Rheoliadau Deddf Parciau Cenedlaethol a Mynediad i Gefn Gwlad 1949 (Ystyr Corff Cyhoeddus) (Cymru) 2021

Offerynnau Statudol Cymru

2021 Rhif 1359 (Cy. 355)

Llywodraeth Leol, Cymru

Diogelu’r Amgylchedd, Cymru

Rheoliadau Deddf Parciau Cenedlaethol a Mynediad i Gefn Gwlad 1949 (Ystyr Corff Cyhoeddus) (Cymru) 2021

Gwnaed

Am 9.50 a.m. ar 1 Rhagfyr 2021

Yn dod i rym

3 Rhagfyr 2021

Mae Gweinidogion Cymru yn gwneud y Rheoliadau hyn drwy arfer y pwerau a roddir iddynt gan adrannau 84(2)(a) a 174 o Ddeddf Llywodraeth Leol ac Etholiadau (Cymru) 2021(1).

Gosodwyd drafft o’r offeryn hwn gerbron Senedd Cymru ac fe’i cymeradwywyd ganddi drwy benderfyniad yn unol ag adran 174(4) a (5)(l) o’r Ddeddf honno.

Enwi a dod i rym

1.—( 1) Enw’r Rheoliadau hyn yw Rheoliadau Deddf Parciau Cenedlaethol a Mynediad i Gefn Gwlad 1949 (Ystyr Corff Cyhoeddus) (Cymru) 2021.

(2) Daw’r Rheoliadau hyn i rym ar 3 Rhagfyr 2021.

Diwygio adran 11A o Ddeddf Parciau Cenedlaethol a Mynediad i Gefn Gwlad 1949

2.—( 1) Mae adran 11A (dyletswydd cyrff a phersonau penodol i roi sylw i’r dibenion y dynodwyd Parciau Cenedlaethol ar eu cyfer) o Ddeddf Parciau Cenedlaethol a Mynediad i Gefn Gwlad 1949(2) wedi ei diwygio fel a ganlyn.

(2) Yn is-adran (4), yn y diffiniad o “public body”, ar ôl “local authority,” mewnosoder “corporate joint committee,”.

(3) Ar ôl is-adran (6) mewnosoder—

“(7) In this section, “corporate joint committee” means a corporate joint committee established by regulations made under Part 5 of the Local Government and Elections (Wales) Act 2021.”

Rebecca Evans

Y Gweinidog Cyllid a Llywodraeth Leol, un o Weinidogion Cymru

Am 9.50 a.m. ar 1 Rhagfyr 2021

NODYN ESBONIADOL

(Nid yw’r nodyn hwn yn rhan o’r Rheoliadau)

Mae’r Rheoliadau hyn yn diwygio adran 11A o Ddeddf Parciau Cenedlaethol a Mynediad i Gefn Gwlad 1949 (p. 97) (“Deddf 1949”). Mae adran 11A(2) yn darparu, wrth arfer neu gyflawni unrhyw swyddogaeth mewn perthynas â thir, neu sy’n effeithio ar dir, mewn unrhyw Barc Cenedlaethol, bod rhaid i “relevant authority” roi sylw i’r dibenion a bennir yn adran 5(1) o Ddeddf 1949.

Cadw a gwella’r harddwch naturiol, y bywyd gwyllt a’r dreftadaeth ddiwylliannol a hyrwyddo cyfleoedd i’r cyhoedd ddeall a mwynhau nodweddion arbennig Parciau Cenedlaethol yw’r dibenion yn adran 5(1).

Mae’r awdurdodau sy’n ddarostyngedig i’r ddyletswydd hon wedi eu diffinio yn adran 11A(3) ac maent yn cynnwys “any public body”, y mae ei ddiffiniad yn cynnwys unrhyw “local authority, joint board or joint committee” (adran 11A(4)).

Mae’r Rheoliadau hyn yn diwygio adran 11A(4) fel bod cyd-bwyllgorau corfforedig a sefydlir drwy reoliadau a wneir o dan Ran 5 o Ddeddf Llywodraeth Leol ac Etholiadau (Cymru) 2021 (dsc 1) (“Deddf 2021”), wedi eu cynnwys yn y diffiniad o “public body”. Drwy hyn, mae cyd-bwyllgorau corfforedig yn ddarostyngedig i’r ddyletswydd yn adran 11A(2).

Mae’r Rheoliadau hyn yn gysylltiedig â rheoliadau a oedd yn sefydlu cyd-bwyllgorau corfforedig penodol o dan Ran 5 o Ddeddf 2021.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r rheoliadau sy’n sefydlu cyd-bwyllgorau corfforedig a gorchmynion a rheoliadau cysylltiedig. O ganlyniad, lluniwyd asesiad effaith rheoleiddiol. Gellir cael copi oddi wrth: yr Is-adran Cyllid Strategol Llywodraeth Leol, Llywodraeth Cymru, Parc Cathays, Caerdydd, CF10 3NQ.

(1)

2021 dsc 1.

(2)

1949 p. 97. Mewnosodwyd adran 11A gan Ddeddf yr Amgylchedd 1995 (p. 25), adran 62(1) ac fe’i diwygiwyd gan Ddeddf yr Amgylchedd Naturiol a Chymunedau Gwledig 2006 (p. 16), Atodlen 12, paragraff 1 a Deddf yr Amgylchedd 1995 (p. 25), Atodlen 24, paragraff 1.