Gorchymyn Corfforaeth Addysg Bellach Coleg Sir Gâr (Diddymu) a Choleg Sir Gar (Sefydliadau Dynodedig mewn Addysg Bellach) 2013

Offerynnau Statudol Cymru

2013 Rhif 1663 (Cy. 159)

Addysg, Cymru

Gorchymyn Corfforaeth Addysg Bellach Coleg Sir Gâr (Diddymu) a Choleg Sir Gar (Sefydliadau Dynodedig mewn Addysg Bellach) 2013

Gwnaed

3 Gorffennaf 2013

Gosodwyd gerbron Cynulliad Cenedlaethol Cymru

5 Gorffennaf 2013

Yn dod i rym

1 Awst 2013

Mae Gweinidogion Cymru yn gwneud y Gorchymyn a ganlyn drwy arfer y pwerau a roddwyd gan adran 27C o Ddeddf Addysg Bellach ac Uwch 1992(1) a thrwy arfer y pwerau a roddwyd i’r Ysgrifennydd Gwladol gan adran 28 o’r Ddeddf honno ac a freiniwyd bellach ynddynt hwy(2).

Yn unol ag adran 27C(2) o Ddeddf Addysg Bellach ac Uwch 1992, mae Coleg Sir Gar (“Coleg Sir Gar”)(3) wedi cydsynio i’r trosglwyddiad o eiddo, hawliau a rhwymedigaethau Corfforaeth Addysg Bellach Coleg Sir Gâr (“Coleg Sir Gâr Further Education Corporation”)(4).

Mae Gweinidogion Cymru wedi ymgynghori â Chorfforaeth Addysg Bellach Coleg Sir Gâr (“Coleg Sir Gâr Further Education Corporation”), yn unol ag adran 27C(6) o’r Ddeddf honno.

Enwi a chychwyn

1.   Enw’r Gorchymyn hwn yw Gorchymyn Corfforaeth Addysg Bellach Coleg Sir Gâr (Diddymu) a Choleg Sir Gar (Sefydliadau Dynodedig mewn Addysg Bellach) 2013 a daw i rym ar 1 Awst 2013.

Dehongli

2.   Yn y Gorchymyn hwn ystyr “y Ddeddf” (“the Act”) yw Deddf Addysg Bellach ac Uwch 1992.

Diddymu a throsglwyddo

3.   Ar 1 Awst 2013 mae Corfforaeth Addysg Bellach Coleg Sir Gâr (“Coleg Sir Gâr Further Education Corporation”) wedi ei diddymu a throsglwyddir ei holl eiddo, hawliau a rhwymedigaethau yn unol ag adran 27C(2) o’r Ddeddf i Goleg Sir Gar (“Coleg Sir Gar”), sef corff corfforaethol sydd wedi ei sefydlu at ddibenion sy’n cynnwys darparu cyfleusterau neu wasanaethau addysgol, ac sy’n elusen sydd wedi ei sefydlu at ddibenion elusennol sy’n ddibenion addysgol yn unig.

Trosglwyddo staff

4.   Mae adran 26(2), (3) a (4) o’r Ddeddf yn gymwys i unrhyw berson a gyflogir gan Gorfforaeth Addysg Bellach Coleg Sir Gâr (“Coleg Sir Gâr Further Education Corporation”) yn union cyn 1 Awst 2013 fel petai’r cyfeiriadau yn yr adran honno—

(a) at berson y mae’r adran honno yn gymwys iddo yn gyfeiriadau at berson sy’n gyflogedig fel hynny;

(b) at y dyddiad gweithredol yn gyfeiriadau at 1 Awst 2013;

(c) at y trosglwyddwr yn gyfeiriadau at Gorfforaeth Addysg Bellach Coleg Sir Gâr (“Coleg Sir Gâr Further Education Corporation”); a

(d) at y gorfforaeth yn gyfeiriadau at Goleg Sir Gar (“Coleg Sir Gar”).

Dynodi

5.   Mae Coleg Sir Gar (“Coleg Sir Gar”), sef sefydliad addysgol o’r math a ddisgrifir yn is-adrannau (1) a (2) o adran 28 o’r Ddeddf, wedi ei ddynodi fel sefydliad at ddibenion yr adran honno.

Huw Lewis

Y Gweinidog Addysg a Sgiliau, un o Weinidogion Cymru

3 Gorffennaf 2013

NODYN ESBONIADOL

(Nid yw’r nodyn hwn yn rhan o’r Gorchymyn)

Mae’r Gorchymyn hwn yn diddymu’r gorfforaeth addysg bellach a sefydlwyd i redeg Coleg Sir Gâr (“Coleg Sir Gâr”) a hynny’n effeithiol o 1 Awst 2013. Mae hefyd yn dynodi Coleg Sir Gar (“Coleg Sir Gar”), sef coleg newydd fydd yn cael ei redeg gan gwmni cofrestredig cyfyngedig drwy warant at ddibenion adran 28 o Ddeddf Addysg Bellach ac Uwch 1992 (“y Ddeddf”).

Mae’n darparu ar gyfer trosglwyddo eiddo, hawliau a rhwymedigaethau’r gorfforaeth i Goleg Sir Gar (“Coleg Sir Gar”) ac mae’n diogelu hawliau cyflogaeth cyflogeion y gorfforaeth a ddiddymwyd drwy gymhwyso, gydag addasiadau, adran 26(2) i (4) o’r Ddeddf.

Effaith cymhwyso adran 26(2) i (4) o’r Ddeddf yw cadw contractau cyflogaeth cyflogeion y gorfforaeth a ddiddymwyd fel petai’r contractau cyflogaeth wedi eu gwneud yn wreiddiol rhwng y cyflogeion a Choleg Sir Gar (“Coleg Sir Gar”). Daw cyflogeion y gorfforaeth a ddiddymwyd yn gyflogeion Coleg Sir Gar (“Coleg Sir Gar”) o 1 Awst 2013.

Ystyr dynodi Coleg Sir Gar yw y dylid trin y sefydliad fel sefydliad o fewn y sector addysg bellach at ddibenion y Deddfau Addysg (o fewn yr ystyr a roddir gan adrannau 91(1) a 91(3) o’r Ddeddf ac adran 578 o Ddeddf Addysg 1996).

Ni luniwyd Asesiad Effaith Rheoleiddiol ar gyfer yr offeryn hwn, gan na fydd yn effeithio ar gostau busnes.

(1)

1992 p.13; rhoddwyd adran 27C yn lle adran 27 fel y’i deddfwyd yn wreiddiol, gan Ddeddf Addysg 2011 (p.21), adran 49, Atodlen 12, paragraffau 1 a 7.

(2)

Trosglwyddwyd swyddogaethau’r Ysgrifennydd Gwladol o dan adran 28 o Ddeddf Addysg Bellach ac Uwch 1992 i Gynulliad Cenedlaethol Cymru gan Orchymyn Cynulliad Cenedlaethol Cymru (Trosglwyddo Swyddogaethau) 1999 (O.S 1999/672). Trosglwyddwyd swyddogaethau Cynulliad Cenedlaethol Cymru i Weinidogion Cymru yn rhinwedd adran 162 o Ddeddf Llywodraeth Cymru 2006 (p.32) a pharagraff 30(1) a 30(2)(a) o Atodlen 11 iddi.

(3)

Ymgorfforwyd ar 22 Mai 2013 yn gwmni cyfyngedig drwy warant a chofrestrwyd â rhif cwmni 08539630.

(4)

Sefydlwyd fel “Carmarthen College of Technology and Art” gan Orchymyn Addysg (Corfforaethau Addysg Bellach) 1992 (O.S. 1992/2097). Newidiwyd yr enw i “Coleg Sir Gâr” yn effeithiol o 5 Rhagfyr 2000.