Deddf Cynllunio (Cymru) 2026

21 Llunio cynllun: y weithdrefn a’r cytundeb cyflawni

(1) Rhaid i awdurdod sy’n gwneud cynllun lunio ei gynllun yn unol ag—

(a) y weithdrefn a bennir mewn rheoliadau, a

(b) y cytundeb cyflawni ar gyfer y cynllun.

(2) Cynnwys cytundeb cyflawni ar gyfer y cynllun yw—

(a) yr amserlen ar gyfer llunio a mabwysiadu’r cynllun, a

(b) cynllun cynnwys cymunedau’r awdurdod.

(3) Mae cynllun cynnwys cymunedau’r awdurdod yn ddatganiad o’i bolisïau ar gyfer cynnwys wrth lunio’r cynllun bersonau sydd wedi eu rhestru yn y cynllun cynnwys cymunedau.

(4) O ran y personau sydd wedi eu rhestru yn y cynllun cynnwys cymunedau—

(a) rhaid iddynt gynnwys y personau a bennir mewn rheoliadau;

(b) caniateir iddynt gynnwys unrhyw bersonau eraill y mae’r awdurdod sy’n gwneud cynllun o’r farn bod ganddynt fuddiant mewn materion sy’n ymwneud â datblygiad a defnydd o dir yn ei ardal.

(5) Rhaid i’r awdurdod sy’n gwneud cynllun a Gweinidogion Cymru geisio cytuno ar delerau’r cytundeb cyflawni ar gyfer y cynllun.

(6) Ond i’r graddau na allant gytuno ar y telerau, caiff Gweinidogion Cymru gyfarwyddo bod rhaid i’r cytundeb cyflawni fod ar y telerau a bennir yn y cyfarwyddyd.

(7) Rhaid i’r awdurdod sy’n gwneud cynllun gydymffurfio â’r cyfarwyddyd.

(8) Caiff rheoliadau bennu—

(a) y weithdrefn i’w dilyn wrth lunio cytundeb cyflawni;

(b) amgylchiadau lle nad oes angen cydymffurfio â gofynion cytundeb cyflawni.