Rheoliadau Clefyd Affricanaidd y Ceffylau (Cymru) 2013

Rheoliadau 8(2), 9(9), 10(8) a 18(5)

YR ATODLEN Mesurau mewn mangre sydd dan amheuaeth a mangre heintiedig ac mewn mangre mewn parth rheolaeth

Cofnodion

1.—( 1) Rhaid i’r prif feddiannydd gadw cofnod o bob ceffyl sydd yn y fangre.

(2) Rhaid i’r prif feddiannydd gymryd pob cam rhesymol i ddiweddaru’r cofnod i ddangos nifer y ceffylau yn y fangre sydd—

(a) wedi marw;

(b) yn dangos arwyddion clinigol o glefyd Affricanaidd y ceffylau;

(c) wedi cael eu geni er pan osodwyd cyfyngiadau yn y fangre o dan y Rheoliadau hyn; a

(d) wedi mynd i mewn i’r fangre neu ddod ohoni o dan drwydded.

(3) Rhaid i’r prif feddiannydd ofyn i unrhyw feddiannydd arall adrodd ynghylch unrhyw newidiadau ym manylion ei geffylau yn y fangre sy’n berthnasol i’r cofnod.

(4) Rhaid i’r prif feddiannydd gadw cofnod am gyfnod o chwe mis o leiaf wedi (yn ôl y digwydd)—

(a) i’r hysbysiad a gyflwynwyd o dan reoliad 8(2), 9(8), neu 10(7) gael ei ddirymu, neu

(b) i’r fangre beidio â bod o fewn y parth rheoli,

p’un bynnag yw’r diweddaraf.

Lletya Ceffylau

2.   Rhaid i feddiannydd sicrhau bod pob ceffyl yn y fangre yn cael ei gadw—

(a) i’r graddau y mae hynny’n ymarferol, yn y rhan neu’r rhannau o’r fangre lle y gallent fod yn llai agored i fectorau; neu

(b) yn ôl cyfarwyddyd arolygydd milfeddygol.

Cyfyngu ar symud ceffylau, carcasau, cyfarpar neu ddeunydd genetig

3.   Ni chaiff neb symud unrhyw geffyl neu garcas i’r fangre neu ohoni, nac unrhyw gyfarpar neu ddeunydd genetig o’r fangre, ac eithrio o dan awdurdod trwydded a roddir gan arolygydd milfeddygol neu un o swyddogion Gweinidogion Cymru sy’n gweithredu o dan gyfarwyddyd arolygydd milfeddygol.

Rheoli fectorau

4.   Rhaid i’r prif feddiannydd weithredu unrhyw fesurau ymarferol i reoli fectorau y caiff arolygydd milfeddygol eu gwneud yn ofynnol.