Rheoliadau Ardrethu Annomestig (Rhyddhad Rhwydweithiau Gwresogi) (Cymru) 2024

Offerynnau Statudol Cymru

2024 Rhif 38 (Cy. 13)

Ardrethu A Phrisio, Cymru

Rheoliadau Ardrethu Annomestig (Rhyddhad Rhwydweithiau Gwresogi) (Cymru) 2024

Gwnaed

15 Ionawr 2024

Gosodwyd gerbron Senedd Cymru

17 Ionawr 2024

Yn dod i rym

1 Ebrill 2024

Mae Gweinidogion Cymru yn gwneud y Rheoliadau hyn drwy arfer y pwerau a roddir iddynt gan baragraff 6(1)(b) a (2) o Atodlen 4ZA i Ddeddf Cyllid Llywodraeth Leol 1988(1).

Enwi, dod i rym a dehongli

1.—( 1) Enw’r Rheoliadau hyn yw Rheoliadau Ardrethu Annomestig (Rhyddhad Rhwydweithiau Gwresogi) (Cymru) 2024.

(2) Daw’r Rheoliadau hyn i rym ar 1 Ebrill 2024.

(3) Yn y Rheoliadau hyn, ystyr “y Ddeddf” yw Deddf Cyllid Llywodraeth Leol 1988.

Ystyr rhwydwaith gwresogi

2.   At ddibenion paragraff 6 o Atodlen 4ZA i’r Ddeddf, ac at ddibenion rheoliad 3 o’r Rheoliadau hyn, ystyr “rhwydwaith gwresogi” yw cyfleuster sy’n cyflenwi ynni thermol o ffynhonnell ganolog at ddibenion—

(a) gwresogi gofod,

(b) oeri gofod, neu

(c) gwresogi dŵr domestig.

Yr amodau ar gyfer rhyddhad

3.—( 1) Yr amodau sydd i’w bodloni at ddibenion paragraff 6(1)(b) o Atodlen 4ZA i’r Ddeddf yw, am y cyfnod o 12 mis sy’n dechrau â’r diwrnod y codir swm ynglŷn ag ef sydd o dan sylw, ei bod yn ymddangos i’r awdurdod bilio y mae’r rhwydwaith gwresogi yn ei ardal y bydd yr ynni thermol a gyflenwir gan y rhwydwaith gwresogi yn cael ei gynhyrchu o ffynhonnell garbon isel.

(2) Caiff y ffynhonnell garbon isel fod ar yr hereditament o dan sylw neu ar hereditament gwahanol.

(3) Yn y rheoliad hwn—

mae i “awdurdod bilio” yr ystyr a roddir i “billing authority” gan adran 144(2) o’r Ddeddf;

mae i “diwrnod y codir swm ynglŷn ag ef” yr ystyr a roddir i “chargeable day” gan adran 43(3) o’r Ddeddf;

ystyr “ffynhonnell garbon isel” (“low-carbon source”) yw ffynhonnell sy’n cynhyrchu ynni thermol y mae’r canlynol yn wir amdano—

(a)

mae o leiaf 75% ohono yn wres a gydgynhyrchir,

(b)

mae o leiaf 50% ohono yn wres adnewyddadwy,

(c)

mae o leiaf 50% ohono yn wres gwastraff, neu

(d)

mae o leiaf 75% ohono yn gyfuniad o wres adnewyddadwy, gwres gwastraff neu wres a gydgynhyrchir;

ystyr “gwres adnewyddadwy” (“renewable heat”) yw ynni thermol a gynhyrchir gan beiriannau a pheirianwaith ynni adnewyddadwy a eithrir, fel y’u diffinnir ym mharagraff (d) yn Nosbarth 1 o’r Atodlen i Reoliadau Prisio ar gyfer Ardrethu (Peiriannau a Pheirianwaith) (Cymru) 2000(2);

ystyr “gwres a gydgynhyrchir” (“cogenerated heat”) yw ynni thermol a gynhyrchir yn yr un broses ac ar yr un pryd ag ynni trydanol neu ynni mecanyddol;

ystyr “gwres gwastraff” (“waste heat”) yw ynni thermol a gynhyrchir yn anochel fel sgil-gynnyrch proses arall ac na fyddai unrhyw ddefnydd iddo heblaw at ddibenion rhwydwaith gwresogi.

Rebecca Evans

Y Gweinidog Cyllid a Llywodraeth Leol, un o Weinidogion Cymru

15 Ionawr 2024

NODYN ESBONIADOL

(Nid yw’r nodyn hwn yn rhan o’r Rheoliadau)

Mae’r Rheoliadau hyn, sy’n gymwys o ran Cymru yn unig, yn rhagnodi amodau sydd i’w bodloni i fod yn gymwys i gael rhyddhad rhwydweithiau gwresogi rhag atebolrwydd am ardrethu annomestig.

Mae rheoliad 2 yn nodi ystyr “rhwydwaith gwresogi” o ran cymhwystra ar gyfer rhyddhad rhwydweithiau gwresogi.

Mae rheoliad 3 yn rhagnodi’r amodau sydd i’w bodloni o dan baragraff 6(1)(b) o Atodlen 4ZA i Ddeddf Cyllid Llywodraeth Leol 1988.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, lluniwyd asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn. Gellir cael copi oddi wrth yr Is-adran Diwygio Cyllid Llywodraeth Leol, Llywodraeth Cymru, Parc Cathays, Caerdydd, CF10 3NQ.

(1)

1988 p. 41. Mewnosodwyd Atodlen 4ZA gan adran 1 o Ddeddf Ardrethu Annomestig 2023 (p. 53). Gweler paragraff 11 o Atodlen 4ZA am y diffiniad o “the appropriate national authority”. Gweler adran 146(6) am y diffiniad o “prescribed”.

(2)

O.S. 2000/1097 (Cy. 75), a ddiwygiwyd gan O.S. 2023/1229 (Cy. 217); mae offerynnau diwygio eraill ond nid yw’r un ohonynt yn berthnasol i’r Rheoliadau hyn.