Deddf Cynllunio (Cymru) 2026

Rhagolygol

8 Pŵer i ddynodi ardal gydgynllunio a sefydlu bwrdd cydgynllunio LL+C

(1) Caiff rheoliadau—

(a) dynodi’n ardal gydgynllunio ddwy ardal neu ragor, pob un ohonynt yn sir neu’n fwrdeistref sirol gyfan, neu’n rhan o sir neu fwrdeistref sirol, yng Nghymru, a

(b) sefydlu cyd-fwrdd (o’r enw “bwrdd cydgynllunio”) ar gyfer yr ardal gydgynllunio.

(2) Ni chaiff Gweinidogion Cymru wneud rheoliadau o dan yr adran hon oni bai naill ai—

(a) eu bod wedi peri i ymchwiliad lleol gael ei gynnal, neu

(b) bod yr holl gynghorau cyfansoddol wedi cytuno.

(3) Mae bwrdd cydgynllunio yn gorff corfforedig.

(4) Mae bwrdd cydgynllunio wedi ei gyfansoddi o aelodau a benodir gan y cynghorau cyfansoddol.

(5) Rhaid i’r rheoliadau sy’n sefydlu’r bwrdd benderfynu nifer yr aelodau.

(6) Caiff rheoliadau o dan yr adran hon—

(a) rheoleiddio penodi aelodau o fwrdd cydgynllunio, deiliadaeth eu swydd a gadael eu swydd;

(b) rheoleiddio cyfarfodydd a thrafodion y bwrdd;

(c) darparu ar gyfer talu costau’r bwrdd gan y cynghorau cyfansoddol;

(d) cymhwyso i’r bwrdd (gydag addasiadau neu hebddynt) unrhyw ddeddfiad sy’n ymwneud â chyfansoddiad, swyddogaethau neu drefniadau ariannol (gan gynnwys archwilio) awdurdodau lleol o unrhyw ddisgrifiad;

(e) gwneud unrhyw ddarpariaeth arall y mae Gweinidogion Cymru yn meddwl ei bod yn briodol mewn cysylltiad ag arfer swyddogaethau’r bwrdd.

(7) Caiff rheoliadau o dan yr adran hon hefyd—

(a) darparu ar gyfer trosglwyddo eiddo, hawliau ac atebolrwyddau (gan gynnwys hawliau ac atebolrwyddau sy’n ymwneud â chontractau cyflogaeth);

(b) darparu ar gyfer addasu cyfrifon a dosrannu atebolrwyddau.

(8) “Cynghorau cyfansoddol” bwrdd cydgynllunio yw pob cyngor sir neu gyngor bwrdeistref sirol y mae ei ardal gyfan neu ran ohoni wedi ei chynnwys yn ardal gydgynllunio’r bwrdd.

Gwybodaeth Cychwyn

I1 A. 8 ddim mewn grym ar y Cydsyniad Brenhinol, gweler a. 409(2)