Rheoliadau Cynhyrchion sy'n Dod o Anifeiliaid (Mewnforion Trydydd Gwledydd) (Cymru) 2005

RHAN 3 Darpariaethau sy'n Gymwys i Gynhyrchion yn Gyffredinol

Gwahardd cynhyrchion nad ydynt yn cydymffurfio

15.   Heb ragfarnu yn erbyn rheoliad 22 o Reoliadau Cynhyrchion Llaeth (Hylendid) 1995(1), ni chaiff neb gyflwyno cynnyrch nad yw'n cydymffurfio i mewn i Gymru o drydedd wlad, na chynnyrch nad yw'n cydymffurfio sy'n tarddu o drydedd wlad i mewn i Gymru o fan arall yn y tiriogaethau perthnasol—

(a) onid yw'n gynnyrch tramwy, neu

(b) onid yw ei sefydliad gyrchfan yn warws mewn parth rhydd, yn warws rydd neu'n warws y tollau sydd wedi'i chymeradwyo yn unol ag Erthygl 12(4)(b) o Gyfarwyddeb 97/78/EC, neu'n storfa longau sy'n cydymffurfio ag Erthygl 13 o Gyfarwyddeb 97/78/EC, a leolwyd (ym mhob achos) y tu allan i'r Deyrnas Unedig.

Gwahardd cyflwyno cynhyrchion ac eithrio wrth safleoedd arolygu ar y ffin

16.—( 1) Ni chaniateir cyflwyno unrhyw gynnyrch i Gymru o drydedd wlad ac eithrio wrth safle arolygu ar y ffin a ddynodwyd ac a gymeradwywyd ar gyfer gwiriadau milfeddygol ar y cynnyrch hwnnw.

(2) Ni chaniateir cyflwyno i Gymru unrhyw gynnyrch Erthygl 9, y mae'r safle arolygu ar y ffin ar gyfer ei gyflwyno wedi'i leoli y tu allan i'r Deyrnas Unedig, ac y mae'r safle arolygu ar y ffin ar gyfer ei gyrchfan wedi'i leoli yng Nghymru, ac eithrio wrth safle arolygu ar y ffin a ddynodwyd ac a gymeradwywyd ar gyfer gwiriadau milfeddygol ar y cynnyrch hwnnw.

(3) Bydd y rheoliad hwn yn cael ei orfodi—

(a) wrth bwyntiau mynediad gan y Comisiynwyr;

(b) mewn mangreoedd y cyfeiriwyd atynt yn rheoliad 4(1)(b) gan yr Asiantaeth; ac

(c) mewn unrhyw fan arall gan yr awdurdod lleol.

(4) Mewn achosion lle y mae swyddog awdurdod lleol, wrth arfer unrhyw swyddogaeth statudol, yn darganfod, wrth bwynt mynediad, lwyth neu gynnyrch y mae'r swyddog o'r farn y gallai fod wedi'i gyflwyno yn groes i'r rheoliad hwn, rhaid i'r swyddog hysbysu swyddog tollau a dal ei afael ar y llwyth neu'r cynnyrch nes bod swyddog tollau yn ei gymryd dan ei ofal.

(5) At ddibenion cymhwyso Deddf Rheoli Tollau Tramor a Chartref 1979(2) i gynhyrchion sy'n cael eu cyflwyno yn groes i'r rheoliad hwn, amser eu mewnforio fydd yr amser cyflwyno yn unol ag adran 5 o'r Ddeddf honno.

Hysbysu ymlaen llaw ynglyn â chyflwyno neu roi cynhyrchion gerbron

17.—( 1) Ni chaiff unrhyw berson—

(a) cyflwyno cynnyrch i Gymru o drydedd wlad, neu

(b) cyflwyno i Gymru gynnyrch Erthygl 9 y mae'r safle arolygu ar y ffin ar gyfer ei gyrchfan wedi'i leoli yng Nghymru,

oni bai bod hysbysiad o'i gyflwyno wedi'i roi yn unol â'r rheoliad hwn i'r milfeddyg swyddogol wrth safle arolygu ar y ffin a ddynodwyd ac a gymeradwywyd ar gyfer gwiriadau milfeddygol ar y cynnyrch hwnnw a bod copi ohono wedi'i anfon i swyddfa'r Comisiynwyr sy'n gyfrifol am yr ardal y mae'r safle arolygu hwnnw ar y ffin wedi'i leoli ynddi.

(2) Pan fydd y safle arolygu ar y ffin ar gyfer cyflwyno cynnyrch Erthygl 9 a'r safle arolygu ar y ffin ar gyfer cyrchfan cynnyrch Erthygl 9 ill dau yng Nghymru, ni chaiff neb roi'r cynnyrch gerbron mewn safle arolygu ar y ffin oni bai bod hysbysiad o'i roi gerbron wedi'i roi yn unol â'r rheoliad hwn i'r milfeddyg swyddogol wrth safle arolygu ar y ffin ar gyfer cyrchfan a ddynodwyd ac a gymeradwywyd ar gyfer gwiriadau milfeddygol ar y cynnyrch hwnnw a bod copi o'r hysbysiad hwnnw wedi'i anfon i swyddfa'r Comisiynwyr sy'n gyfrifol am yr ardal y mae'r safle arolygu hwnnw ar y ffin wedi'i leoli ynddi.

(3) Rhaid i'r hysbysiad y cyfeiriwyd ato ym mharagraffau (1) a (2)

(a) bod ar y ffurf a geir yn Rhan 1 o'r ddogfen fynediad filfeddygol gyffredin;

(b) cael ei gyflenwi ar ffurf electronig;

(c) bod yn Gymraeg neu yn Saesneg a hefyd yn un o ieithoedd swyddogol y gyrchwlad yn y tiriogaethau perthnasol y cyfeirir atynt yn yr hysbysiad, os gwlad wahanol i'r Deyrnas Unedig yw'r gyrchwlad;

(ch) cyrraedd y safle arolygu ar y ffin—

(i) o leiaf chwe awr gwaith, yn achos cynnyrch sy'n dod i mewn i'r wlad ar awyren, a

(ii) o leiaf un diwrnod gwaith, mewn unrhyw achos arall,

cyn bod y cynnyrch yn cael ei roi i'r milfeddyg swyddogol wrth y safle arolygu ar y ffin yn unol â rheoliad 18; ac

(d) yn achos hybsysiad a roddwyd i safle arolygu ar y ffin ar gyfer y gyrchfan, pennu pa wiriadau sydd wedi'u gwneud wrth y safle arolygu ar y ffin ar gyfer cyflwyno.

(4) Ym mharagraff (3) ystyr “oriau gwaith” (“working hours”) a “diwrnod gwaith” (“working day”) yw oriau a diwrnod pan fydd y safle arolygu ar y ffin ar agor ar gyfer rhoi cynhyrchion i'r milfeddyg swyddogol yn unol â rheoliad 18.

Rhoi cynhyrchion gerbron mewn safleoedd arolygu ar y ffin

18.—( 1) Rhaid i unrhyw berson sy'n gyfrifol am gynnyrch sy'n cael ei gyflwyno i Gymru o drydedd wlad, neu am gynnyrch Erthygl 9 y mae'r safle arolygu ar y ffin ar gyfer ei gyrchfan wedi'i leoli yng Nghymru ac sy'n cael ei gyflwyno i Gymru, roi'r cynnyrch a'r dogfennau gofynnol, yn ddi-oed, i'r milfeddyg swyddogol yng nghyfleuster archwilio'r safle arolygu ar y ffin y rhoddwyd iddo hysbysiad o gyflwyno neu roi'r cynnyrch gerbron yn y man hwnnw yn unol â rheoliad 17, neu sicrhau bod y rheini'n cael eu rhoi iddo.

(6) Pan fydd safle arolygu ar y ffin ar gyfer cyflwyno cynnyrch Erthygl 9 wedi'i leoli yn y Deyrnas Unedig a'r safle arolygu ar y ffin ar gyfer ei gyrchfan wedi'i leoli yng Nghymru, rhaid i unrhyw berson sy'n gyfrifol am y cynnyrch ar ôl ei symud o'r safle arolygu ar y ffin ar gyfer ei gyflwyno roi'r cynnyrch a'r dogfennau gofynnol, yn ddi-oed, i'r milfeddyg swyddogol yng nghyfleuster archwilio'r safle arolygu ar y ffin ar gyfer y gyrchfan y rhoddwyd hysbysiad o roi'r cynnyrch iddo yn unol â rheoliad17, neu sicrhau bod y rheini'n cael eu rhoi iddo.

(7) Rhaid i berson sy'n rhoi cynnyrch gerbron, ac eithrio cynnyrch tramwy neu gynnyrch y mae Rhan 8 yn gymwys iddo, yn unol â pharagraff (1) neu (2), roi'r dogfennau gofynnol sy'n ymwneud ag ef ac sydd wedi'u llunio yn Gymraeg neu yn Saesneg.

(8) Rhaid i berson sydd, yn unol â pharagraff (1) neu (2), yn rhoi gerbron gynnyrch tramwy neu gynnyrch y mae Rhan 8 yn gymwys iddo ynghyd â dogfen ofynnol mewn iaith heblaw Cymraeg neu Saesneg, roi ar yr un pryd gyfieithiad i'r Gymraeg neu i'r Saesneg o'r ddogfen ofynnol, a rhaid i'r cyfieithiad hwnnw fod yn un y mae arbenigwr â chymhwyster priodol wedi cadarnhau ei fod yn gyfieithiad cywir.

Gwiriadau milfeddygol

19.—( 1) Yn ddarostyngedig, yn achos cynhyrchion a drawslwythwyd, i reoliad 38, rhaid i unrhyw berson y mae'n ofynnol iddo yn rhinwedd rheoliad 18 gyflwyno cynnyrch a'i ddogfennau gofynnol, neu sicrhau eu bod yn cael eu cyflwyno i filfeddyg swyddogol, ganiatáu i'r milfeddyg swyddogol, neu gynorthwyydd a benodwyd yn unol â rheoliad 6(1)(b) neu 6(2)(c), gyflawni ar y cynnyrch neu ar y dogfennau gofynnol, yn ôl y digwydd—

(a) gwiriad dogfennol,

(b) gwiriad adnabod, ac

(c) yn ddarostyngedig i reoliadau 41, 46 a 50, gwiriad ffisegol,

a rhaid iddo roi i'r milfeddyg swyddogol neu i'r cynorthwyydd unrhyw gymorth y mae'n rhesymol iddynt ofyn amdano i'w galluogi i gyflawni unrhyw un o'r gwiriadau hynny.

(2) Pan fydd sampl o gynnyrch yn cael ei gymryd wrth gynnal gwiriad ffisegol, ni chaiff neb symud y cynnyrch neu beri iddo gael ei symud o'r safle arolygu ar y ffin lle y cafodd ei gyflwyno nes bod y milfeddyg swyddogol wedi awdurdodi ei symud drwy ddyroddi Rhan 2 o'r ddogfen fynediad filfeddygol gyffredin ar gyfer y cynnyrch neu ar gyfer y llwyth neu'r rhanlwyth sy'n cynnwys y cynnyrch.

(3) Hyd oni symudir y cynnyrch yn unol â pharagraff (2) rhaid i'r person sy'n gyfrifol am y llwyth sy'n cynnwys y cynnyrch ei storio o dan oruchwyliaeth y milfeddyg swyddogol yn y man ac o dan yr amodau a gyfarwyddir gan y milfeddyg swyddogol a thalu costau ei storio felly.

Dogfen fynediad filfeddygol gyffredin i fynd gyda llwyth

20.—( 1) Rhaid i'r person sy'n gyfrifol am lwyth neu ranlwyth y mae Rhan 2 o'r ddogfen fynediad filfeddygol gyffredin wedi'i dyroddi mewn perthynas ag ef, ac unrhyw gludydd sydd â gofal drosto am y tro, sicrhau bod y ddogfen fynediad filfeddygol gyffredin yn mynd gyda'r llwyth neu'r rhanlwyth—

(a) yn achos llwyth neu ranlwyth y bwriedir ei fewnforio, ac yn ddarostyngedig i reoliad 37(3), hyd y funud y bydd y llwyth neu'r rhanlwyth, ar ôl ei fewnforio, yn cyrraedd mangre lle y caiff cynhyrchion eu storio, eu prosesu, eu trafod, eu prynu neu eu gwerthu, a

(b) ym mhob achos arall hyd nes na fydd y llwyth neu'r rhanlwyth yn ddarostyngedig i oruchwyliaeth gan awdurdodau'r tollau, o fewn yr ystyr a geir yn Erthygl 4(13) o God y Tollau.

(2) Rhaid i'r person sydd, at ddibenion ei fusnes, yn meddiannu'r fangre y cyfeirir ati yn is-baragraff (1)(a) gymryd meddiant o'r ddogfen fynediad filfeddygol gyffredin y cyfeirir ati ym mharagraff (1) a dal ei afael ynddi ar y fangre am gyfnod o flwyddyn yn cychwyn ar y diwrnod ar ôl i'r ddogfen gyrraedd yno.

Cynhyrchion sy'n methu gwiriadau milfeddygol

21.—( 1) Yn ddarostyngedig i reoliad 22, mae'r rheoliad hwn yn gymwys—

(a) pan fydd y milfeddyg swyddogol, yn dilyn gwiriad milfeddygol wrth safle arolygu ar y ffin, yn penderfynu bod cynnyrch (ac eithrio cynnyrch tramwy sy'n bodloni gofynion Rhan 7 neu gynnyrch y cyfeiriwyd at ei sefydliad gyrchfan yn Rheoliad 15(b)) yn gynnyrch nad yw'n cydymffurfio, neu fod rhyw afreoleidd-dra arall mewn perthynas â'r cynnyrch; a

(b) pan fydd swyddog awdurdodedig yn penderfynu, yn dilyn gwiriad milfeddygol ar gynnyrch sydd wedi'i leoli i ffwrdd o safle arolygu ar y ffin (ac eithrio cynnyrch tramwy sy'n bodloni gofynion Rhan 7 neu gynnyrch y cyfeiriwyd at ei sefydliad gyrchfan yn Rheoliad 15(b)), yn penderfynu bod y cynnyrch yn gynnyrch nad yw'n cydymffurfio.

(2) Os yw is-baragraff (1)(a) yn gymwys, rhaid i'r milfeddyg swyddogol gyflwyno hysbysiad ysgrifenedig i'r person sy'n gyfrifol am y cynnyrch, ac os bydd is-baragraff (1)(b) yn gymwys, rhaid i'r swyddog awdurdodedig gyflwyno hysbysiad ysgrifenedig i'r person sydd yn ei farn ef â gofal dros y cynnyrch, yn ei gwneud yn ofynnol iddo naill ai—

(a) anfon y cynnyrch ymlaen o'r safle arolygu ar y ffin, neu, os bydd is-baragraff (1)(b) yn gymwys, ei anfon ymlaen o safle arolygu ar y ffin, a nodir yn yr hysbysiad, a hynny drwy'r dull cludo a ddefnyddiwyd i'w gyflwyno i Gymru, i gyrchfan y cytunwyd arni gyda'r milfeddyg swyddogol neu'r swyddog awdurdodedig, sydd wedi'i lleoli mewn trydedd wlad, a hynny o fewn cyfnod o drigain o ddiwrnodau yn cychwyn ar y diwrnod ar ôl cyflwyno'r hysbysiad; neu

(b) gwaredu'r cynnyrch yn unol â Rheoliad (EC) Rhif 1774/2002 yn y cyfleusterau a ddarparwyd at y diben hwnnw ac sydd agosaf at y safle arolygu ar y ffin neu, os yw is-baragraff (1)(b) yn gymwys, sydd agosaf at leoliad y cynnyrch.

(3) Rhaid gwaredu'r cynnyrch yn unol ag is-baragraff (2)(b)—

(a) pan fydd ei anfon ymlaen wedi'i ragwahardd ar sail iechyd anifeiliaid neu iechyd y cyhoedd oherwydd canlyniadau gwiriad milfeddgol, neu drwy unrhyw ofyniad o ran iechyd anifeiliaid neu iechyd y cyhoedd sydd wedi'i osod mewn offeryn Cymunedol sydd mewn grym ar y dyddiad y cafodd y Rheoliadau hyn eu gwneud, neu sydd fel arall yn amhosibl; neu

(b) pan fydd y cyfnod o drigain o ddiwrnodau y cyfeiriwyd ato yn is-baragraff (2)(a) wedi mynd heibio; neu

(c) pan fydd y person sy'n gyfrifol am y cynnyrch neu, os yw is-baragraff (1)(b) yn gymwys, perchennog y cynnyrch yn cytuno ar unwaith i'w waredu.

(4) O ran cynnyrch y mae hysbysiad wedi'i gyflwyno mewn perthynas ag ef yn unol â pharagraff 2, rhaid i'r person sy'n gyfrifol amdano, neu, os yw is-baragraff (1)(b) yn gymwys, ei berchennog, sicrhau ei fod yn cael ei storio hyd oni chaiff ei anfon ymlaen neu ei waredu o dan oruchwyliaeth y milfeddyg swyddogol neu'r swyddog awdurdodedig yn y fan neu o dan yr amodau a gyfarwyddir ganddo yn yr hysbysiad.

(5) Ym mharagraff (1)(a) “afreoleidd-dra arall” mewn perthynas â chynnyrch yw—

(a) ei gyflwyno i Gymru o drydedd wlad, neu ei roi gerbron mewn safle arolygu ar y ffin ar gyfer cyrchfan yng Nghymru, heb fod hysbysiad wedi'i roi yn unol â rheoliad 17;

(b) unrhyw wybodaeth ffug neu gamarweiniol sydd wedi'i chynnwys mewn hysbysiad a roddwyd yn unol â rheoliad 17;

(c) unrhyw wybodaeth ffug neu gamarweiniol a roddwyd yn unol â rheoliad 45 neu 49;

(ch) unrhyw gamgymeriad, hepgoriad neu wybodaeth ffug neu gamarweiniol mewn dogfen ofynnol, ac unrhyw anghysondeb rhwng dogfen ofynnol ac—

(i) yr hysbysiad a roddwyd yn unol â rheoliad 17 o gyflwyno neu roi'r cynnyrch gerbron, neu

(ii) y cynnyrch ei hun, neu

(iii) y seliau, y stampiau, y marciau neu'r labeli ar y cynnyrch, ar y llwyth sy'n cynnwys y cynnyrch neu ar y cynhwysydd sy'n dal y cynnyrch neu'r llwyth;

(d) unrhyw ddiffyg yn y cynnyrch sy'n ei wneud yn anffit i'w ddefnyddio at y diben y bwriedir ef ar ei gyfer, yn ôl y dogfennau gofynnol;

(dd) unrhyw ddiffyg yn y seliau, y stampiau, y marciau neu'r labeli y cyfeirir atynt yn is-baragraff (5)(ch)(iii) gan gynnwys, yn achos cynnyrch sydd wedi'i becynnu, unrhyw doriad o'r gofynion labelu sydd wedi'u gosod ar gyfer y cynnyrch hwnnw mewn unrhyw gyfarwyddeb, penderfyniad neu reoliad a restrir yn Atodlen 1;

(e) yn achos cynnyrch y bwriedir ei fewnforio, unrhyw awgrym yn y dogfennau gofynnol nad yw'r cynnyrch yn cydymffurfio â'r amodau mewnforio; ac

(f) yn achos cynnyrch nad yw'n cydymffurfio ac sy'n gynnyrch tramwy, neu gynnyrch y cyfeirir at ei sefydliad gyrchfan yn rheoliad 15(b), unrhyw doriad o'r gofynion a osodir ar gyfer y cynnyrch hwnnw nad yw'n cydymffurfio mewn unrhyw gyfarwyddeb, penderfyniad neu reoliad a restrir yn Atodlen 1.

(6) Caiff unrhyw berson y mae penderfyniad y cyfeirir ato yn is-baragraff (1)(a) neu (1)(b) yn ei dramgwyddo apelio i lys ynadon o fewn un mis i ddyddiad y penderfyniad trwy gyfrwng cwyn am orchymyn a bydd Deddf Llysoedd Ynadon 1980(3) yn gymwys i'r achos.

(7) Tra byddir yn aros am benderfyniad ar apêl yn unol â pharagraff (6) bydd paragraff (4) yn gymwys i ddull storio'r cynnyrch o dan sylw.

Trin cynhyrchion fel sgil-gynhyrchion anifeiliaid

22.—( 1) Os bydd y milfeddyg swyddogol neu'r swyddog awdurdodedig o'r farn nad yw cynnyrch y mae rheoliad 21 yn gymwys iddo yn peri unrhyw risg i iechyd anifail neu iechyd y cyhoedd, caiff awdurdodi defnyddio'r cynnyrch yn unol â rheoliad 26 o Reoliadau Sgil-gynhyrchion Anifeiliaid 2003(4) er gwaethaf paragraffau (2), (3) a (4) o reoliad 21.

(2) Rhaid i'r awdurdodiad fod yn ysgrifenedig, caniateir ei wneud yn ddarostyngedig i amodau, a'i ddiwygio, ei atal neu ei ddirymu drwy hysbysiad ysgrifenedig ar unrhyw bryd.

(3) Caiff yr awdurdodiad bennu p'un o'r defnyddiau yn rheoliad 26 o Reoliadau Sgil-gynhyrchion Anifeiliaid 2003 a ganiateir.

Cynhyrchion sy'n cynnwys sylweddau anawdurdodedig a gweddillion gormodol

23.—( 1) Yn y rheoliad hwn—

(a) ystyr “terfyn gweddillion uchaf” yw terfyn gweddillion uchaf a restrir yn Atodiad I neu Atodiad III i Reoliad y Cyngor (EEC) Rhif 2377/90 (sy'n gosod gweithdrefn Gymunedol ar gyfer sefydlu terfynau gweddillion uchaf cynhyrchion meddyginiaethol milfeddygol mewn bwydydd sy'n dod o anifeiliaid)(5);

(b) mae i “sylwedd anawdurdodedig” yr ystyr sydd i “unauthorised substance or product” yng Nghyfarwyddeb y Cyngor 96/23/EC (ar fesurau i fonitro sylweddau penodol a'u gweddillion mewn anifeiliaid byw a chynhyrchion anifeiliaid a diddymu Cyfarwyddebau 85/358/EEC a 86/469/EEC a Phenderfyniadau 89/187/EEC a 91/664/EEC)(6).

(2) Mae'r rheoliad hwn yn gymwys pan fo gwiriad milfeddygol ar lwyth o sefydliad tarddiad penodol mewn trydedd wlad yn datgelu bod sylwedd anawdurdodedig yn bresennol, neu'n datgelu yr aethpwyd dros y terfyn gweddillion uchaf, ond nad oes unrhyw fesurau Cymunedol wedi'u mabwysiadu eto mewn ymateb i hyn.

(3) dan yr amgylchiadau a ddisgrifir ym mharagraff (2), bydd paragraffau (4), (5), (6) a (7) yn gymwys i'r rheini a gyflwynir i Gymru o blith y deg llwyth nesaf a gyflwynir i'r Deyrnas Unedig o'r sefydliad hwnnw.

(4) Rhaid i'r milfeddyg swyddogol wrth y safle arolygu ar y ffin lle y mae unrhyw lwyth o'r fath yn cael ei gyflwyno, ei gymryd dan ei ofal, drwy gyflwyno hysbysiad ysgrifenedig i'r person sy'n gyfrifol am y llwyth, a gwirio'r gweddillion yn y llwyth drwy gymryd sampl gynyrchioliadol o'r cynhyrchion sy'n ffurfio'r llwyth hwnnw a'i ddadansoddi.

(5) Pan gyflwynir hysbysiad o dan baragraff (4), rhaid i'r person sy'n gyfrifol am y llwyth roi yng ngofal y milfeddyg swyddogol flaendal neu warant sy'n ddigonol i sicrhau bod pob taliad sy'n daladwy yn unol â Rhan 10 am wiriadau milfeddygol a gyflawnwyd ar y llwyth, gan gynnwys cymryd samplau, ac unrhyw brawf neu ddadansoddiad labordy a wnaed ar unrhyw sampl a gymerwyd, yn cael eu talu.

(6) Os bydd unrhyw wiriad milfeddygol a gyflawnwyd ar y llwyth yn datgelu bod sylweddau anawdurdodedig neu eu gweddillion yn bresennol neu'n datgelu yr aethpwyd dros ben y terfyn gweddillion uchaf rhaid i'r milfeddyg swyddogol—

(a) rhoi awgrym clir o'r rhesymau dros ei wrthod drwy arnodi'r dogfennau gofynnol sy'n ymwneud â'r llwyth; ac

(b) anfon ymlaen lwyth neu ranlwyth y mae'r milfeddyg swyddogol yn barnu bod presenoldeb sylweddau anawdurdodedig neu eu gweddillion neu weddillion gormodol yn effeithio arno, ynghyd â'r dogfennau gofynnol, i'r drydedd wlad y mae'n tarddu ohoni.

(7) Rhaid i gostau anfon ymlaen a chludo'r llwyth neu'r rhanlwyth i'r drydedd wlad y mae'n tarddu ohoni gael eu talu gan yr anfonydd y mae ei enw yn ymddangos ar yr hysbysiad o gyflwyno'r llwyth a roddwyd yn unol â rheoliad 17.

Llwythi a chynhyrchion sy'n cael eu cyflwyno'n anghyfreithlon

24.—( 1) Mae'r rheoliad hwn yn gymwys—

(a) pan fydd llwyth neu gynnyrch yn cael ei gyflwyno i Gymru o drydedd wlad ond nad yw'n cael ei roi gerbron yn unol â rheoliad 18;

(b) pan fydd llwyth neu gynnyrch sy'n tarddu o drydedd wlad wedi'i gyflwyno i Gymru o rywle arall yn y tiriogaethau perthnasol, ond nad yw wedi'i roi gerbron mewn safle arolygu ar y ffin yno;

(c) pan fydd y safle arolygu ar y ffin ar gyfer y gyrchfan i lwyth o gynhyrchion Erthygl 9 yng Nghymru ond nad yw'r llwyth yn cael ei roi gerbron yno yn unol â rheoliad 18(1); ac

(ch) pan fydd llwyth sy'n cael ei gyflwyno i Gymru yn cael ei roi i'r milfeddyg swyddogol wrth safle arolygu ar y ffin nad yw wedi'i ddynodi na'i gymeradwyo ar gyfer gwiriadau milfeddygol ar y cynhyrchion sy'n ffurfio'r llwyth hwnnw.

(2) O dan yr amgylchiadau a ddisgrifir ym mharagraff(1)(a), (b) ac (c) rhaid i swyddog awdurdodedig, drwy hysbysiad ysgrifenedig a gyflwynir i'r person sydd ym marn y swyddog â gofal dros y llwyth, ac, o dan yr amgylchiadau a ddisgrifiwyd yn is-baragraff (1)(ch), y milfeddyg swyddogol, drwy hysbysiad ysgrifenedig a gyflwynir i'r person sy'n gyfrifol amdano, gymryd y llwyth neu'r cynnyrch o dan ei ofal a naill ai,

(a) ei anfon ymlaen, drwy'r dull cludo a ddefnyddiwyd i'w gyflwyno gyntaf i'r tiriogaethau perthnasol, i gyrchfan y cytunwyd arni gyda'r perchennog, o dan yr amgylchiadau a ddisgrifiwyd yn is-baragraffau(1)(a), (b) ac (c), neu gyda'r person sy'n gyfrifol am y llwyth, o dan yr amgylchiadau a ddisgrifiwyd yn is-baragraff (1)(ch), a honno'n gyrchfan a leolir mewn trydedd wlad o fewn cyfnod o drigain o ddiwrnodau yn cychwyn ar y diwrnod ar ôl diwrnod cyflwyno'r hysbysiad; neu

(b) ei waredu fel pe bai'n ddeunydd Categori 1 o dan Reoliad (EC) Rhif 1774/2002 yn y cyfleusterau a ddarparwyd at y dibenion hynny ac sydd agosaf at y fan lle y mae'r swyddog awdurdodedig neu'r milfeddyg swyddogol yn ei gymryd dan ei ofal.

Cynhyrchion sy'n beryglus i iechyd anifeiliaid neu i iechyd y cyhoedd

25.   Os yw milfeddyg swyddogol neu swyddog awdurdodedig o'r farn bod llwyth neu gynnyrch o drydedd wlad yn peri risg i iechyd anifeiliaid neu iechyd y cyhoedd rhaid iddo, drwy hysbysiad ysgrifenedig a gyflwynir i'r person y mae'n ymddangos ei fod â gofal dros y llwyth neu'r cynnyrch, ei gymryd o dan ei ofal a'i waredu yn unol â rheoliad 24(2)(b).

Tor-cyfraith difrifol neu fynych

26.—( 1) Pan fydd Cynulliad Cenedlaethol Cymru neu'r Asiantaeth yn dod i'r casgliad rhesymol, ar sail canlyniadau gwiriadau milfeddygol, fod cynhyrchion o drydedd wlad benodol, rhan benodol o drydedd wlad neu sefydliad penodol mewn trydedd wlad yn gysylltiedig â thor-cyfraith difrifol neu fynych o unrhyw ofyniad a osodwyd mewn offeryn Cymunedol sy'n ymwneud ag iechyd anifeiliaid neu ag iechyd y cyhoedd, bydd y rheoliad hwn yn gymwys i'r rhai a gyflwynir i Gymru o blith y deg llwyth nesaf a gyflwynwyd i'r Deyrnas Unedig o'r drydedd wlad honno, o'r rhan honno o drydedd wlad neu o'r sefydliad hwnnw, yn ôl y digwydd.

(2) Rhaid i'r milfeddyg swyddogol wrth y safle arolygu ar y ffin lle y mae unrhyw lwyth o'r fath yn cael ei gyflwyno, drwy hysbysiad ysgrifenedig a gyflwynir i'r person sy'n gyfrifol am y llwyth, ei gymryd o dan ei ofal a chyflawni gwiriad ffisegol ohono, gan gynnwys cymryd samplau a gwneud profion a dadansoddiadau labordy.

(3) Pan fydd hysbysiad wedi'i gyflwyno o dan baragraff (2), rhaid i'r person sy'n gyfrifol am y llwyth roi yng ngofal y milfeddyg swyddogol flaendal neu warant sy'n ddigonol i sicrhau bod pob taliad sy'n daladwy yn unol â Rhan 10 am wiriadau milfeddygol a gyflawnwyd ar y llwyth, gan gynnwys cymryd samplau, ac unrhyw brawf neu ddadansoddiad labordy a wnaed ar unrhyw sampl a gymerwyd, yn cael eu talu.

(4) Os bydd unrhyw wiriad milfeddygol sy'n cael ei gyflawni ar y llwyth yn datgelu bod unrhyw ofyniad a osodwyd mewn offeryn Cymunedol ynglyn ag iechyd anifeiliaid neu iechyd y cyhoedd wedi'i dorri, rhaid i'r milfeddyg swyddogol naill ai anfon y llwyth ymlaen neu ei waredu yn unol â rheoliad 21(2).

Annilysu dogfennau milfeddygol

27.   Pan fydd milfeddyg swyddogol neu swyddog awdurdodedig yn cyflwyno hysbysiad sy'n ei gwneud yn ofynnol bod cynnyrch yn cael ei anfon ymlaen yn unol â rheoliad 21(2)(a), neu'n cymryd llwyth o dan ei ofal yn unol â rheoliad 24(2), rhaid i unrhyw berson sy'n meddu ar y dogfennau gofynnol sy'n ymwneud â'r cynnyrch neu'r llwyth hwnnw neu sy'n eu rheoli eu cyflwyno ar unwaith i'r milfeddyg swyddogol neu'r swyddog awdurdodedig, yn ôl y digwydd, i'w hannilysu.

Costau mewn perthynas â chynhyrchion sy'n cael eu hanfon ymlaen neu eu gwaredu

28.—( 1) Rhaid i'r person sy'n gyfrifol am y cynnyrch neu'r llwyth o dan sylw neu, os oes hysbysiad wedi'i gyflwyno i'r person y mae'n ymddangos ei fod â gofal dros y cynnyrch neu'r llwyth, perchennog y cynnyrch neu'r llwyth, neu'r person y mae hysbysiad atafaelu yn unol â Deddf Rheoli Tollau Tramor a Chartref 1979 wedi'i gyflwyno iddo, dalu ar ofyn gostau storio, cludo, anfon ymlaen a gwaredu unrhyw gynnyrch neu lwyth sy'n cael ei anfon ymlaen neu ei waredu yn unol â rheoliad 21, 24, 25 neu 26, neu unrhyw bwerau sy'n cael eu harfer o dan Ddeddf Rheoli Tollau Tramor a Chartref 1979 wrth orfodi rheoliad rheoliad 16.

(2) Rhaid i unrhyw gost y cyfeiriwyd ati ym mharagraff (1) ac sy'n cael ei thalu gan filfeddyg swyddogol, swyddog awdurdodedig, Cynulliad Cenedlaethol Cymru, awdurdod lleol, yr Asiantaeth neu'r Comisiynwyr gael ei had-dalu, os gofynnir iddo wneud hynny, gan y person sy'n gyfrifol am y cynnyrch neu'r llwyth neu gan berchennog y cynnyrch neu'r llwyth hwnnw.

(1)

O.S. 1995/1086, fel y'i diwygiwyd gan O.S. 1995/1763, 1996/1499, 1699, 1997/1729, 1998/2424, 2000/656 ac, o ran Cymru, gan y Rheoliadau hyn.

(2)

1979 p. 2.

(3)

1980 p. 43.

(4)

O.S. 2003/1482.

(5)

OJ Rhif L224, 18.8.90, t.1, a hynny fel y'i newidiwyd ddiwethaf gan Reoliad y Cyngor (EC) Rhif 1873/2003 (OJ Rhif L275, 25.10.03, t.9).

(6)

OJ Rhif L125, 23.5.96, t.10, fel y'i diwygiwyd ddiwethaf gan Reoliad y Cyngor (EC) Rhif 806/2003 (OJ Rhif L122, 16.5.03, t.1).