Deddf Cynllunio (Cymru) 2026

Rhagolygol

9 Ardaloedd cydgynllunio a Pharciau Cenedlaethol LL+C

(1) Ni chaiff ardal gydgynllunio gynnwys unrhyw ran o Barc Cenedlaethol y mae awdurdod Parc Cenedlaethol ar ei gyfer, ond mae hyn yn ddarostyngedig i unrhyw reoliadau a wneir o dan yr adran hon.

(2) Caiff rheoliadau wneud darpariaeth ar gyfer galluogi ac mewn cysylltiad â galluogi—

(a) ardal sy’n cynnwys y cyfan neu ran o Barc Cenedlaethol y mae awdurdod Parc Cenedlaethol ar ei gyfer i gael ei dynodi’n ardal gydgynllunio, a

(b) sefydlu bwrdd cydgynllunio fel yr awdurdod cynllunio ar gyfer ardal gydgynllunio o’r fath at ddibenion y Ddeddf hon (ac eithrio Rhan 2) a Deddf yr Amgylchedd Hanesyddol.

(3) Caiff y rheoliadau hefyd wneud darpariaeth ynghylch pa un a yw swyddogaethau awdurdod cynllunio o dan y Ddeddf Sylweddau Peryglus i fod yn arferadwy, mewn perthynas ag unrhyw ran o Barc Cenedlaethol sydd wedi ei chynnwys mewn ardal gydgynllunio, gan y bwrdd cydgynllunio neu gan awdurdod y Parc Cenedlaethol.

(4) Caiff rheoliadau o dan yr adran hon ddarparu bod swyddogaeth yn arferadwy gan berson arall neu mewn perthynas â pherson arall yn hytrach na, neu yn ogystal â, pherson y byddai’r swyddogaeth yn arferadwy ganddo neu mewn perthynas ag ef fel arall.

(5) Caiff rheoliadau o dan yr adran hon ddiwygio neu fel arall addasu—

(a) unrhyw ddeddfiad sydd wedi ei gynnwys yn Neddfau cynllunio Cymru neu a wneir odanynt;

(b) unrhyw ddeddfiad arall sy’n ymwneud â swyddogaethau sy’n arferadwy gan awdurdodau cynllunio neu mewn perthynas â hwy;

(c) unrhyw ddeddfiad sy’n ymwneud â Pharciau Cenedlaethol neu â swyddogaethau sy’n arferadwy gan awdurdodau Parc Cenedlaethol neu mewn perthynas â hwy.

Gwybodaeth Cychwyn

I1 A. 9 ddim mewn grym ar y Cydsyniad Brenhinol, gweler a. 409(2)