Rheoliadau Gwastraff Pecynwaith (Casglu ac Adrodd am Ddata) (Cymru) 2023

Rheoliadau 16 a 17

ATODLEN 1 Casglu ac adrodd am wybodaeth

RHAN 1 Dehongli

1.   Yn yr Atodlen hon—

(a) ystyr “cyfnod adrodd cyntaf” yw—

(i) y cyfnod sy’n dechrau ar y dyddiad y daw’r Rheoliadau hyn i rym ac sy’n dod i ben ar 31 Rhagfyr 2023, neu

(ii) pan fo rheoliad 17(2)(b) yn gymwys, y cyfnod o ddeuddeng mis sy’n dechrau ar 1 Ionawr 2023 ac sy’n dod i ben ar 31 Rhagfyr 2023;

(b) ystyr “cyfnod adrodd”, heblaw’r cyfnod adrodd cyntaf, yw cyfnod o chwe mis sy’n dechrau ar 1 Ionawr neu 1 Gorffennaf;

(c) ystyr “cyfnod perthnasol” yw’r cyfnod casglu data ar gyfer gwybodaeth sy’n ofynnol at ddibenion rheoliad 16, a’r cyfnod adrodd at ddibenion rheoliad 17;

(d) mae cyfeiriadau at bwysau pecynwaith mewn cilogramau neu dunelli yn gyfeiriadau at bwysau gwirioneddol, mesuredig y pecynwaith hwnnw mewn cilogramau i’r cilogram agosaf, neu mewn tunelli i’r dunnell agosaf.

RHAN 2 Gwybodaeth gyffredinol

2.   Enw, cyfeiriad a rhif ffôn swyddfa gofrestredig y cynhyrchydd neu, os nad cwmni ydyw, prif swyddfa neu brif fan busnes y cynhyrchydd.

3.   Enw busnes y cynhyrchydd os yw’n wahanol i’r enw y cyfeirir ato ym mharagraff 2.

4.   Enw a manylion cyswllt yr unigolyn yn y cynhyrchydd sy’n gyfrifol am ddelio ag ymholiadau gan CNC.

5.   Y cyfeiriad ar gyfer cyflwyno hysbysiadau i’r cynhyrchydd os yw’n wahanol i’r cyfeiriad y cyfeirir ato ym mharagraff 2.

6.   Pan fo’r cynhyrchydd yn bartneriaeth, enwau’r holl bartneriaid.

7.   Pob dosbarth ar gynhyrchydd y mae’r cynhyrchydd yn perthyn iddo.

8.   Os yw’n perthyn i fwy nag un dosbarth ar gynhyrchydd, pa un o’r dosbarthau hynny sy’n ffurfio ei brif weithgarwch fel cynhyrchydd.

9.   Pan fo’r cynhyrchydd yn berchennog brand—

(a) manylion yr holl enwau, nodau masnach a marciau nodweddiadol eraill sy’n ymddangos ar becynwaith y mae’r perchennog brand yn gyfrifol amdano;

(b) pa un a yw’r perchennog brand hefyd yn cynhyrchu pecynwaith nad oes unrhyw enw, nod masnach na marc nodweddiadol arall yn ymddangos arno ai peidio.

RHAN 3 Yr wybodaeth sy’n ofynnol gan berchnogion brand, mewnforwyr, dosbarthwyr a darparwyr gwasanaethau

10.—( 1) Mae’r Rhan hon yn gymwys i gynhyrchwyr—

(a) sy’n berchnogion brand neu, ar gyfer pecynwaith nad oes perchennog brand iddo, sy’n bacwyr/llanwyr,

(b) sy’n fewnforwyr,

(c) sy’n ddosbarthwyr, neu

(d) sy’n ddarparwyr gwasanaethau.

(2) Rhaid i gynhyrchydd bach gadw cofnodion o’r wybodaeth ym mharagraffau 11 a 13(1)(a), (b) a (d) fel sy’n ofynnol gan reoliad 16(2)(a) neu (3)(a).

(3) Rhaid i gynhyrchydd mawr (“CM”)—

(a) cadw cofnodion o’r wybodaeth a nodir ym mharagraffau 11 i 16 ar gyfer y cyfnod casglu data fel sy’n ofynnol gan reoliad 16(2)(b) neu (3)(b), a

(b) fel sy’n ofynnol gan reoliad 17(1), adrodd ar yr wybodaeth honno mewn perthynas â’r cyfnod adrodd cyntaf a chyfnodau adrodd dilynol.

11.   Pwysau mewn cilogramau y pecynwaith ym mhob categori o becynwaith a gyflenwyd gan y cynhyrchydd yn ystod y cyfnod perthnasol.

12.   Pwysau mewn cilogramau y pecynwaith cartref ym mhob categori o becynwaith a gyflenwyd gan y cynhyrchydd yn ystod y cyfnod perthnasol.

13.—( 1) Dadansoddiad o’r pecynwaith a gyflenwyd ym mhob categori o becynwaith yn ystod y cyfnod perthnasol, gan bennu—

(a) pa un ai pecynwaith cynradd, pecynwaith cludo, pecynwaith eilaidd neu becynwaith trydyddol yw’r pecynwaith (sef y “math o becynwaith”);

(b) pwysau mewn cilogramau y pecynwaith a gyflenwyd ym mhob math o becynwaith;

(c) pwysau mewn cilogramau y pecynwaith cartref a gyflenwyd sy’n becynwaith cynradd neu’n becynwaith cludo;

(d) pwysau mewn cilogramau y pecynwaith, a nifer yr unedau o becynwaith, ym mhob categori o becynwaith sydd ar ffurf cynwysyddion diodydd.

(2) Yn is-baragraff (1)(d), ystyr “cynhwysydd diod” yw potel neu gan—

(a) sy’n cynnwys diod neu a oedd yn cynnwys diod,

(b) sydd wedi ei gwneud neu wedi ei wneud yn gyfan gwbl neu’n bennaf o blastig polyethylen tereffthalad (PET), gwydr, dur neu alwminiwm,

(c) sydd â chynhwysedd o 50 o fililitrau o leiaf ond dim mwy na thri litr o hylif,

(d) sydd wedi ei chynllunio neu ei gynllunio, neu wedi ei bwriadu neu ei fwriadu, i gael ei selio mewn cyflwr aerglos a dwrglos yn y man cyflenwi i dreuliwr yn y Deyrnas Unedig, ac

(e) nad yw wedi ei chreu neu ei greu, wedi ei chynllunio neu ei gynllunio nac wedi ei marchnata neu ei farchnata i gael ei hail-lenwi neu ei ail-lenwi nac ei hailddefnyddio neu ei ailddefnyddio mewn unrhyw ffordd arall gan unrhyw berson.

(3) Nid yw is-baragraff (1) yn gymwys mewn perthynas â phecynwaith wedi ei fewnforio sydd wedi ei daflu gan fewnforiwr.

14.   Rhaid i gynhyrchwyr sy’n ddosbarthwyr hefyd, ar gyfer pob cynhyrchydd mawr sy’n ddarostyngedig i rwymedigaethau o dan reoliad 15(4)(b) neu (3)(b) y mae’r cynhyrchydd wedi cyflenwi pecynwaith cartref nas llanwyd a phecynwaith nas llanwyd arall iddo yn ystod y cyfnod perthnasol, gadw cofnodion o’r canlynol—

(a) pwy yw’r cynhyrchydd,

(b) nifer yr unedau o becynwaith o’r fath a gyflenwyd, ac

(c) pwysau pecynwaith nas llanwyd a phecynwaith cartref nas llanwyd a gyflenwyd i’r cynhyrchydd hwnnw.

15.—( 1) Pan fo’r cynhyrchydd wedi sefydlu system o becynwaith y gellir ei ailddefnyddio, disgrifiad o’r system honno, gan gynnwys yr wybodaeth a ganlyn—

(a) pwysau mewn cilogramau yr holl becynwaith a gyflenwyd yn ystod y cyfnod perthnasol y gellir ei ailddefnyddio neu ei ail-lenwi;

(b) pwysau mewn cilogramau y pecynwaith y cyfeirir ato yn is-baragraff (a) sy’n becynwaith cynradd.

(2) Rhaid i’r wybodaeth a ddarperir o dan is-baragraff (1) gael ei rhoi ar gyfer pob categori o becynwaith a gyflenwyd gan y cynhyrchydd yn y cyfnod perthnasol.

(3) Nid oes ond angen i’r cynhyrchydd gynnwys gwybodaeth ynghylch pecynwaith cartref y gellir ei ailddefnyddio yn y flwyddyn y’i cyflenwir gyntaf.

16.—( 1) Pwysau mewn cilogramau y pecynwaith cartref a gyflenwyd gan y cynhyrchydd yn y cyfnod perthnasol ym mhob categori o becynwaith sy’n cynnwys eitemau a restrir yn is-baragraff (2).

(2) Mae’r eitemau a ganlyn yn berthnasol at ddibenion is-baragraff (1)—

(a) pecynwaith a roddir i dreulwyr gyda chludfwyd neu ddiodydd, gan gynnwys deunydd lapio, bocsys, cwpanau, dalwyr cwpanau, bagiau, papur a gwellt;

(b) pecynwaith ar felysion, pan fo’r melysion yn pwyso llai na 230 o gramau, gan gynnwys pecynwaith ar gwm cnoi a deunydd lapio siocled;

(c) pecynwaith ar sigaréts, sigârs, tybaco ac e-sigaréts;

(d) pecynnau creision neu becynwaith ar fyrbrydau sawrus eraill, pan fo’r creision neu’r byrbrydau yn pwyso llai na 60 o gramau;

(e) pecynwaith ar ddognau bwyd sengl y gellir eu bwyta ar unwaith heb eu paratoi ymhellach, gan gynnwys rholiau selsig, swshi, brechdanau, bisgedi a chacennau unigol;

(f) cartonau sy’n cynnwys 850 o fililitrau neu lai o ddiod y gellir yfed eu cynnwys ar unwaith heb ei wanedu â dŵr;

(g) cydau sy’n cynnwys llai na 600 o fililitrau o ddiod, y gellir yfed eu cynnwys ar unwaith heb ei wanedu â dŵr.

RHAN 4 Gwybodaeth sy’n ofynnol gan weithredwyr marchnadle ar-lein

17.   Rhaid i gynhyrchwyr sy’n weithredwyr marchnadle ar-lein—

(a) pan fo’r cynhyrchwyr yn gynhyrchwyr bach, gadw cofnodion o’r wybodaeth a nodir ym mharagraffau 18 a 19, a rhoi disgrifiad i CNC o’r fethodoleg a ddefnyddir ganddynt i goladu’r wybodaeth honno;

(b) pan fo’r cynhyrchwyr yn gynhyrchwyr mawr, gadw cofnodion o’r wybodaeth a nodir ym mharagraffau 18 a 19 ac adrodd arni, a rhoi disgrifiad i CNC o’r fethodoleg a ddefnyddir ganddynt i goladu’r wybodaeth honno.

18.   Pwysau mewn cilogramau y pecynwaith ym mhob categori o becynwaith a gyflenwyd gan y cynhyrchydd yn ystod y cyfnod perthnasol.

19.   Pwysau mewn cilogramau y pecynwaith cartref ym mhob categori o becynwaith a gyflenwyd gan y cynhyrchydd yn ystod y cyfnod perthnasol.

RHAN 5 Cyflenwi a thaflu pecynwaith fesul gwlad

20.   Rhaid i gynhyrchwyr sy’n ddarostyngedig i’r rhwymedigaethau casglu data yn rheoliad 16 gadw cofnodion o’r wybodaeth a ganlyn—

(a) i gynhyrchwyr bach sy’n werthwyr, yn weithredwyr marchnadle ar-lein, yn ddosbarthwyr, yn ddarparwyr gwasanaethau neu’n fewnforwyr, yr wybodaeth ym mharagraff 21(1);

(b) i gynhyrchwyr mawr sy’n berchnogion brand neu’n bacwyr/llanwyr, yr wybodaeth ym mharagraff 22;

(c) i bob cynhyrchydd mawr arall, yr wybodaeth ym mharagraffau 21 a 22;

(d) i gynhyrchwyr sy’n drwyddedwyr neu fusnesau gweithredu tafarn, yr wybodaeth ym mharagraffau 21 a 22(3).

21.—( 1) Pwysau mewn cilogramau—

(a) yr holl becynwaith a gyflenwir gan y cynhyrchydd, pan fo’r cynhyrchydd yn werthwr, yn weithredwr marchnadle ar-lein, yn ddosbarthwr neu’n ddarparwr gwasanaeth;

(b) yr holl becynwaith a waredir gan y cynhyrchydd, pan fo’r cynhyrchydd yn fewnforiwr;

mewn blwyddyn berthnasol ym mhob gwlad yn y Deyrnas Unedig, ym mhob categori o becynwaith.

(2) At ddibenion adroddiadau a gyflwynir mewn perthynas â’r blynyddoedd perthnasol 2024, 2025 a 2026, ond nid mewn perthynas ag unrhyw flynyddoedd diweddarach, caiff cynhyrchwyr—

(a) sy’n werthwyr sy’n cyflenwi pecynwaith eilaidd neu becynwaith trydyddol amcangyfrif swm y pecynwaith a gyflenwyd i wlad yn y Deyrnas Unedig er mwyn cyfrifo pwysau’r pecynwaith a gyflenwyd i’r wlad honno;

(b) sy’n fewnforwyr sy’n mewnforio pecynwaith eilaidd neu becynwaith trydyddol amcangyfrif swm y pecynwaith a daflwyd mewn gwlad yn y Deyrnas Unedig er mwyn cyfrifo pwysau’r pecynwaith a daflwyd yn y wlad honno.

(3) Nid yw is-baragraff (2) yn gymwys i becynwaith a gaiff ei gyflenwi yn uniongyrchol gan y gwerthwr i’r person sy’n ei ddefnyddio.

22.—( 1) Swm y gwastraff pecynwaith perthnasol a gasglwyd gan y cynhyrchydd yn ystod y cyfnod perthnasol o bersonau heblaw’r cynhyrchydd ac a anfonwyd i’w ailgylchu.

(2) Swm y gwastraff pecynwaith a gasglwyd gan y cynhyrchydd yn ystod y cyfnod perthnasol—

(a) sy’n wastraff pecynwaith y cynhyrchydd ei hun, a

(b) sy’n wastraff pecynwaith o bersonau eraill.

(3) Swm y gwastraff y cyfeirir ato yn is-baragraff (2)—

(a) a gasglwyd o bob gwlad yn y Deyrnas Unedig;

(b) a anfonwyd i wlad arall yn y Deyrnas Unedig i’w ailgylchu, gan nodi’r wlad o dan sylw.

(4) Rhaid datgan swm y gwastraff a ddatgenir o dan is-baragraffau (1) i (3) yn ôl y pwysau, mewn cilogramau, a rhaid dadansoddi’r swm ymhellach yn ôl y categori o becynwaith.

Rheoliad 15(7)

ATODLEN 2 Trwyddedwyr a Busnesau Gweithredu Tafarn

RHAN 1 Cyffredinol

1.—( 1) Mae prif sefydliad yn ddarostyngedig i rwymedigaethau casglu data o dan reoliad 16(6) yn y sefyllfaoedd a nodir ym mharagraff 2(1) pan fo’r amodau ym mharagraff 2(2) wedi eu bodloni.

(2) Pan fo rhwymedigaethau o’r fath ar brif sefydliad—

(a) mae paragraff 6 yn gymwys i bennu rhwymedigaethau trwyddedwr, a

(b) mae paragraff 8 yn gymwys i bennu rhwymedigaethau busnes gweithredu tafarn.

2.—( 1) Y sefyllfaoedd y cyfeirir atynt ym mharagraff 1 yw—

(a) y byddai rhwymedigaethau ar y prif sefydliad ac un neu ragor o’i aelodau o dan y Rheoliadau hyn, oni bai am y ffaith nad yw pob un ohonynt yn bodloni un o’r profion ar gyfer y meini prawf trothwy yn rheoliad 11(4) neu’r ddau ohonynt,

(b) y byddai rhwymedigaethau ar ddau neu ragor o aelodau o’r prif sefydliad o dan y Rheoliadau hyn, oni bai am y ffaith nad ydynt yn bodloni un o’r profion ar gyfer y meini prawf trothwy yn rheoliad 11(4) neu’r ddau ohonynt, neu

(c) bod rhwymedigaethau ar y prif sefydliad o dan y Rheoliadau hyn ac y byddai rhwymedigaethau ar un neu ragor o’i aelodau o dan y Rheoliadau hyn, oni bai am y ffaith nad yw’n bodloni un o’r profion ar gyfer y meini prawf trothwy yn rheoliad 11(4) neu’r ddau ohonynt.

(2) Yr amodau y cyfeirir atynt ym mharagraff 1 yw—

(a) bod y prif sefydliad yn bodloni’r prawf trothwy sy’n ymwneud â throsiant yn rheoliad 11(3)(a), a

(b) yn ddarostyngedig i baragraffau 3 a 4, bod y prif sefydliad ac un neu ragor o’i aelodau, neu ei aelodau yn unig, yn un o’r sefyllfaoedd yn is-baragraff (1)(a), (b) neu (c), gyda’i gilydd yn bodloni’r prawf trothwy sy’n ymwneud â phecynwaith a drinnir yn rheoliad 11(3)(b).

3.   Pan na fo gan y prif sefydliad yr wybodaeth sydd ei hangen at ddibenion Rhannau 2 a 3—

(a) rhaid i’r sefydliad wneud pob ymdrech i gael yr wybodaeth honno, a

(b) pan na fo’r wybodaeth honno gan y sefydliad, er gwaethaf gwneud pob ymdrech, rhaid iddo lunio ei amcangyfrif gorau a rhaid defnyddio’r amcangyfrif hwnnw at ddibenion Rhannau 2 a 3.

4.   At ddibenion yr Atodlen hon—

(a) ystyr “prif sefydliad” yw trwyddedwr neu fusnes gweithredu tafarn fel y’u diffinnir yn rheoliad 9, a

(b) ystyr “aelod” yw—

(i) pan fo’r prif sefydliad yn drwyddedwr, trwyddedai, sef y person y rhoddir iddo drwydded i ddefnyddio nod masnach gan y trwyddedwr o dan gytundeb trwyddedu fel y darperir ar ei gyfer yn rheoliad 9, neu

(ii) pan fo’r prif sefydliad yn fusnes gweithredu tafarn, tenant, sef y person y rhoddir iddo les neu denantiaeth gan y busnes gweithredu tafarn fel y darperir ar ei gyfer yn rheoliad 9.

RHAN 2 Trwyddedwyr

5.   Pan fo’r prif sefydliad yn drwyddedwr, at ddibenion penderfynu a yw’r amod yn rheoliad 11(3)(b) wedi ei fodloni ai peidio, ni chaniateir ond ystyried y pecynwaith neu’r deunyddiau pecynwaith a ganlyn—

(a) pecynwaith neu ddeunyddiau pecynwaith sy’n dwyn nod masnach y prif sefydliad y rhoddwyd trwydded i ddefnyddio’r nod masnach hwnnw ar ei gyfer neu ar eu cyfer o dan y cytundeb trwyddedu,

(b) pecynwaith sy’n gysylltiedig â nwyddau sy’n dwyn nod masnach y prif sefydliad y rhoddwyd trwydded i ddefnyddio’r nod masnach hwnnw ar ei gyfer o dan y cytundeb trwyddedu, ac

(c) pan fo rhwymedigaeth ar yr aelod—

(i) i brynu nwyddau mewn pecynwaith;

(ii) i brynu nwyddau a phecynwaith cysylltiedig neu ddeunyddiau pecynwaith i’w defnyddio i gynnwys neu i ddiogelu’r nwyddau hynny neu i hwyluso’r gwaith o drin y nwyddau hynny neu i gyflwyno’r nwyddau hynny;

(iii) i brynu pecynwaith neu ddeunyddiau pecynwaith i’w ddefnyddio neu i’w defnyddio i gynnwys neu i ddiogelu’r nwyddau hynny neu i hwyluso’r gwaith o drin y nwyddau hynny neu i gyflwyno’r nwyddau hynny;

o’r prif sefydliad neu, pan fo’r prif sefydliad wedi negodi rhai o’r telerau cyflenwi, neu bob un ohonynt, gyflenwr a enwir neu a awdurdodir gan y prif sefydliad o dan y cytundeb trwyddedu, y pecynwaith hwnnw neu’r deunyddiau pecynwaith hynny.

6.   Pan fo’r prif sefydliad yn drwyddedwr—

(a) pan fo sefyllfa sy’n dod o fewn paragraff 2(1)(a) neu (b) a bo’r amodau ym mharagraff 2(2) wedi eu bodloni—

(i) bernir bod y prif sefydliad yn gynhyrchydd sy’n perthyn i ddosbarth neu ddosbarthau a bennir yn rheoliad 8, a

(ii) mae rhwymedigaethau casglu data ar y prif sefydliad mewn cysylltiad â’i weithgareddau ei hun, pan fo’n gymwys, a gweithgareddau ei aelodau mewn cysylltiad â’r pecynwaith neu’r deunyddiau pecynwaith a nodir ym mharagraff 5;

(b) pan fo sefyllfa sy’n dod o fewn baragraff 2(1)(c) a bo’r amodau ym mharagraff 2(2) wedi eu bodloni—

(i) mae rhwymedigaethau ar y prif sefydliad fel cynhyrchydd mewn cysylltiad â’i weithgareddau ei hun,

(ii) bernir bod y prif sefydliad yn gynhyrchydd un neu ragor o’r dosbarthau a bennir yn rheoliad 8, a

(iii) mae rhwymedigaethau casglu data ar y prif sefydliad mewn cysylltiad â gweithgareddau ei aelodau mewn cysylltiad â’r pecynwaith neu’r deunyddiau pecynwaith a nodir ym mharagraff 5.

RHAN 3 Busnesau gweithredu tafarn

7.—( 1) Pan fo’r prif sefydliad yn fusnes gweithredu tafarn, at ddibenion penderfynu a yw’r amod yn rheoliad 11(4)(b) wedi ei fodloni ai peidio, ni chaniateir ond ystyried y pecynwaith neu’r deunyddiau pecynwaith a bennir yn is-baragraff (2).

(2) Y pecynwaith neu’r deunyddiau pecynwaith y cyfeirir atynt yn is-baragraff (1) yw pecynwaith neu ddeunyddiau pecynwaith sy’n cynnwys y nwyddau sy’n ddarostyngedig i’r rhwymedigaeth i brynu o’r prif sefydliad neu o berson a enwebir neu a awdurdodir gan y prif sefydliad hwnnw o dan y cytundeb gweithredu tafarn, pa un a yw’r nwyddau wedi eu pacio neu wedi eu llenwi yn y pecynwaith neu’r deunyddiau pecynwaith ai peidio pan gânt eu prynu gan yr aelod.

8.   Pan fo’r prif sefydliad yn fusnes gweithredu tafarn—

(a) pan fo sefyllfa sy’n dod o fewn paragraff 2(1)(a) neu (b) a bo’r amodau ym mharagraff 2(2) wedi eu bodloni—

(i) bernir bod y prif sefydliad yn gynhyrchydd sy’n perthyn i un neu ragor o’r dosbarthau a bennir yn rheoliad 8, a

(ii) mae rhwymedigaethau casglu data ar y prif sefydliad mewn cysylltiad â’i weithgareddau ei hun, pan fo’n gymwys, a gweithgareddau ei aelodau mewn cysylltiad â’r pecynwaith neu’r deunyddiau pecynwaith a nodir ym mharagraff 7(2), neu

(b) pan fo sefyllfa sy’n dod o fewn paragraff 2(1)(c) a bo’r amodau ym mharagraff 2(2) wedi eu bodloni—

(i) mae rhwymedigaethau ar y prif sefydliad fel cynhyrchydd mewn cysylltiad â’i weithgareddau ei hun,

(ii) bernir bod y prif sefydliad yn gynhyrchydd sy’n perthyn i un neu ragor o’r dosbarthau a bennir yn rheoliad 8, a

(iii) mae rhwymedigaethau casglu data ar y prif sefydliad mewn cysylltiad â gweithgareddau ei aelodau mewn cysylltiad â’r pecynwaith neu’r deunyddiau pecynwaith a nodir ym mharagraff 7(2).