Rheoliadau Deddf Plant 1989, Deddf Safonau Gofal 2000 a Deddf Mabwysiadu a Phlant 2002 (Diwygiadau Amrywiol) (Cymru) 2009

RHAN 2 Gwarchod plant a gofal dydd

Diwygio Rheoliadau Gwarchod Plant a Gofal Dydd (Cymru) 2002

2.—( 1) Mae Rheoliadau Gwarchod Plant a Gofal Dydd (Cymru) 2002(1) yn cael eu diwygio fel a ganlyn.

(2) Yn rheoliad 4 (y person cofrestredig — ei addasrwydd)—

(a) yn lle paragraff 3(c) rhodder—

“(c) bod gwybodaeth neu ddogfennaeth lawn a boddhaol, yn ôl fel y digwydd, ar gael mewn perthynas â'r person—

(i) ac eithrio os yw paragraff (5) yn gymwys, mewn cysylltiad â phob un o'r materion a bennir ym mharagraffau 1 i 6 o Atodlen 2;

(ii) os yw paragraff (5) yn gymwys, mewn cysylltiad â phob un o'r materion a bennir ym mharagraffau 1, 2 a 4 o Atodlen 2.”;

(b) hepgorer paragraff (4).

(3) Yn rheoliad 4B(2) (y person â gofal — ei addasrwydd)—

(a) yn lle paragraff (3)(c) rhodder—

“(c) bod gwybodaeth neu ddogfennaeth lawn a boddhaol, yn ôl y digwydd, ar gael mewn perthynas â'r person mewn cysylltiad â phob un o'r materion a bennir ym mharagraffau 1 i 6 o Atodlen 2.”;

(b) hepgorer paragraff (4).

(4) Yn rheoliad 16 (addasrwydd gweithwyr)—

(a) yn lle paragraff (2)(ch) rhodder—

“(ch) bod gwybodaeth neu ddogfennaeth lawn a boddhaol, yn ôl fel y digwydd, ar gael mewn perthynas â'r person mewn cysylltiad â phob un o'r materion a bennir ym mharagraffau 1 i 6 o Atodlen 2.”;

(b) ym mharagraff (4)(b), yn lle'r geiriau “oni bai bod paragraff (5) yn gymwys” rhodder “oni bai bod paragraff (5) neu (5A) yn gymwys.”;

(c) yn lle paragraff (5)(b) rhodder—

“(b) y cafwyd gwybodaeth lawn a boddhaol mewn perthynas â'r person hwnnw mewn cysylltiad â'r materion a bennir ym mharagraffau 1 a 2 o Atodlen 2.”.

(5) Yn Atodlen 2 (yr wybodaeth sy'n ofynnol mewn perthynas â phersonau sy'n ceisio gweithredu fel gwarchodwyr plant neu ddarparwyr gofal dydd neu'n ceisio gweithio drostynt)—

(a) yn lle paragraff 2 rhodder—

“2.   Naill ai—

(a) os oes angen y dystysgrif at ddiben sy'n ymwneud â chofrestru o dan Ran 10A o'r Ddeddf neu os yw'r swydd yn dod o fewn rheoliad 5A o Reoliadau Deddf yr Heddlu 1997 (Cofnodion Troseddol) 2002(3) tystysgrif cofnod troseddol fanwl a ddyroddwyd o dan adran 113B o Ddeddf yr Heddlu 1997(4) ac sy'n cynnwys gwybodaeth am addasrwydd mewn perthynas â phlant (o fewn ystyr adran 113BA(2)(5) o'r Ddeddf honno) ac y mae llai na thair blynedd wedi mynd heibio ers ei dyroddi; neu

(b) mewn unrhyw achos arall, tystysgrif cofnod troseddol a ddyroddwyd o dan adran 113A(6) o Ddeddf yr Heddlu 1997 ac y mae llai na thair blynedd wedi mynd heibio ers ei dyroddi”;

(b) hepgorer paragraffau 7 ac 8.

Diwygio Rheoliadau Datgymhwyso rhag Gofalu am Blant (Cymru) 2004

3.—( 1) Diwygier yr Atodlen i Reoliadau Datgymhwyso rhag Gofalu am Blant (Cymru) 2004(7) fel a ganlyn.

(2) Ym mharagraff 3, yn lle “78C” rhodder “79C”

(3) Yn lle paragraff 33 rhodder—

“Cyfarwyddyd Deddf Addysg 2002

33.   Person sy'n ddarostyngedig i gyfarwyddyd a wnaed, neu y mae iddo effaith fel pe bai wedi'i wneud, o dan adran 142 o Ddeddf Addysg 2002(8) ar y seiliau a osodir yn is-adran (4)(a), (b) neu (d) o'r adran honno.”

(4) Yn lle paragraff 34 rhodder—

“Deddf Diogelu Grwpiau Hyglwyf 2006 rhestr waharddedig o ran plant

34.   Person sydd wedi'i wahardd rhag gweithgaredd a reoleiddir sy'n ymwneud â phlant (o fewn ystyr adran 3(2) o Ddeddf Diogelu Grwpiau Hyglwyf 2006(9)”

(1)

O.S. 2002/812 (Cy.92). Yr offerynnau diwygio perthnasol yw O.S. 2002/2171 (Cy.218), O.S. 2002/2622 (Cy.254), O.S. 2003/2708 (Cy.259) ac O.S. 2004/2414 (Cy.222).

(2)

Mewnosodwyd rheoliad 4B gan O.S. 2003/2708 (Cy.259).

(3)

O.S. 2002/233. Mewnosodwyd Rheoliad 5A gan O.S. 2006/748. Mae diwygiadau pellach yn cael eu drafftio i reoliad 5A a bydd y rhain mewn grym o 12 Hydref 2009 ymlaen.

(4)

1997 p.50. Mewnosodwyd adran 113B gan Ddeddf Troseddu Cyfundrefnol Difrifol a'r Heddlu 2005 (p.15). Diwygir is-adran (2) o adran 113B gan Ddeddf Diogelu Grwpiau Hyglwyf 2006.

(5)

Mewnosodwyd adran 113BA gan adran 63(1) o Ddeddf Diogelu Grwpiau Hyglwyf 2006 (p.47) a pharagraff 14 o Atodlen 9 iddi.

(6)

Mewnosodwyd adran 113A gan Ddeddf Troseddu Cyfundrefnol Difrifol a'r Heddlu 2005 (p.15).

(7)

O.S. 2004/2695 (Cy.235).

(8)

2002 p.32.

(9)

2006 p.47.