn addysg bellach	Person F2 ... sy’n darparu (neu sy’n dymuno darparu), yn uniongyrchol neu’n anuniongyrchol, unrhyw un neu ragor o’r gwasanaethau a ddisgrifir yn adran 16(2) mewn neu ar ran sefydliad addysg bellach yng Nghymru.
[F3 Gweithiwr ieuenctid	Person syʼn darparu (neu syʼn dymuno darparu) gwasanaethau datblygu ieuenctid ac sydd— (a) yn meddu ar o leiaf un oʼr cymwysterau a bennir fel cymwysterau gweithiwr ieuenctid mewn gorchymyn a wneir o dan baragraff 2, neu (b) fel arall yn bodloni’r gofynion eraill hynny a bennir mewn gorchymyn a wneir o dan y paragraff hwnnw.
Gweithiwr cymorth ieuenctid	Person syʼn darparu (neu syʼn dymuno darparu) gwasanaethau datblygu ieuenctid ac sydd– (c) yn meddu ar o leiaf un oʼr cymwysterau a bennir fel cymwysterau gweithiwr cymorth ieuenctid mewn gorchymyn a wneir o dan baragraff 2, neu (d) fel arall yn bodloni’r gofynion eraill hynny a bennir mewn gorchymyn a wneir o dan y paragraff hwnnw.
Ymarferydd dysgu seiliedig ar waith	Person syʼn darparu (neu syʼn dymuno darparu) gwasanaethau ymarferydd dysgu seiliedig ar waith. ]
[F4 Athro neu athrawes ysgol annibynnol	Person sy’n darparu (neu sy’n dymuno darparu) gwasanaethau athro neu athrawes ysgol annibynnol mewn neu ar ran ysgol annibynnol yng Nghymru.
Gweithiwr cymorth dysgu mewn ysgol annibynnol	Person sy’n cefnogi (neu sy’n dymuno cefnogi) y gwaith o ddarparu gwasanaethau athro neu athrawes ysgol annibynnol mewn neu ar ran ysgol annibynnol yng Nghymru.
Athro neu athrawes sefydliad ôl-16 arbennig annibynnol	Person sy’n darparu (neu sy’n dymuno darparu) gwasanaethau athro neu athrawes sefydliad ôl-16 arbennig annibynnol mewn neu ar ran sefydliad ôl-16 arbennig annibynnol yng Nghymru.
Gweithiwr cymorth dysgu mewn sefydliad ôl-16 arbennig annibynnol	Person sy’n cefnogi (neu sy’n dymuno cefnogi) y gwaith o ddarparu gwasanaethau athro neu athrawes sefydliad ôl-16 arbennig annibynnol mewn neu ar ran sefydliad ôl-16 arbennig annibynnol yng Nghymru.]

Diwygiadau Testunol

F1 Geiriau yn Atod. 2 para. 1 Tabl 1 wedi eu hamnewid (22.5.2023) gan Gorchymyn Cyngor y Gweithlu Addysg (Categorïau Cofrestru Ychwanegol) (Cymru) 2023 (O.S. 2023/551), erglau. 1(2), 11(2)(a)

F2 Geiriau yn Atod. 2 para. 1 Tabl 1 wedi eu hepgor (22.5.2023) yn rhinwedd Gorchymyn Cyngor y Gweithlu Addysg (Categorïau Cofrestru Ychwanegol) (Cymru) 2023 (O.S. 2023/551), erglau. 1(2), 11(2)(b)

F3 Geiriau yn Atod. 2 para. 1 Tabl 1 wedi eu mewnosod (1.3.2017) gan Gorchymyn Cyngor y Gweithlu Addysg (Cofrestru Gweithwyr Ieuenctid, Gweithwyr Cymorth Ieuenctid ac Ymarferwyr Dysgu Seiliedig ar Waith) 2016 (O.S. 2016/1183), erglau. 1(2), 8(2)

F4 Geiriau yn Atod. 2 para. 1 Tabl 1 wedi eu mewnosod (22.5.2023) gan Gorchymyn Cyngor y Gweithlu Addysg (Categorïau Cofrestru Ychwanegol) (Cymru) 2023 (O.S. 2023/551), erglau. 1(2), 11(2)(c)

Gwybodaeth Cychwyn

I49 Atod. 2 para. 1 ddim mewn grym ar y Cydsyniad Brenhinol, gweler a. 50

I50 Atod. 2 para. 1 mewn grym ar 16.1.2015 at ddibenion penodedig gan O.S. 2015/29, ergl. 2(z)

I51 Atod. 2 para. 1 mewn grym ar 1.1.2016 at ddibenion penodedig gan O.S. 2015/1688, ergl. 2(c)

Newid categorïau gweithiwr cofrestredig LL+C

2 (1) Caiff Gweinidogion Cymru, drwy orchymyn, ychwanegu, diwygio neu ddileu categori cofrestru (neu’r disgrifiad o gategori), a chaiff hynny gynnwys, ymhlith pethau eraill, ychwanegu categori cofrestru sy’n ymwneud ag ysgolion annibynnol (o fewn ystyr “independent school” yn adran 463 o Ddeddf 1996), a diwygio neu ddileu categori o’r fath.

(2) Caiff gorchymyn o dan is-baragraff (1) wneud unrhyw ddarpariaeth am y categori cofrestru newydd, neu mewn cysylltiad ag ef, sy’n angenrheidiol neu’n hwylus ym marn Gweinidogion Cymru.

(3) Yn benodol, caiff gorchymyn o dan is-baragraff (1) bennu’r gwasanaethau na chaiff person eu darparu oni bai bod y person—

(a) yn bodloni unrhyw ofynion a bennir, a

(b) wedi ei gofrestru.

(4) Caiff gorchymyn sy’n pennu gwasanaethau at ddibenion is-baragraff (3) wneud darpariaeth drwy gyfeirio at—

(a) un neu ragor o weithgareddau penodedig, neu

(b) yr amgylchiadau y cyflawnir gweithgareddau ynddynt.

(5) Caiff gofyniad gorchymyn o’r fath ymwneud, yn benodol, â—

(a) meddu ar gymhwyster penodedig neu brofiad o fath penodedig;

(b) cymryd rhan mewn rhaglen neu gwrs hyfforddi penodedig neu gwblhau rhaglen neu gwrs o’r fath;

(c) cydymffurfio ag amod penodedig;

(d) arfer disgresiwn gan Weinidogion Cymru, person penodedig arall neu berson arall o ddisgrifiad penodedig.

(6) Cyn gwneud gorchymyn o dan y paragraff hwn, rhaid i Weinidogion Cymru ymgynghori ag unrhyw bersonau sy’n briodol yn eu barn hwy.

(7) Caiff gorchymyn a wneir o dan y paragraff hwn addasu’r Ddeddf hon neu unrhyw ddeddfiad arall.

Gwybodaeth Cychwyn

I52 Atod. 2 para. 2 ddim mewn grym ar y Cydsyniad Brenhinol, gweler a. 50

I53 Atod. 2 para. 2 mewn grym ar 1.4.2015 gan O.S. 2015/29, ergl. 3(v)

Dehongli LL+C

[F5 3 Yn yr Atodlen hon—

• ystyr “dysgu seiliedig ar waith” (“work based learning”) yw addysg neu hyfforddiant a ddarperir—

  (a)

  ar gyfer personau syʼn 16 oed neu’n hŷn (ni waeth pa un a yw hefyd yn cael ei ddarparu i bersonau o dan 16 oed), a

  (b)

  er mwyn datblygu gwybodaeth a sgiliau syʼn berthnasol i grefft, swydd neu gyflogwr penodol;

• [F6 “gwasanaethau athro neu athrawes sefydliad ôl-16 arbennig annibynnol” (“independent special post-16 institution teacher services”) yw gwasanaethau a bennir felly mewn gorchymyn a wneir o dan baragraff 2;

• “gwasanaethau athro neu athrawes ysgol annibynnol” (“independent school teacher services”) yw gwasanaethau a bennir felly mewn gorchymyn a wneir o dan baragraff 2;]

• “gwasanaethau datblygu ieuenctid” (“youth development services”) yw gwasanaethau—

  (a)

  a ddarperir yn bennaf i bersonau nad ydynt yn iau nag 11 oed nac yn hŷn na 25 oed, a

  (b)

  syʼn hybu—

  (i)

  datblygu sgiliau neu wybodaeth y personau hynny, neu

  (ii)

  ddatblygiad deallusol, emosiynol neu gymdeithasol y personau hynny;

• “gwasanaethau ymarferydd dysgu seiliedig ar waith” (“work based learning practitioner services”) yw—

  (a)

  cydgysylltu a chyflenwi dysgu seiliedig ar waith;

  (b)

  asesu gwybodaeth a sgiliau person sy’n cael (neu sydd ar fin cael) dysgu seiliedig ar waith;

• [F6 mae i “sefydliad ôl-16 arbennig annibynnol” (“independent special post-16 institution”) yr ystyr a roddir yn adran 56(6) o Ddeddf Anghenion Dysgu Ychwanegol a’r Tribiwnlys Addysg (Cymru) 2018 (dccc 2);]

• ystyr “ysgol” (“school”) yw—

  (a)

  ysgol a gynhelir gan awdurdod lleol yng Nghymru;

  (b)

  ysgol arbennig yng Nghymru nas cynhelir felly.]

• [F6 mae i “ysgol annibynnol” yr ystyr a roddir i “independent school” yn adran 463 o Ddeddf 1996.]

Diwygiadau Testunol

F5 Atod. 2 para. 3 wedi ei amnewid (1.3.2017) gan Gorchymyn Cyngor y Gweithlu Addysg (Cofrestru Gweithwyr Ieuenctid, Gweithwyr Cymorth Ieuenctid ac Ymarferwyr Dysgu Seiliedig ar Waith) 2016 (O.S. 2016/1183), erglau. 1(2), 8(3)

F6 Geiriau yn Atod. 2 para. 3 wedi eu mewnosod (22.5.2023) gan Gorchymyn Cyngor y Gweithlu Addysg (Categorïau Cofrestru Ychwanegol) (Cymru) 2023 (O.S. 2023/551), erglau. 1(2), 11(3)

Gwybodaeth Cychwyn

I54 Atod. 2 para. 3 ddim mewn grym ar y Cydsyniad Brenhinol, gweler a. 50

I55 Atod. 2 para. 3 mewn grym ar 16.1.2015 gan O.S. 2015/29, ergl. 2(z)

(cyflwynwyd gan adran 48)

ATODLEN 3 LL+C MÂN DDIWYGIADAU A DIWYGIADAU CANLYNIADOL

RHAN 1 LL+C MÂN DDIWYGIADAU A DIWYGIADAU CANLYNIADOL

Deddf Addysg 2002 (p. 32) LL+C

1 (1) Mae Deddf 2002 wedi ei diwygio fel a ganlyn.

(2) Yn adran 32 (cyfrifoldeb am bennu dyddiadau tymhorau a gwyliau ac am bennu amserau sesiynau)—

(a) yn is-adran (1)—

(i) ar ôl “school” y tro cyntaf a’r ail dro y mae’r gair yn ymddangos, mewnosoder “in England”;

(ii) ym mharagraff (b), hepgorer “subject to subsections (5) to (9),”;

(b) yn is-adran (2)—

(i) ar ôl “school” y tro cyntaf y mae’r gair yn ymddangos, mewnosoder “in England”;

(ii) ym mharagraff (b), hepgorer “subject to subsections (5) to (9)”;

(c) hepgorer is-adrannau (5) i (10);

(d) yn unol â hynny, pennawd adran 32 bellach fydd “Responsibility for fixing dates of terms and holidays and times of sessions: England”.

(3) Yn adran 131(1) (gwerthuso athrawon ysgol), ar ôl “teachers” mewnosoder “in England”.

(4) Yn adran 132 (statws athro cymwysedig neu athrawes gymwysedig), yn lle “General Teaching Council for Wales” rhodder “Education Workforce Council”.

(5) Yn adran 133(1) (gofyniad i fod yn gymwysedig), ar ôl “school” mewnosoder “in England”.

(6) Yn adran 210(6A) (gorchmynion a rheoliadau), yn lle “32(9)” rhodder “32C(5)”.

Gwybodaeth Cychwyn

I56 Atod. 3 para. 1 ddim mewn grym ar y Cydsyniad Brenhinol, gweler a. 50

I57 Atod. 3 para. 1(1)(2)(6) mewn grym ar 14.7.2014 gan O.S. 2014/1605, ergl. 2(d)

I58 Atod. 3 para. 1(1)(2)(6) mewn grym ar 1.4.2015 gan O.S. 2015/29, ergl. 3(w)

I59 Atod. 3 para. 1(4)(5) mewn grym ar 1.4.2015 gan O.S. 2015/29, ergl. 3(w)

Deddf Safonau a Threfniadaeth Ysgolion (Cymru) 2013 (dccc 1) LL+C

2 Yn Atodlen 4 i Ddeddf Safonau a Threfniadaeth Ysgolion (Cymru) 2013, ym mharagraff 8, yn lle “Atodlen 13 i Ddeddf Safonau a Fframwaith Ysgolion 1998” rhodder “reoliadau a wneir o dan adran 31 o Ddeddf Addysg 2002 (rheoli mangreoedd ysgol)”.

Gwybodaeth Cychwyn

I60 Atod. 3 para. 2 mewn grym ar 12.7.2014, gweler a. 50(3)

I61 Atod. 3 para. 2 mewn grym ar 1.4.2015 gan O.S. 2015/29, ergl. 3(w)

RHAN 2 LL+C DIDDYMIADAU

3 LL+C Mae’r deddfiadau a nodir yn y golofn gyntaf wedi eu diddymu i’r graddau a nodir yn yr ail golofn.

TABL 2

Deddfiad	Graddau’r diddymiad
Deddf Addysgu ac Addysg Uwch 1998 (p. 30)	Adrannau 1 i 15.
	Adran 19.
	Atodlen 1.
	Atodlen 2.
Deddf Addysg 2002 (p. 32)	Adran 131(7).
	Adran 134.

Gwybodaeth Cychwyn

I62 Atod. 3 para. 3 ddim mewn grym ar y Cydsyniad Brenhinol, gweler a. 50

I63 Atod. 3 para. 3 mewn grym ar 1.4.2015 at ddibenion penodedig gan O.S. 2015/29, ergl. 3(x) (ynghyd ag ergl. 4)

(cyflwynwyd gan adran 1)

ATODLEN 4 LL+C MYNEGAI O EIRIAU AC YMADRODDION WEDI EU DIFFINIO

Gwybodaeth Cychwyn

I64 Atod. 4 mewn grym ar y Cydsyniad Brenhinol, gweler a. 50(1)(a)

I65 Atod. 4 mewn grym ar 16.1.2015 gan O.S. 2015/29, ergl. 2(aa)

O ran y geiriau a’r ymadroddion yng ngholofn gyntaf tabl 3—

(a) mae’r geiriau a’r ymadroddion Saesneg cyfatebol wedi eu nodi yn yr ail golofn, a

(b) maent wedi eu diffinio gan neu maent, yn ôl y digwydd, i gael eu dehongli yn unol â’r darpariaethau yn y Ddeddf hon sydd wedi eu rhestru yn y drydedd golofn.

TABL 3

Gair neu ymadrodd	Gair neu ymadrodd yn y Saesneg	Darpariaeth berthnasol
Addasu	Modify	Adran 49
Addysg (yn adrannau 15 ac 16)	Education (in sections 15 & 16)	Adrannau 15, 16
Asiant	Agent	Adran 37
Athro neu athrawes addysg bellach	Further education teacher	Atodlen 2
[F7 Athro neu athrawes sefydliad ôl-16 arbennig annibynnol	Independent special post-16 institution teacher	Atodlen 2]
Athro neu athrawes ysgol	School teacher	Atodlen 2
[F7 Athro neu athrawes ysgol annibynnol	Independent school teacher	Atodlen 2]
Blwyddyn ariannol (yn Atodlen 1)	Financial year (in Schedule 1)	Paragraff 21(5) o Atodlen 1
Categori cofrestru	Category of registration	Adran 41(1)
Corff priodol	Appropriate body	Adran 21
Cyflog (yn adran 12)	Salary (in section 12)	Adran 12
Cyflogwr perthnasol	Relevant employer	Adran 36 (4)
Cyfnod sefydlu	Period of induction	Adran 22(3)
Cyngor y Gweithlu Addysg	Education Workforce Council	Adran 2
Deddf 1996	1996 Act	Adran 49
Deddf 1998	1998 Act	Adran 49
Deddf 2002	2002 Act	Adran 49
Deddf 2013	2013 Act	Adran 49
Deddfiad	Enactment	Adran 49
[F7 Dysgu seiliedig ar waith	Work based learning	Atodlen 2]
Gorchymyn disgyblu	Disciplinary order	Adran 27(2)
[F7 Gwasanaethau datblygu ieuenctid	Youth development services	Atodlen 2]
Gwasanaethau perthnasol	Relevant services	Adran 41
[F7 Gwasanaethau ymarferydd dysgu seiliedig ar waith	Work based learning practitioner services	Atodlen 2]
Gweithiwr cymorth dysgu mewn addysg bellach	Further education learning support worker	Atodlen 2
[F7 Gweithiwr cymorth dysgu mewn sefydliad ôl-16 arbennig annibynnol	Independent special post-16 institution learning support worker	Atodlen 2]
Gweithiwr cymorth dysgu mewn ysgol	School learning support worker	Atodlen 2
[F7 Gweithiwr cymorth dysgu mewn ysgol annibynnol	Independent school learning support worker	Atodlen 2
Gweithiwr cymorth ieuenctid	Youth support worker	Atodlen 2
Gweithiwr ieuenctid	Youth worker	Atodlen 2]
Materion perthnasol (yn adran 7)	Relevant matters (in section 7)	Adran 7
Pennaeth perthnasol	Relevant principal	Adran 21
Penodedig	Specified	Adran 49
Person cofrestredig	Registered person	Adran 41(1) (gweler hefyd adran 27(1)
Proffesiwn cofrestradwy (yn adrannau 4 ac 8)	Registrable profession (in sections 4 & 8)	Adran 8
Sefydliad addysg bellach	Further education institution	Adran 41(1)
[F7 Sefydliad ôl-16 arbennig annibynnol	Independent special post-16 institution	Atodlen 2]
Trosedd berthnasol	Relevant offence	Adran 27(1)
Y Cyngor	The Council	Adran 2(1)(b)
Y gofrestr	The register	Adran 41(1)
[F7 Ymarferydd dysgu seiliedig ar waith	Work based learning practitioner	Atodlen 2]
Ysgol (yn adrannau 14, 23 ac Atodlen 2)	School (in sections 14, 23 & Schedule 2)	Adrannau 14(6), 23(7), paragraff 3 o Atodlen 2
[F7 Ysgol annibynnol	Independent school	Atodlen 2]
Ysgol berthnasol a gynhelir (yn adran 22(3))	Relevant maintained school (in section 22(3))	Adran 22(3)

Diwygiadau Testunol

F7 Geiriau yn Atod. 4 Tabl 3 wedi eu mewnosod (22.5.2023) gan Gorchymyn Cyngor y Gweithlu Addysg (Categorïau Cofrestru Ychwanegol) (Cymru) 2023 (O.S. 2023/551), erglau. 1(2), 11(4)