Rheoliadau Gwastraff Peryglus (Diwygiadau Amrywiol) (Cymru) 2018

Offerynnau Statudol Cymru

2018 Rhif 721 (Cy. 140)

Diogelu’r Amgylchedd, Cymru

Gwastraff, Cymru

Rheoliadau Gwastraff Peryglus (Diwygiadau Amrywiol) (Cymru) 2018

Gwnaed

11 Mehefin 2018

Gosodwyd gerbron Cynulliad Cenedlaethol Cymru

14 Mehefin 2018

Yn dod i rym

5 Gorffennaf 2018

Mae Gweinidogion Cymru wedi eu dynodi(1) at ddibenion adran 2(2) o Ddeddf y Cymunedau Ewropeaidd 1972(2) mewn perthynas ag—

(a) mesurau ynghylch atal, lleihau a dileu llygredd a achosir gan wastraff a rheoli pecynnu a gwastraff pecynnu(3);

(b) atal, lleihau a rheoli gwastraff(4).

Mae Gweinidogion Cymru yn gwneud y Rheoliadau hyn drwy arfer y pwerau a roddir iddynt gan adran 2(2) o Ddeddf y Cymunedau Ewropeaidd 1972.

Enwi, cychwyn a chymhwyso

1.—( 1) Enw’r Rheoliadau hyn yw Rheoliadau Gwastraff Peryglus (Diwygiadau Amrywiol) (Cymru) 2018.

(2) Daw’r Rheoliadau hyn i rym ar 5 Gorffennaf 2018.

(3) Mae’r Rheoliadau hyn yn gymwys o ran Cymru.

Diwygio Deddf Diogelu’r Amgylchedd 1990

2.   Yn adran 62A(2)(b) o Ddeddf Diogelu’r Amgylchedd 1990(5) (rhestrau o wastraff sy’n arddangos nodweddion peryglus), ar ôl “Directive 2008/98/EC” mewnosoder “, as last amended by Council Regulation (EU) 2017/997”.

Diwygio Rheoliadau Gwastraff Peryglus (Cymru) 2005

3.   Yn lle rheoliad 2(1)(a) o Reoliadau Gwastraff Peryglus (Cymru) 2005(6) (y Gyfarwyddeb Wastraff ac ystyr Gwastraff), rhodder—

“(a) “ystyr “y Gyfarwyddeb Wastraff” (“the Waste Directive”) yw Cyfarwyddeb 2008/98/EC Senedd Ewrop a’r Cyngor ar wastraff a diddymu Cyfarwyddebau penodol, fel y’i diwygiwyd ddiwethaf gan Reoliad y Cyngor (EU) 2017/997;”.

Diwygio Rheoliadau Rhwymedigaethau Cyfrifoldeb Cynhyrchwyr (Gwastraff Deunydd Pacio) 2007

4.   Yn rheoliad 2(1) o Reoliadau Rhwymedigaethau Cyfrifoldeb Cynhyrchwyr (Gwastraff Deunydd Pacio) 2007(7) (dehongli a hysbysiadau), yn y diffiniad o “the Waste Directive”, ar y diwedd, cyn yr hanner colon, mewnosoder “, as last amended by Council Regulation (EU) 2017/997”.

Diwygio Rheoliadau Gwastraff (Cymru a Lloegr) 2011

5.   Yn rheoliad 3(1) o Reoliadau Gwastraff (Cymru a Lloegr) 2011(8) (dehongli), yn y diffiniad o “the Waste Framework Directive”, ar y diwedd, cyn yr hanner colon, mewnosoder, “as last amended by Council Regulation (EU) 2017/997”.

Diwygio Rheoliadau Trwyddedu Amgylcheddol (Cymru a Lloegr) 2016

6.   Yn rheoliad 3 o Reoliadau Trwyddedu Amgylcheddol (Cymru a Lloegr) 2016(9) (dehongli: Cyfarwyddebau), yn y diffiniad o “the Waste Framework Directive”, ar y diwedd, cyn yr hanner colon, mewnosoder “, as last amended by Council Regulation (EU) 2017/997”.

Dirymiadau

7.   Mae’r rheoliadau a ganlyn wedi eu dirymu—

(a) rheoliad 3(2) o Reoliadau Gwastraff Peryglus (Diwygiadau Amrywiol) (Cymru) 2015(10);

(b) rheoliad 3(2) o Reoliadau Gwastraff (Ystyr Adfer) (Diwygiadau Amrywiol) (Cymru) 2016(11).

Lesley Griffiths

Ysgrifennydd y Cabinet dros Ynni, Cynllunio a Materion Gwledig, un o Weinidogion Cymru

11 Mehefin 2018

NODYN ESBONIADOL

(Nid yw’r nodyn hwn yn rhan o’r Rheoliadau)

Mae’r Rheoliadau hyn yn diwygio deddfwriaeth sy’n cyfeirio at Gyfarwyddeb 2008/98/EC Senedd Ewrop a’r Cyngor dyddiedig 19 Tachwedd 2008 ar wastraff ac yn diddymu Cyfarwyddebau penodol (OJ Rhif L 312, 22.11.2008, t. 3.)

Mae angen y diwygiadau a wneir gan y Rheoliadau hyn er mwyn gweithredu Rheoliad y Cyngor (EU) 2017/997 dyddiedig 8 Mehefin 2017 sy’n diwygio Atodiad III i Gyfarwyddeb 2008/98/EC Senedd Ewrop a’r Cyngor o ran y nodwedd beryglus HP 14 ‘Ecowenwynig’ (OJ Rhif L 150, 14.6.2017, t. 1).

Ystyriwyd Cod Ymarfer Gweinidogion Cymru ar gynnal asesiadau effaith rheoleiddiol mewn perthynas â’r Rheoliadau hyn. O ganlyniad, ystyriwyd nad oedd yn angenrheidiol cynnal asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn.

(1)

Yn rhinwedd adran 59(2) o Ddeddf Llywodraeth Cymru 2006 (p. 32) caiff Gweinidogion Cymru arfer y pŵer a roddir gan adran 2(2) o Ddeddf y Cymunedau Ewropeaidd 1972 (p. 68) mewn perthynas ag unrhyw fater, neu at unrhyw ddiben, os ydynt wedi eu dynodi mewn perthynas â’r mater hwnnw neu at y diben hwnnw.

(2)

1972 p. 68. Diwygiwyd adran 2(2) gan adran 27 o Ddeddf Diwygio Deddfwriaethol a Rheoleiddiol 2006 (p. 51) a chan adran 3 o Ddeddf yr Undeb Ewropeaidd (Diwygio) 2008 (p. 7) a Rhan 1 o’r Atodlen iddi.

(3)

O.S. 2005/850.

(4)

O.S. 2010/1552.

(5)

1990 p. 43, mewnosodwyd adran 62A gan O.S. 2005/894 ac fe’i diwygiwyd gan O.S. 2015/1360; mae offerynnau diwygio eraill ond nid yw’r un ohonynt yn berthnasol.

(6)

O.S. 2005/1806 (Cy. 138), a ddiwygiwyd gan O.S. 2011/971 (Cy. 141), 2015/1417 (Cy. 141) a 2016/691(Cy. 189).

(7)

O.S. 2007/871, a ddiwygiwyd gan O.S. 2016/738; mae offerynnau diwygio eraill ond nid yw’r un ohonynt yn berthnasol.

(8)

O.S. 2011/988, a ddiwygiwyd gan O.S. 2016/691 (Cy. 189); mae offerynnau diwygio eraill ond nid yw’r un ohonynt yn berthnasol.

(9)

O.S. 2016/1154; mae offerynnau diwygio eraill ond nid yw’r un ohonynt yn berthnasol.

(10)

O.S. 2015/1417 (Cy. 141).

(11)

O.S. 2016/691 (Cy. 189).