Rheoliadau Clefyd Affricanaidd y Ceffylau (Cymru) 2013

RHAN 2 Hysbysu ynghylch amheuaeth o glefyd Affricanaidd y ceffylau

Gofynion hysbysu

5.—( 1) Rhaid i unrhyw berson sy’n amau bod ceffyl neu garcas wedi ei heintio â feirws clefyd Affricanaidd y ceffylau hysbysu Gweinidogion Cymru ar unwaith.

(2) Rhaid i unrhyw berson sy’n archwilio sampl a gymerwyd o geffyl neu garcas ac sydd—

(a) yn amau bod y ceffyl neu’r carcas wedi ei heintio â feirws clefyd Affricanaidd y ceffylau, neu

(b) yn canfod tystiolaeth o wrthgyrff i’r feirws hwnnw neu antigenau ohono,

hysbysu Gweinidogion Cymru ar unwaith.

(3) Ond mae paragraffau (1) a (2) yn ddarostyngedig i baragraff (5).

(4) Caiff arolygydd milfeddygol gyflwyno hysbysiad i unrhyw feddiannydd mangre heintiedig gan nodi nad oes angen hysbysu Gweinidogion Cymru ynghylch unrhyw achosion pellach lle y mae amheuaeth bod feirws clefyd Affricanaidd y ceffylau yn y fangre honno, cyhyd ag y bo’r hysbysiad yn parhau mewn grym.

(5) Pan fo hysbysiad wedi ei gyflwyno o dan baragraff (4)—

(a) nid yw paragraff (1) yn gymwys mewn perthynas ag unrhyw geffyl neu garcas yn y fangre heintiedig, a

(b) nid yw paragraff (2) yn gymwys mewn perthynas ag unrhyw sampl a gymerwyd o geffyl neu garcas yn y fangre heintiedig,

cyhyd ag y bo’r hysbysiad yn parhau mewn grym.

(6) Oni bai ei fod wedi ei ddirymu yn gynharach gan arolygydd milfeddygol, mae hysbysiad a gyflwynir o dan baragraff (4) yn peidio â bod mewn grym pan fo’r hysbysiad sy’n datgan bod y fangre yn fangre heintiedig a gyflwynwyd o dan reoliad 9(8) neu 10(7) (yn ôl y digwydd) wedi ei dirymu gan arolygydd milfeddygol neu yn rhinwedd rheoliad 13(2).