Rheoliadau Deintyddiaeth Breifat (Cymru) 2017

Ffioedd

34.—( 1) Yn ddarostyngedig i baragraff (2), caiff deintydd ofyn am ad-daliad o’r ffi flynyddol a ragnodir yn Rheoliadau 2008—

(a) os yw cais i gofrestru o dan Ran 2 o’r Ddeddf wedi ei wneud i’r awdurdod cofrestru mewn cysylltiad â’r practis deintyddol preifat y mae’r deintydd yn gweithio ynddo;

(b) os yw’r cais i gofrestru wedi ei ganiatáu gan yr awdurdod cofrestru; ac

(c) os talodd y deintydd ffi flynyddol o dan Reoliadau 2008 o fewn y chwe mis cyn i’r cais i gofrestru gael ei ganiatáu.

(2) Rhaid i gais am ad-daliad y mae deintydd yn ei wneud a ddisgrifir ym mharagraff (1) gael ei wneud o fewn tri mis i’r dyddiad y cafodd y cais i gofrestru y cyfeirir ato ym mharagraff (1) ei ganiatáu.

(3) Pan fo deintydd yn gofyn am ad-daliad yn unol â pharagraff (2) a bod yr awdurdod cofrestru yn cytuno i ganiatáu’r cais, yna bydd ad-daliad yn cael ei dalu i’r deintydd ar sail un rhan o ddeuddeg o’r ffi flynyddol a delir ar gyfer pob mis cyfan yn dilyn y dyddiad y cafodd y cais i gofrestru y cyfeirir ato ym mharagraff (1) ei ganiatáu.

(4) Os yw deintydd yn gweithio mewn mwy nag un practis deintyddol preifat, ni chaiff y deintydd ond ofyn am ad-daliad—

(a) os yw cais i gofrestru wedi ei wneud i’r awdurdod cofrestru mewn cysylltiad â phob practis deintyddol preifat y mae’r deintydd yn gweithio ynddo; a

(b) os yw pob cais i gofrestru wedi ei ganiatáu.