Rheoliadau Newid yn yr Hinsawdd (Cyllidebau Carbon) (Cymru) 2018

Offerynnau Statudol Cymru

2018 Rhif 1303 (Cy. 257)

Newid Yn Yr Hinsawdd, Cymru

Rheoliadau Newid yn yr Hinsawdd (Cyllidebau Carbon) (Cymru) 2018

Gwnaed

5 Rhagfyr 2018

Yn dod i rym

6 Rhagfyr 2018

Gosodwyd drafft o’r offeryn hwn gerbron Cynulliad Cenedlaethol Cymru ac fe’i cymeradwywyd ganddo drwy benderfyniad yn unol ag adran 48(3) o Ddeddf yr Amgylchedd (Cymru) 2016(1).

Cyn i’r drafft gael ei osod, cafodd Gweinidogion Cymru gyngor gan y Pwyllgor ar Newid Hinsawdd, ac fe wnaethant ystyried y cyngor a gafwyd, yn unol ag adran 49(1) o’r Ddeddf.

Mae Gweinidogion Cymru, yn unol ag adran 32(1)(b) o’r Ddeddf, yn fodlon bod y cyllidebau carbon sydd wedi eu nodi yma yn gyson â chyrraedd targed allyriadau 2050.

Wrth ddrafftio’r Rheoliadau hyn, yn unol ag adran 32(3), mae Gweinidogion Cymru wedi rhoi sylw i’r materion a restrir yn adran 32(3) o’r Ddeddf.

Yn unol â hynny, mae Gweinidogion Cymru, drwy arfer y pwerau a roddir gan adran 31(1) o Ddeddf yr Amgylchedd (Cymru) 2016, yn gwneud y Rheoliadau a ganlyn.

Enwi a chychwyn

1.—( 1) Enw’r Rheoliadau hyn yw Rheoliadau Newid yn yr Hinsawdd (Cyllidebau Carbon) (Cymru) 2018.

(2) Daw’r Rheoliadau hyn i rym drannoeth y diwrnod y’u gwneir.

Cyllidebau Carbon

2.—( 1) Mae’r gyllideb garbon ar gyfer y cyfnod cyllidebol 2016 i 2020 wedi ei chyfyngu i gyfartaledd o 23% yn is na’r waelodlin.

(2) Mae’r gyllideb garbon ar gyfer y cyfnod cyllidebol 2021 i 2025 wedi ei chyfyngu i gyfartaledd o 33% yn is na’r waelodlin.

Lesley Griffiths

Ysgrifennydd y Cabinet dros Ynni, Cynllunio a Materion Gwledig, un o Weinidogion Cymru.

5 Rhagfyr 2018

NODYN ESBONIADOL

(Nid yw’r nodyn hwn yn rhan o’r Rheoliadau)

Mae’r Rheoliadau hyn yn darparu cyfanswm uchaf ar gyfer cyfrif allyriadau net Cymru (cyllideb garbon) am y ddau gyfnod cyllidebol cyntaf, 2016-2020 a 2021-2025, y darperir ar eu cyfer yn adran 31(3) o Ddeddf yr Amgylchedd (Cymru) 2016.

Diben Rhan 2 o Ddeddf yr Amgylchedd (Cymru) 2016 yw ei gwneud yn ofynnol i Weinidogion Cymru gyrraedd targedau ar gyfer lleihau allyriadau net nwyon tŷ gwydr o Gymru. Mae adran 29 yn gosod dyletswydd ar Weinidogion Cymru i sicrhau bod allyriadau net Cymru ar gyfer y flwyddyn 2050 o leiaf 80% yn is na gwaelodlin ffigurau allyriadau 1990.

Mae adran 31(1) yn darparu bod Gweinidogion Cymru yn gosod cyllidebau carbon ar gyfer pob cyfnod cyllidebol o 5 mlynedd rhwng 2016 a 2050. Mae adran 32(2) yn ei gwneud yn ofynnol i bob cyllideb garbon a osodir gan Weinidogion Cymru gael ei gosod ar lefel sy’n gyson â chyrraedd Targed 2050.

Mae rheoliad 2 yn darparu bod y gyllideb garbon ar gyfer y cyfnod cyllidebol 2016-2020 wedi ei chyfyngu i gyfartaledd o 23% yn is na’r waelodlin a bod y gyllideb garbon ar gyfer y cyfnod cyllidebol 2021-2025 wedi ei chyfyngu i gyfartaledd o 33% yn is na’r waelodlin.

Yn unol ag adran 49 o’r Ddeddf, mae Gweinidogion Cymru wedi cael cyngor gan y corff cynghori, ac wedi ystyried y cyngor a gafwyd, cyn gosod rheoliadau drafft.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, lluniwyd asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn. Gellir cael copi oddi wrth: Llywodraeth Cymru, Parc Cathays, Caerdydd, CF10 3NQ.

(1)

2016 dccc 3.