Deddf Diogelwch Adeiladau (Cymru) 2026

Rhagolygol

95 Pŵer awdurdod gorfodi i roi hysbysiad gwybodaeth LL+C

(1) Caiff awdurdod gorfodi roi hysbysiad gwybodaeth i unrhyw berson at ddiben—

(a) ymchwilio i gydymffurfedd ag unrhyw ofyniad y mae gan yr awdurdod y swyddogaeth o orfodi, neu

(b) arfer unrhyw un neu ragor o swyddogaethau eraill yr awdurdod o dan y Ddeddf hon neu reoliadau a wneir oddi tani.

(2) Mae hysbysiad gwybodaeth yn hysbysiad sy’n ei gwneud yn ofynnol i’r person roi gwybodaeth benodedig neu ddogfennau penodedig i’r awdurdod o fewn cyfnod penodedig.

(3) Caiff hysbysiad gwybodaeth bennu—

(a) sut y mae rhaid rhoi unrhyw wybodaeth neu ddogfen;

(b) y ffurf y mae rhaid ei rhoi ynddi.

(4) Ni chaiff hysbysiad gwybodaeth ei gwneud yn ofynnol i berson roi unrhyw wybodaeth neu ddogfen y gellid cynnal hawliad am fraint broffesiynol gyfreithiol mewn cysylltiad â hwy mewn achos cyfreithiol.

(5) Rhaid i hysbysiad gwybodaeth—

(a) nodi ei fod yn hysbysiad a roddir o dan yr adran hon, a

(b) esbonio canlyniadau methu â chydymffurfio â’r hysbysiad.

(6) Caiff awdurdod gorfodi sydd wedi rhoi hysbysiad gwybodaeth i berson dynnu’r hysbysiad yn ôl ar unrhyw adeg drwy roi hysbysiad pellach i’r person.

(7) Nid yw gwybodaeth y mae person yn ei rhoi i awdurdod gorfodi o dan yr adran hon yn dderbyniadwy mewn tystiolaeth yn erbyn y person mewn achos troseddol ac eithrio—

(a) mewn achos am drosedd o dan adran 101(1)(a),

(b) mewn achos am drosedd o dan adran 108 (darparu gwybodaeth anwir neu gamarweiniol),

(c) mewn achos am drosedd o wyrdroi cwrs cyfiawnder, neu

(d) os yn yr achos—

(i) wrth roi tystiolaeth, bod y person yn gwneud datganiad sy’n anghyson â’r wybodaeth, a

(ii) y caiff tystiolaeth sy’n ymwneud â’r wybodaeth a roddwyd ei dwyn, neu y gofynnir cwestiwn sy’n ymwneud â’r wybodaeth honno, gan neu ar ran y person.

(8) Yn yr adran hon, ystyr “penodedig” yw wedi ei bennu yn yr hysbysiad gwybodaeth.

Gwybodaeth Cychwyn

I1 A. 95 ddim mewn grym ar y Cydsyniad Brenhinol, gweler a. 138(2)