Gorchymyn Grymuso Harbwr Saundersfoot 2011

Erthygl 12

ATODLEN 1 DATGANIAD DERBYN SWYDD GAN GOMISIYNWYR

COMISIYNWYR HARBWR SAUNDERSFOOT

Gorchymyn Grymuso Harbwr Saundersfoot 2011

Erthygl 15

ATODLEN 2 DARPARIAETHAU CYSYLLTIEDIG MEWN PERTHYNAS Å'R COMISIYNWYR

Penodi cadeirydd ac is-gadeirydd y Comisiynwyr

1.   Yn ddarostyngedig i baragraff 8, rhaid i'r Comisiynwyr fod â chadeirydd, a rhaid ei benodi gan y Comisiynwyr o blith y Comisiynwyr a benodwyd o dan erthygl 5(1) neu 11.

2.   Bydd y cadeirydd cyntaf a benodir o dan baragraff 1, yn ddarostyngedig i baragraff 8 ac oni fydd y cadeirydd yn ymddiswyddo fel cadeirydd neu'n peidio â bod yn Gomisiynydd, yn dal ei swydd hyd at ddiwedd cyfnod o dair blynedd ar ôl dyddiad y cyfansoddiad newydd.

3.   Yn ddarostyngedig i baragraff 8, bydd pob cadeirydd a benodir o dan baragraff 1, oni fydd y cadeirydd yn ymddiswyddo fel cadeirydd neu'n peidio â bod yn Gomisiynydd, yn dal ei swydd am gyfnod o dair blynedd.

4.   Rhaid i'r Comisiynwyr fod ag is-gadeirydd, a rhaid ei benodi gan y Comisiynwyr o blith y Comisiynwyr hynny a benodwyd o dan erthygl 5(1) neu 11.

5.   Rhaid penodi'r is-gadeirydd cyntaf a fydd mewn swydd ar ôl dyddiad y cyfansoddiad newydd cyn gynted ag y bo'n ymarferol ar ôl y dyddiad hwnnw ac, yn ddarostyngedig i baragraff 8 ac oni fydd yr is-gadeirydd yn ymddiswyddo fel is-gadeirydd neu'n peidio â bod yn Gomisiynydd, bydd yn parhau mewn swydd fel is-gadeirydd am gyfnod o dair blynedd o ddyddiad ei benodiad yn is-gadeirydd.

6.   Yn ddarostyngedig i baragraff 8, bydd pob is-gadeirydd a benodir o dan baragraff 4 oni fydd yr is-gadeirydd yn ymddiswyddo fel is-gadeirydd neu'n peidio â bod yn Gomisiynydd, yn dal ei swydd am gyfnod o dair blynedd.

7.—( 1) Os digwydd i swydd cadeirydd neu is-gadeirydd y Comisiynwyr fynd yn wag dros dro, rhaid i'r Comisiynwyr lenwi'r swydd wag o blith y Comisiynwyr hynny a benodwyd o dan erthygl 5(1) neu 11 mewn cyfarfod a gynhelir cyn gynted ag y bo'n ymarferol wedi i'r swydd fynd yn wag.

(2) Rhaid i Gomisiynydd a benodir i lenwi lle gwag dros dro yn swydd y cadeirydd neu'r is-gadeirydd o dan y paragraff hwn, oni fydd y Comisiynydd yn ymddiswyddo o'r swydd honno neu'n peidio â bod yn Gomisiynydd, ddal y swydd honno yn ystod gweddill y tymor y penodwyd y cadeirydd neu'r is-gadeirydd y llenwir ei le ar ei gyfer.

8.   Os bodlonir y Comisiynwyr y dylai'r cadeirydd neu'r is-gadeirydd beidio â dal swydd fel cadeirydd neu is-gadeirydd, cânt derfynu'r swydd honno a phenodi Comisiynydd arall yn gadeirydd neu'n is-gadeirydd yn ystod gweddill y tymor y penodwyd y cadeirydd neu'r is-gadeirydd blaenorol ar ei gyfer.

Cyfarfodydd o'r Comisiynwyr

9.—( 1) Rhaid i gyfarfod cyntaf y Comisiynwyr ar ôl dyddiad y cyfansoddiad newydd gael ei gynnull cyn gynted ag y bo'n ymarferol gan y cadeirydd, ar ddyddiad y caiff y cadeirydd ei benderfynu; a rhaid i'r cadeirydd wneud trefniadau i anfon hysbysiad o'r cyfarfod hwnnw drwy'r post at y Comisiynwyr.

(2) Rhaid i'r Comisiynwyr gyfarfod wyth gwaith o leiaf bob blwyddyn.

Gadael swydd fel Comisiynydd

10.   Caiff Comisiynydd ymddiswyddo ar unrhyw adeg drwy roi hysbysiad ysgrifenedig i'r cadeirydd.

Ailbenodi Comisiynwyr

11.—( 1) Yn ddarostyngedig i ddarpariaethau'r Atodlen hon, mae Comisiynydd sy'n ymadael yn gymwys i'w ailbenodi fel Comisiynydd oni fydd wedi ei ddatgymhwyso rhag dal swydd o dan erthygl 13.

(2) Nid yw Comisiynydd yn gymwys i'w ailbenodi fel Comisiynydd os ydyw, yn union cyn y dyddiad dan sylw, wedi dal swydd am dri thymor yn olynol, oni bai ei fod yn gadeirydd y Comisiynwyr.

(3) Nid yw cadeirydd y Comisiynwyr yn gymwys i'w ailbenodi fel Comisiynydd os yw'r cadeirydd, yn union cyn y dyddiad dan sylw, wedi dal swydd fel Comisiynydd am bedwar tymor yn olynol.

(4) At ddibenion y paragraff hwn, nid yw “tymor” (“term”) yn cynnwys—

(a) tymor y cyfeirir ato yn erthygl 8(3);

(b) gweddill tymor y penodwyd y Comisiynydd ynddo i lenwi swydd wag dros dro o dan erthygl 11; neu

(c) unrhyw dymor o wasanaeth gan y Comisiynydd cyn dyddiad y cyfansoddiad newydd.

Ailbenodi cadeirydd

12.—( 1) Nid yw cadeirydd y Comisiynwyr yn gymwys i'w ailbenodi fel cadeirydd os yw'r cadeirydd, yn union cyn y dyddiad dan sylw, wedi gwasanaethu fel cadeirydd am dri thymor yn olynol.

(2) At ddibenion y paragraff hwn, nid yw “tymor” (“term”) yn cynnwys—

(a) tymor y cyfeirir ato yn erthygl 8(3);

(b) gweddill tymor y penodwyd y Comisiynydd ynddo i lenwi lle gwag dros dro yn swydd y cadeirydd o dan baragraff 7; neu

(c) unrhyw dymor o wasanaeth gan y Comisiynydd fel cadeirydd cyn dyddiad y cyfansoddiad newydd.

Pwyllgorau

13.   Caiff y Comisiynwyr, yn gyson â'u dyletswyddau ac yn ddarostyngedig i ba bynnag amodau y tybiant sy'n briodol, ddirprwyo unrhyw rai o'u swyddogaethau (ac eithrio'r swyddogaethau a bennir yn is-baragraffau (a) i (f) o baragraff 9B o Atodlen 2 i Ddeddf 1964) i bwyllgor o'r Comisiynwyr.

Trafodion y Comisiynwyr a phwyllgorau

14.   Ni chaiff gweithredoedd a thrafodion y Comisiynwyr nac unrhyw bwyllgor o'r Comisiynwyr eu hannilysu gan unrhyw swydd wag yn eu mysg, na chan unrhyw ddiffyg ym mhenodiad, neu ddiffyg o ran cymhwystra ar gyfer penodiad, unrhyw berson fel Comisiynydd neu fel cadeirydd neu is-gadeirydd, y Comisiynwyr neu bwyllgor.

15.   Y cworwm gofynnol ar gyfer cyfarfod o'r Comisiynwyr yw tri.

16.—( 1) Os oes gan Gomisiynydd unrhyw fuddiant, uniongyrchol neu anuniongyrchol—

(a) mewn unrhyw gontract neu gontract arfaethedig y mae, neu y byddai'r Comisiynwyr yn barti ynddo, neu os yw'n gyfarwyddwr y cwmni neu'r corff y gwneir, neu y bwriedir gwneud, y contract gydag ef; neu

(b) mewn unrhyw fater arall y mae'r Comisiynwyr yn ymwneud ag ef,

rhaid i'r Comisiynydd ddatgan y buddiant hwnnw.

(2) Os yw Comisiynydd yn bresennol mewn cyfarfod o'r Comisiynwyr neu o unrhyw bwyllgor o'r Comisiynwyr lle y bwriedir ystyried contract neu fater arall y mae gan y Comisiynydd hwnnw fuddiant ynddo, rhaid i'r Comisiynydd—

(a) cyn gynted ag y bo'n ymarferol ar ôl cychwyn y cyfarfod hwnnw, ddatgelu'r buddiant hwnnw;

(b) peidio â phleidleisio ar unrhyw gwestiwn mewn perthynas â'r contract neu'r mater hwnnw; ac

(c) gadael y cyfarfod—

(i) ar unrhyw adeg, os yw'r Comisiynwyr sy'n bresennol, drwy benderfyniad, yn gofyn i'r Comisiynydd hwnnw wneud hynny; a

(ii) tra gwneir penderfyniad ar y contract neu'r mater hwnnw.

(3) Nid yw'r paragraff hwn yn gymwys i unrhyw fuddiant—

(a) sydd gan Gomisiynydd mewn perthynas â thalu ffioedd harbwr i'r Comisiynwyr;

(b) sy'n codi mewn perthynas â darparu gwasanaethau neu gyfleusterau harbwr sy'n effeithio ar y gymuned fasnachol yn gyffredinol;

(c) sydd gan Gomisiynydd fel cyflogai ymgymeriad cyfleustod cyhoeddus, neu fel cyfranddaliwr, ond nid cyfarwyddwr cwmni, oni bai bod y Comisiynydd yn dal mwy na phump y cant o gyfalaf cyfranddaliadau dyroddedig y cwmni hwnnw; neu

(ch) y mae'r Comisiynwyr sy'n bresennol yn y cyfarfod yn datgan drwy benderfyniad ei fod yn rhy bellennig.

17.   Bydd gan y person sy'n dal swydd fel is-gadeirydd ar y pryd holl bwerau'r cadeirydd, a chaiff arfer y pwerau hynny yn absenoldeb neu anallu'r cadeirydd.

18.   Mewn unrhyw gyfarfod o'r Comisiynwyr, os na fydd y cadeirydd na'r is-gadeirydd yn bresennol, rhaid i'r Comisiynwyr sy'n bresennol yn y cyfarfod ddewis un o'u nifer i fod yn gadeirydd y cyfarfod hwnnw.

19.—( 1) Rhaid i bob cwestiwn mewn cyfarfod o'r Comisiynwyr, neu o bwyllgor o'r Comisiynwyr, gael ei benderfynu drwy fwyafrif pleidleisiau'r Comisiynwyr sydd yn bresennol ac yn pleidleisio.

(2) Os yw niferoedd y pleidleisiau'n gyfartal ar unrhyw gwestiwn mewn unrhyw gyfarfod o'r Comisiynwyr, neu o bwyllgor o'r Comisiynwyr, bydd gan gadeirydd y cyfarfod ail bleidlais neu bleidlais fwrw, y caiff y cadeirydd ei bwrw dros neu yn erbyn y status quo.

Dilysu'r sêl a dogfennau eraill

20.—( 1) Pan osodir sêl y Comisiynwyr, rhaid dilysu hynny gyda llofnod cadeirydd y Comisiynwyr neu lofnod rhyw Gomisiynydd arall a awdurdodwyd gan y Comisiynwyr i ddilysu gosod y sêl, a llofnod unrhyw swyddog y Comisiynwyr a awdurdodwyd gan y Comisiynwyr i weithredu felly.

(2) Rhaid bod unrhyw hysbysiad, trwydded neu ddogfen arall a roddir neu a ddyroddir gan y Comisiynwyr, oni fynegir bwriad i'r gwrthwyneb, wedi ei awdurdodi neu ei hawdurdodi'n ddigonol os llofnodwyd yr hysbysiad, trwydded neu ddogfen arall gan swyddog y Comisiynwyr a awdurdodwyd yn briodol.

Cydnabyddiaeth y Comisiynwyr a'r Cadeirydd

21.—( 1) Caiff y Comisiynwyr dalu i bob Comisiynydd y cyfryw lwfansau a threuliau a benderfynir o bryd i'w gilydd gan y Comisiynwyr.

(2) Caiff y Comisiynwyr dalu i'r Cadeirydd pa bynnag gydnabyddiaeth resymol a benderfynant.

Cyffredinol

22.   Yn ddarostyngedig i ddarpariaethau'r Atodlen hon, ceir rheoleiddio gweithdrefn a busnes y Comisiynwyr ac unrhyw bwyllgor o'r Comisiynwyr ym mha bynnag fodd a benderfynir o bryd i'w gilydd gan y Comisiynwyr.

23.   Caiff y Comisiynwyr, o bryd i'w gilydd, benodi'r cyfryw bersonau yr ystyriant yn angenrheidiol neu'n ddymunol, ar gyfer ac mewn cysylltiad â chyflawni eu swyddogaethau, a thalu iddynt ba bynnag gydnabyddiaeth a ystyrir yn briodol gan y Comisiynwyr.

Erthygl 16

ATODLEN 3 Y TIR Y CAIFF Y COMISIYNWYR EI GAFFAEL DRWY ORFODAETH

Rhif y Plot	Arwynebedd, Disgrifiad a Lleoliad y Tir	Perchnogion neu Berchnogion Honedig	Prydleseion neu Brydleseion Honedig	Tenantiaid neu Denantiaid Honedig a Meddianwyr
1	16806.17 Metr Sgwâr Maes parcio, tirlunio, coed, prysglwyni, ffordd breifat, wal harbwr a gwaith carreg ar osgo, Ffôn BT, peiriant ATM HSBC	Comisiynwyr Harbwr Saundersfoot	BT Group plc	Mrs Rosemary Hayes Mr William T Cleevely Mr E J Codd Mr Phil Baker Enterprise Inns plc BT Group plc Mr a Mrs A M Williams (ar brydles) mewn perthynas â Bwyty'r Marina a mynedfa fflat Ms Janet Hilary Field a Mr Robert Dan Field mewn perthynas â hawliau mynediad ar gyfer Clwb Hwylio Saundersfoot Perchenogion Landfall Court mewn perthynas â hawliau mynediad ar gyfer Landfall Court, Mr a Mrs C James Ymddiriedolwyr Clwb Hwylio Saundersfoot
2	566.2 Metr Sgwâr Wal Harbwr a gwaith carreg ar osgo	Comisiynwyr Harbwr Saundersfoot Comisiynwyr Ystad y Goron		Mrs Rosemary R Hayes Mr William T Cleevely Mr E J Codd Mr Phil Baker
3	67.75 Metr Sgwâr Swyddfa harbwr, caban manwerthu a phalmant	Comisiynwyr Harbwr Saundersfoot		Mr Clive Thomas a Mrs Jean Thomas Mrs Rosemary R Hayes Mr William T Cleevely Mr E J Codd Mr Phil Baker
4	584.71 Metr Sgwâr Llawr caled a ddefnyddir i storio cychod ac i barcio ceir	Comisiynwyr Harbwr Saundersfoot		Mr David Ford Mrs Rosemary R Hayes Mr William T Cleevely Mr E J Codd Mr Phil Baker
5	869.43 Metr Sgwâr Llawr caled i barcio dingis (Clwb Hwylio Saundersfoot)	Comisiynwyr Harbwr Saundersfoot	Ymddiriedolwyr Clwb Hwylio Saundersfoot	Mrs Rosemary R Hayes Mr William T Cleevely Mr E J Codd Mr Phil Baker Ymddiriedolwyr Clwb Hwylio Saundersfoot
6	477.23 Metr Sgwâr Llithrfa'r harbwr	Comisiynwyr Harbwr Saundersfoot		Mrs Rosemary R Hayes Mr William T Cleevely Mr E J Codd Mr Phil Baker
7	1112.87 Metr Sgwâr Llawr caled a ddefnyddir i storio cychod ac i barcio ceir	Comisiynwyr Harbwr Saundersfoot		Mr David Ford Mrs Rosemary R Hayes Mr William T Cleevely Mr E J Codd Mr Phil Baker
8	2267.91 Metr Sgwâr Llifddorau harbwr	Comisiynwyr Harbwr Saundersfoot		Mrs Rosemary R Hayes Mr William T Cleevely Mr E J Codd Mr Phil Baker
9	16033 Metr Sgwâr Harbwr, waliau harbwr a gwaith carreg ar osgo	Comisiynwyr Harbwr Saundersfoot		Mrs Rosemary R Hayes Mr William T Cleevely Mr E J Codd Mr Phil Baker
10	198.87 Metr Sgwâr Adeilad clwb a lle newydd i barcio ceir (Clwb Hwylio Saundersfoot)	Comisiynwyr Harbwr Saundersfoot	Ymddiriedolwyr Clwb Hwylio Saundersfoot	Ymddiriedolwyr Clwb Hwylio Saundersfoot
11	71.66 Metr Sgwâr Toiledau cyhoeddus	Comisiynwyr Harbwr Saundersfoot		Cyngor Sir Penfro
12	2988.7 Metr Sgwâr Clogwyn, wal clogwyn, coed, prysglwyni a thir	Comisiynwyr Harbwr Saundersfoot		Mrs Rosemary R Hayes Mr William T Cleevely Mr E J Codd Mr Phil Baker
13	252.1 Metr Sgwâr Llawr caled a ddefnyddir i storio cychod ac i barcio ceir	Comisiynwyr Harbwr Saundersfoot		Mr David Ford Mrs Rosemary R Hayes Mr William T Cleevely Mr E J Codd Mr Phil Baker
14	27.16 Metr Sgwâr Mangre, cyn-farchnad bysgod a ddefnyddir fel swyddfa docynnau ar gyfer cychod (pleser) masnachol	Comisiynwyr Harbwr Saundersfoot		Mr P Parker
15	105.13 Metr Sgwâr Llawr caled a ddefnyddir i storio cychod ac i barcio ceir	Comisiynwyr Harbwr Saundersfoot		Mr David Ford Mrs Rosemary R Hayes Mr William T Cleevely Mr E J Codd Mr Phil Baker
16	299.55 Metr Sgwâr Llawr caled a ddefnyddir i storio cychod ac i barcio ceir	Comisiynwyr Harbwr Saundersfoot		Mr David Ford Mrs Rosemary R Hayes Mr William T Cleevely Mr E J Codd Mr Phil Baker
17	39.58 Metr Sgwâr Llawr caled a lle i barcio ceir	Comisiynwyr Harbwr Saundersfoot		Mr Graham Thomas (Jones & Teague) Mrs Rosemary R Hayes Mr William T Cleevely Mr E J Codd Mr Phil Baker

Erthygl 16

ATODLEN 4 PLAN O'R TIR Y CAIFF Y COMISIYNWYR EI GAFFAEL DRWY ORFODAETH

Erthygl 22

ATODLEN 5 MAP O DERFYNAU HARBWR SAUNDERSFOOT