Rheoliadau Iechyd y Cyhoedd (Gwarchodaeth Rhag Troi Allan) (Cymru) (Coronafeirws) 2020

Offerynnau Statudol Cymru

2020 Rhif 1490 (Cy. 319)

Iechyd Y Cyhoedd, Cymru

Rheoliadau Iechyd y Cyhoedd (Gwarchodaeth Rhag Troi Allan) (Cymru) (Coronafeirws) 2020

Cymeradwywyd gan Senedd Cymru

Gwnaed

9 Rhagfyr 2020

Gosodwyd gerbron Senedd Cymru

10 Rhagfyr 2020

Yn dod i rym yn unol â rheoliad 1(2)

Mae Gweinidogion Cymru yn gwneud y Rheoliadau a ganlyn drwy arfer y pwerau a roddir iddynt gan adrannau 45C(1), (2), (3)(c) a 45P(2) o Ddeddf Iechyd y Cyhoedd (Rheoli Clefydau) 1984(1).

Mae’r Rheoliadau hyn wedi eu gwneud mewn ymateb i’r bygythiad difrifol ac uniongyrchol i iechyd y cyhoedd a berir gan fynychder a lledaeniad coronafeirws syndrom anadlol acíwt difrifol 2 (SARS-CoV-2) yng Nghymru.

Mae Gweinidogion Cymru yn ystyried bod y cyfyngiadau a’r gofynion a osodir gan y Rheoliadau hyn yn gymesur â’r hyn y maent yn ceisio ei gyflawni, sef ymateb iechyd y cyhoedd i’r bygythiad hwnnw.

Yn unol ag adran 45R o’r Ddeddf honno, oherwydd brys, mae Gweinidogion Cymru o’r farn ei bod yn angenrheidiol gwneud yr offeryn hwn heb fod drafft wedi ei osod gerbron Senedd Cymru ac wedi ei gymeradwyo ganddi drwy benderfyniad.

Enwi, cychwyn, cymhwyso a dehongli

1.—( 1) Enw’r Rheoliadau hyn yw Rheoliadau Iechyd y Cyhoedd (Gwarchodaeth Rhag Troi Allan) (Cymru) (Coronafeirws) 2020.

(2) Daw’r Rheoliadau hyn i rym drannoeth y diwrnod y’u gosodir.

(3) Mae’r Rheoliadau hyn yn gymwys o ran Cymru.

(4) Yn y Rheoliadau hyn, mae i “tŷ annedd” yr un ystyr ag a roddir i “dwelling-house” yn Neddf Tai 1985, Deddf Tai 1988 neu Ddeddf Rhenti 1977, yn ôl y digwydd.

Tenantiaethau Preswyl (Gwarchodaeth Rhag Troi Allan)

2.—( 1) Yn ddarostyngedig i baragraffau (2) a (3), ni chaiff unrhyw berson fod yn bresennol mewn tŷ annedd at ddiben—

(a) gweithredu gwrit neu warant meddiant;

(b) gweithredu gwrit neu warant adfer; neu

(c) danfon hysbysiad troi allan.

(2) Nid yw paragraff (1) yn gymwys pan fo’r llys wedi ei fodloni bod yr hysbysiad, y writ neu’r warant yn ymwneud â gorchymyn meddiant a wneir—

(a) yn erbyn tresmaswyr yn unol â hawliad y mae rheol 55.6 (cyflwyno hawliadau yn erbyn tresmaswyr) o Reolau’r Drefniadaeth Sifil 1998(2) yn gymwys iddo;

(b) yn llwyr neu’n rhannol o dan adran 84A (sail absoliwt ar gyfer meddiannu am ymddygiad gwrthgymdeithasol) o Ddeddf Tai 1985(3);

(c) yn llwyr neu’n rhannol ar Sail 2 neu Sail 2A yn Atodlen 2 (seiliau ar gyfer meddiannu tai annedd sy’n cael eu gosod o dan denantiaethau diogel) i Ddeddf Tai 1985(4);

(d) yn llwyr neu’n rhannol ar Sail 7A, Sail 14 neu Sail 14A yn Atodlen 2 (seiliau ar gyfer meddiannu tai annedd sy’n cael eu gosod o dan denantiaethau sicr) i Ddeddf Tai 1988(5);

(e) yn llwyr neu’n rhannol ar Sail 7 yn Atodlen 2 (sail ar gyfer meddiannu pan fo tenant yn marw ac na cheir hawl olyniaeth) i Ddeddf Tai 1988(6); neu

(f) yn llwyr neu’n rhannol o dan achos 2 o Atodlen 15 (sail ar gyfer meddiannu tai annedd sy’n cael eu gosod o dan denantiaethau gwarchodedig neu statudol, neu sy’n ddarostyngedig iddynt) i Ddeddf Rhenti 1977(7).

(3) Pan fo paragraff 2(e) yn gymwys, rhaid i’r person sy’n bresennol yn y tŷ annedd gymryd camau rhesymol i’w fodloni ei hun nad yw’r tŷ annedd wedi ei feddiannu cyn cyflawni’r materion hynny a nodir yn rheoliad 2(1)(a), (b) neu (c).

Y Rheoliadau yn dod i ben

3.—( 1) Daw’r Rheoliadau hyn i ben ar 11 Ionawr 2021.

(2) Nid yw’r ffaith bod y Rheoliadau hyn wedi dod i ben yn effeithio ar ddilysrwydd unrhyw beth a wneir neu nas gwneir yn unol â’r Rheoliadau hyn cyn iddynt ddod i ben.

Julie James

Y Gweinidog Tai a Llywodraeth Leol, un o Weinidogion Cymru

9 Rhagfyr 2020

NODYN ESBONIADOL

(Nid yw’r nodyn hwn yn rhan o’r Rheoliadau)

Mae adran 45C o Ddeddf Iechyd y Cyhoedd (Rheoli Clefydau) 1984 yn galluogi Gweinidogion Cymru fel “The appropriate Minister”, drwy reoliadau, i wneud darpariaeth at ddiben atal, diogelu rhag, rheoli neu ddarparu ymateb iechyd y cyhoedd i fynychder neu ledaeniad haint neu halogiad yng Nghymru.

Mae’r Rheoliadau hyn wedi eu gwneud mewn ymateb i’r bygythiad difrifol ac uniongyrchol i iechyd y cyhoedd a berir gan fynychder a lledaeniad coronafeirws syndrom anadlol acíwt difrifol 2 (SARS-CoV-2) yng Nghymru.

Mae’r Rheoliadau hyn yn atal, ac eithrio o dan amgylchiadau penodedig, bod yn bresennol mewn tŷ annedd at ddiben gweithredu gwrit neu warant meddiant, gweithredu gwrit neu warant adfer neu ddanfon hysbysiad troi arall.

Yr amgylchiadau penodedig yw pan fo’r llys wedi ei fodloni bod yr hawliad yn un yn erbyn tresmaswyr sy’n bersonau anhysbys neu pan y’i gwnaed yn llwyr neu’n rhannol ar sail trais domestig, troseddau difrifol, ymddygiad gwrthgymdeithasol, niwsans neu, mewn achosion pan fo’r person sy’n bresennol wedi ei fodloni nad yw’r tŷ annedd wedi ei feddiannau ar yr adeg pan fo’n bresennol, farwolaeth y meddiannydd.

Daw’r Rheoliadau hyn i ben ar 11 Ionawr 2021.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, ni luniwyd asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn.

(1)

1984 p. 22. Mewnosodwyd adrannau 45C a 45P gan adran 129 o Ddeddf Iechyd a Gofal Cymdeithasol 2008 (p. 14). Mae’r swyddogaethau o dan yr adrannau hyn wedi eu rhoi i “The appropriate Minister” (“y Gweinidog priodol”). O dan adran 45T(6) o Ddeddf 1984 y Gweinidog priodol, o ran Cymru, yw Gweinidogion Cymru.

(2)

O.S. 1998/3132. Mewnosodwyd rheol 55.6 gan O.S. 2001/256 rh 17, Atodlen 1.

(3)

1985 p. 68, mewnosodwyd adran 84A gan adran 94(1) o Ddeddf Ymddygiad Gwrthgymdeithasol, Troseddu a Phlismona 2014 (“Deddf 2014”).

(4)

Amnewidiwyd Sail 2 gan adran 144 o Ddeddf Tai 1996 (p. 52) (“Deddf 1996”) ac fe’i diwygiwyd gan adran 98(1) o Ddeddf 2014 ac Atodlen 7 i Ddeddf Troseddu Cyfundrefnol Difrifol a’r Heddlu 2005 (p. 15) (“Deddf 2005”). Mewnosodwyd Sail 2A gan adran 145 o Ddeddf 1996 ac fe’i diwygiwyd gan Atodlen 8 i Ddeddf Partneriaeth Sifil 2004 (p. 33) (“Deddf 2004”) a chan Atodlen 3 i O.S. 2019/1458.

(5)

1988 p. 50. Mewnosodwyd Sail 7A gan adran 97(1) o Ddeddf 2014. Amnewidiwyd Sail 14 gan adran 148 o Ddeddf 1996 ac fe’i diwygiwyd gan adran 98(2) o Ddeddf 2014 ac Atodlen 7 i Ddeddf 2005. Mewnosodwyd Sail 14A gan adran 149 o Ddeddf 1996 ac fe’i diwygiwyd gan Atodlen 8 i Ddeddf 2004, O.S. 2019/1458, O.S. 2010/866 ac O.S. 2011/1396.

(6)

Diwygiwyd Sail 7 gan adran 162 o Ddeddf Lleoliaeth 2011 (p. 20) ac Atodlen 25 iddi.

(7)

1977 p. 42.