Rhan 9 Darpariaethau Cyffredinol
Adran 55 - Rheoliadau a gorchmynion a wneir gan Weinidogion Cymru
192.Mae adran 55 yn cyflwyno Atodlen 7. Mae Atodlen 7 yn gwneud nifer o ddiwygiadau i DCGTh 1990 er mwyn dod â’r gweithdrefnau ar gyfer gwneud gorchmynion a rheoliadau ynghyd. Gwneir diwygiadau tebyg i DCPhG 2004 a Deddf Tiroedd Comin 2006.
Adran 56 - Dehongli
193.Mae adran 56 yn diffinio “DCPhG 2004” a “DCGTh 1990”.
Adran 57 – Pŵer i wneud darpariaeth ganlyniadol etc.
194.Mae adran 57 yn caniatáu i Weinidogion Cymru wneud darpariaethau mewn rheoliadau y gall fod eu hangen er mwyn rhoi effaith i’r Ddeddf, neu o ganlyniad iddi. Mae hyn yn cynnwys pŵer i ddiwygio Deddfau Seneddol neu Ddeddfau neu Fesurau’r Cynulliad. Os yw rheoliadau yn cynnig diwygio Deddfau Seneddol neu Ddeddfau neu Fesurau’r Cynulliad, ni ellir eu gwneud oni bai bod drafft yn cael ei osod gerbron y Cynulliad a’i gymeradwyo ganddo. Mewn amgylchiadau eraill, gellir gwneud rheoliadau heb gymeradwyaeth ymlaen llaw gan y Cynulliad, ond gall y Cynulliad eu diddymu.
Adran 58 - Dod i rym
195.Mae’r adran hon yn nodi’r darpariaethau sy’n dod i rym ar ddyddiad y Cydsyniad Brenhinol; a’r rheini sy’n dod i rym drwy orchmynion cychwyn a wneir gan Weinidogion Cymru. Daw darpariaethau yn Rhannau 2 i 7 i rym ddau fis wedi’r Cydsyniad Brenhinol i’r graddau sy’n angenrheidiol fel y gall Gweinidogion Cymru arfer y swyddogaeth o wneud rheoliadau a gorchmynion.
