Rheoliadau Deddf Plant 2004 (Diwygio Rheoliadau Amrywiol) (Cymru) 2005

Offerynnau Statudol Cymru

2005 Rhif 774 (Cy.64)

PLANT A PHOBL IFANC, CYMRU

Rheoliadau Deddf Plant 2004 (Diwygio Rheoliadau Amrywiol) (Cymru) 2005

Wedi'u gwneud

16 Mawrth 2005

Yn dod i rym

1 Ebrill 2005

Mae Cynulliad Cenedlaethol Cymru, drwy arfer y pwerau a roddwyd iddo gan adran 9(2) a (3) o Ddeddf Mabwysiadu 1976(1), adrannau 23(2)(a), (f)(ii), (5), 26(1), (2), 59(2), (3), 104(4), Atodlen 2, paragraffau 12, 13, 14, Atodlen 4, paragraff 4(1), (2)(d), Atodlen 5, paragraff 7(1), (2)(g), ac Atodlen 6, paragraff 10(1) o Ddeddf Plant 1989(2) a chan adrannau 1(4), 16(2), 22(1), (2)(a) i (d), (f) i (j), (5)(a) a (c), (7)(a) i (h), (j), (8)(c), 25(1), 33, 34(1), 35, 77(2) ac 118(4) i (7) o Ddeddf Safonau Gofal 2000(3), drwy hyn yn gwneud y Rheoliadau a ganlyn:

Enwi, cychwyn a chymhwyso

1.—( 1) Enw'r Rheoliadau hyn yw Rheoliadau Deddf Plant 2004 (Diwygio Rheoliadau Amrywiol) (Cymru) 2005 a deuant i rym ar 1 Ebrill 2005.

(2) Mae'r Rheoliadau hyn yn gymwys o ran Cymru.

Diwygio Rheoliadau Asiantaethau Mabwysiadu 1983

2.—( 1) Diwygir Rheoliadau Asiantaethau Mabwysiadu 1983(4) yn unol â darpariaethau canlynol y rheoliad hwn.

(2) Yn rheoliad 15(1)(e), ar ôl y geiriau “children’s guardian or reporting officer”, mewnosoder y geiriau “or Welsh family proceedings officer”(5).

Diwygio Rheoliadau Trefniadau ar gyfer Lleoli Plant (Cyffredinol) 1991

3.—( 1) Diwygir Rheoliadau Trefniadau ar gyfer Lleoli Plant (Cyffredinol) 1991(6) yn unol â darpariaethau canlynol y rheoliad hwn.

(2) Bob tro y mae'r geiriau “officers of the service” yn ymddangos yn rheoliad 11, mewnosoder y geiriau “and Welsh family proceedings officers” ar eu hôl.

Diwygio Rheoliadau Adolygu Achosion Plant 1991

4.—( 1) Diwygir Rheoliadau Adolygu Achosion Plant 1991(7) yn unol â dapriaethau canlynol y rheoliad hwn.

(1) Yn rheoliad 2A(1)(c) ar ôl “Support Service”, mewnosoder “or a Welsh family proceedings officer where the child is ordinarily resident in Wales”.

Diwygio Rheoliadau Comisiynydd Plant Cymru 2001

5.—( 1) Diwygir Rheoliadau Comisiynydd Plant Cymru 2001(8) yn unol â darpariaethau canlynol y rheoliad hwn.

(2) Ar ddiwedd rheoliad 17, ychwaneger “a Chynulliad Cenedlaethol Cymru o ran ei swyddogaethau o dan adran 35 o Ddeddf Plant 2004”.

Diwygio Rheoliadau Cartrefi Plant (Cymru) 2002

6.—( 1) Diwygir Rheoliadau Cartrefi Plant (Cymru) 2002(9) yn unol â darpariaethau canlynol y rheoliad hwn.

(1) Yn rheoliad 15(2)(b) ar ôl “a Theuluoedd” mewnosoder “neu Swyddog Achosion Teuluol”.

Llofnodwyd ar ran Cynulliad Cenedlaethol Cymru o dan adran 66(1) o Ddeddf Llywodraeth Cymru 1998(10).

D. Elis-Thomas

Llywydd y Cynulliad Cenedlaethol

16 Mawrth 2005

Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn yn gwneud diwygiadau i Reoliadau Asiantaethau Mabwysiadu 1983, Rheoliadau Trefniadau ar gyfer Lleoli Plant (Cyffredinol) 1991, Rheoliadau Adolygu Achosion Plant 1991, Rheoliadau Comisiynydd Plant Cymru 2001 a Rheoliadau Cartrefi Plant (Cymru) 2002 sydd o ganlyniad i drosglwyddo swyddogaethau'r Gwasanaeth Cynghori a Chynorthwyo Llys i Blant a Theuluoedd (“CAFCASS”) yng Nghymru i swyddogion achosion teuluol Cymru a Chynulliad Cenedlaethol Cymru. Diwygir cyfeiriadau yn y pum set o reoliadau at warcheidwaid plant neu swyddogion cofnodi, swyddogion y gwasanaeth a'r Gwasanaeth Cynghori a Chynorthwyo Llys i Blant a Theuluoedd fel eu bod yn cynnwys cyfeiriad at swyddogion achosion teuluol Cymru a Chynulliad Cenedlaethol Cymru i'r graddau y mae'n arfer ei swyddogaethau o dan adran 35 o Ddeddf Plant 2004.

(1)

1976 p.36. Mae'r pwerau yn arferadwy gan y Gweinidog priodol, a ddiffinnir yn adran 9(5) o Ddeddf 1976 fel Cynulliad Cenedlaethol Cymru o ran Cymru, yr Ysgrifennydd Gwladol o ran Lloegr, a'r Ysgrifennydd Gwladol a'r Cynulliad Cymru yn gweithredu ar y cyd o ran Cymru a Lloegr.

(2)

1989 p.41. Mae swyddogaethau'r Ysgrifennydd Gwladol o dan Ddeddf 1989 yn arferadwy gan Gynulliad Cenedlaethol Cymru yn rhinwedd cynnwys Deddf 1989 yn Atodlen 1 i Orchymyn Cynulliad Cenedlaethol Cymru (Trosglwyddo Swyddogaethau) 1999 (O.S. 1999/672) (gweler erthygl 2(a) o Orchymyn 1999 ac adran 22(1) o Ddeddf Llywodraeth Cymru 1998 (p.38)).

(3)

2000 p.14.

(4)

1983 O.S. Rhif 1964.

(5)

Diffinnir “Welsh family proceedings officer” yn adran 35 o Ddeddf Plant 2004 (2004 p.31).

(6)

1991 O.S. Rhif 890.

(7)

1991 O.S. Rhif 895.

(8)

2001 O.S. Rhif 2787 (Cy. 237).

(9)

2002 O.S. Rhif 327.

(10)

1998 p.38.