Cyflwyniad
1.Mae’r Nodiadau Esboniadol hyn ar gyfer Deddf Anghenion Dysgu Ychwanegol a’r Tribiwnlys Addysg (Cymru) 2018 a basiwyd gan Gynulliad Cenedlaethol Cymru ar 12 Rhagfyr 2017 ac a gafodd y Cydsyniad Brenhinol ar 24 Ionawr 2018. Fe’u lluniwyd gan Grŵp Addysg a Gwasanaethau Cyhoeddus Llywodraeth Cymru er mwyn cynorthwyo’r sawl sy’n darllen y Ddeddf. Dylid darllen y Nodiadau Esboniadol ar y cyd â’r Ddeddf ond nid ydynt yn rhan ohoni.
2.Ni fwriedir i’r Nodiadau Esboniadol fod yn ddisgrifiad cynhwysfawr o’r Ddeddf. Os ymddengys nad oes angen rhoi esboniad neu sylw ar ddarpariaeth unigol o’r Ddeddf, nis rhoddir.
3.Yn y Nodiadau Esboniadol hyn, ystyr ‘Deddf 1996’ yw Deddf Addysg 1996 ac ystyr ‘Deddf 2000’ yw Deddf Dysgu a Sgiliau 2000. Mae cyfeiriadau at awdurdodau lleol, ysgolion a gynhelir a sefydliadau yn y sector addysg bellach yn gyfeiriadau at y rheini yng Nghymru oni nodir fel arall. Mae cyfeiriadau at adrannau a Rhannau yn gyfeiriadau at yr adrannau hynny a’r Rhannau hynny o’r Ddeddf, oni nodir fel arall. Mae byrfoddau cyffredin eraill a ddefnyddir yn y nodiadau hyn wedi eu nodi o dan ‘Trosolwg cyffredinol o’r Ddeddf’.
