Rheoliadau Ychwanegion Bwyd Anifeiliaid (Awdurdodiadau) (Cymru) 2022

NODYN ESBONIADOL

(Nid yw’r nodyn hwn yn rhan o’r Rheoliadau)

Mae Gweinidogion Cymru yn gwneud y Rheoliadau hyn yn unol â Rheoliad (EC) Rhif 1831/2003 Senedd Ewrop a’r Cyngor ar ychwanegion sydd i’w defnyddio mewn maeth anifeiliaid (“Rheoliad 1831/2003”). Mae’r Rheoliadau hyn yn gwneud darpariaeth ar gyfer awdurdodi 11 o ychwanegion bwyd anifeiliaid.

Mae rheoliad 3 ac Atodlenni 1 i 11 yn darparu ar gyfer awdurdodi’r ychwanegion bwyd anifeiliaid a ganlyn—

• mae Atodlen 1 yn awdurdodiad newydd, ar gyfer paratoad o gelad manganîs o lysin ac asid glwtamig (rhif adnabod 3b509);

• mae Atodlen 2 yn awdurdodiad newydd, ar gyfer paratoad o Lactobacillus buchneri DSM 29026 (rhif adnabod 1k20759);

• mae Atodlen 3 yn awdurdodiad newydd, ar gyfer paratoad o Broteas serin (EC 3.4.21.-) a gynhyrchir gan Bacillus licheniformis (DSM 19670) (rhif adnabod 4a13);

• mae Atodlen 4 yn adnewyddu awdurdodiad Pyridocsin hydroclorid (fitamin B₆) (rhif adnabod 3a831);

• mae Atodlen 5 yn adnewyddu awdurdodiad paratoad o Saccharomyces cerevisiae CNCM I-4407 (rhif adnabod 4b1702). Mae enw’r straen bacterol wedi ei newid o “Saccharomyces cerevisiae NCYC Sc 47” i “Saccharomyces cerevisiae CNCM I-4407”;

• mae Atodlen 6 yn adnewyddu awdurdodiad paratoad o Bacillus velezensis (ATCC PTA-6737) (rhif adnabod 4b1823) ac yn estyn y defnydd awdurdodedig presennol i gwmpasu pob mân rywogaeth dofednod (ac eithrio ar gyfer dodwy), adar addurnol, adar helwriaeth ac adar hela. Addaswyd yr awdurdodiad fel a ganlyn:

  • newidir enw’r straen bacterol o “Bacillus subtilis” i “Bacillus velezensis”;

  • cynyddir isafswm cynnwys yr ychwanegyn bwyd anifeiliaid yn y paratoad o 1x10¹⁰ i 8x10¹⁰ o unedau ffurfio cytref fesul gram (CFU/g);

• mae Atodlen 7 yn awdurdodiad newydd ar gyfer paratoad o Bacillus licheniformis DSM 28710 (rhif adnabod 4b1828);

• mae Atodlen 8 yn adnewyddu awdurdodiadau paratoad o Clostridium butyricum (FERM BP-2789) (rhif adnabod 4b1830) ac yn ei awdurdodi ar gyfer defnydd newydd mewn bwyd anifeiliaid ar gyfer ieir i’w pesgi, perchyll sugno a mân rywogaethau teulu’r moch (sugno);

• mae Atodlen 9 yn awdurdodiad newydd, ar gyfer paratoad o 6-ffytas a gynhyrchir gan Komagataella phaffii DSM 32854 (rhif adnabod 4a32);

• mae Atodlen 10 yn awdurdodi fformiwleiddiad newydd o ddecocwinad (Deccox^®) (rhif adnabod E756) fel decocwinad (Deccox^®) (rhif adnabod 51756i);

• mae Atodlen 11 yn awdurdodi ffurf addasedig o ddecocwinad (Deccox^®) (rhif adnabod E756) fel decocwinad (Avi-Deccox^® 60G) (rhif adnabod 51756ii). Mae’r ychwanegyn bwyd anifeiliaid hwn yn wahanol i ddecocwinad (Deccox^®) o ran ei ffurf ffisegol ac oherwydd calsiwm sylffad deuhydrad yw’r gwanedydd a ddefnyddir.

Mae rheoliad 3(2) yn darparu bod awdurdodiadau a roddir gan y Rheoliadau hyn yn ddilys am gyfnod o ddeng mlynedd yn unol ag Erthygl 9(7) o Reoliad 1831/2003. Mae hyn yn ddarostyngedig i Erthygl 14(4) o’r Rheoliad hwnnw, sy’n darparu ar gyfer estyn cyfnod yr awdurdodiad o dan amgylchiadau penodol pan fo cais i adnewyddu wedi ei gyflwyno.

Mae rheoliadau 4 i 7 yn diwygio pedwar o Reoliadau’r UE a ddargedwir sy’n awdurdodi’r ychwanegyn bwyd anifeiliaid Bacillus subtilis ATCC PTA-6737 ar gyfer gwahanol is-grwpiau o ddofednod a moch. Mae enw’r straen bacterol wedi ei ddiweddaru o “Bacillus subtilis” i “Bacillus velezensis”. Mae rheoliad 10(1) yn cynnwys darpariaeth drosiannol sy’n caniatáu i gynhyrchion a labelwyd gan ddefnyddio’r enw “ Bacillus subtilis” barhau i gael eu marchnata a’u defnyddio o dan yr awdurdodiadau perthnasol er gwaethaf newid yr enw.

Mae rheoliad 8 ac Atodlen 12 yn dirymu, o ran Cymru, Reoliadau’r UE a ddargedwir sy’n cynnwys awdurdodiadau ymlaen llaw ar gyfer yr ychwanegion bwyd anifeiliaid sydd bellach wedi eu hawdurdodi gan Atodlenni 3, 4, 5, 6, 8 a 10.

Mae rheoliadau 9, 10(2) i (5) ac 11 yn cynnwys darpariaethau trosiannol sy’n caniatáu parhau i gynhyrchu a labelu cynhyrchion, am gyfnodau cyfyngedig o amser, o dan amodau awdurdodiadau ymlaen llaw o’r ychwanegion bwyd anifeiliaid perthnasol. Caiff yr ychwanegion bwyd anifeiliaid hynny eu hawdurdodi bellach gan Atodlenni 5, 6 a 10 yn y drefn honno.

Gellir cael rhagor o wybodaeth, gan gynnwys mewn perthynas ag unrhyw ddogfennaeth y cyfeirir ati yn yr Atodlenni, gan yr Asiantaeth Safonau Bwyd, Llawr 11, Tŷ Southgate, Caerdydd, CF10 1EW neu drwy anfon e-bost i [e-mail].

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, ystyriwyd nad oedd yn angenrheidiol cynnal asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn.