Rheoliadau Llaeth Ysgol (Cymru) 2017

NODYN ESBONIADOL

(Nid yw’r nodyn hwn yn rhan o’r Rheoliadau)

Mae’r Rheoliadau hyn yn diddymu ac yn disodli Rheoliadau Llaeth Ysgol (Cymru) 2008 (“Rheoliadau 2008”) (fel y’u diwygiwyd) yn sgil newidiadau yng nghyfraith yr UE. Mae rheoliad 10 o’r Rheoliadau hyn yn darparu ar gyfer dirymu Rheoliadau 2008 a’r darpariaethau eraill sydd wedi diwygio Rheoliadau 2008.

Mae Rheoliad (EU) Rhif 1308/2013 Senedd Ewrop a’r Cyngor dyddiedig 17 Rhagfyr 2013 sy’n sefydlu cyd-drefniadaeth ar gyfer y marchnadoedd mewn cynhyrchion amaethyddol yn cael ei ddiwygio gan Reoliad (EU) 2016/791 Senedd Ewrop a’r Cyngor dyddiedig 11 Mai 2016 sy’n diwygio Rheoliadau (EU) Rhif 1308/2013 ac (EU) Rhif 1306/2013 o ran y cynllun cymorth ar gyfer cyflenwi ffrwythau a llysiau a llaeth mewn sefydliadau addysgol.

Offerynnau newydd yr UE sy’n berthnasol drwy ychwanegu at Reoliad (EU) Rhif 1308/2013 yn y cyd-destun hwn yw Rheoliad Gweithredu’r Comisiwn (EU) 2017/39 dyddiedig 3 Tachwedd 2016 a Rheoliad Dirprwyedig y Comisiwn (EU) 2017/40 dyddiedig 3 Tachwedd 2016.

Mae’r gyfraith UE newydd yn delio â’r un pwnc â’r gyfraith UE y mae’n ei dirymu ac yn ei disodli, hynny yw, y rheolau sy’n llywodraethu’r ddarpariaeth o gymorth Undeb ar gyfer llaeth a chynhyrchion eraill mewn sefydliadau addysgol.

Caniateir taliadau cymorth gwladol gan Erthygl 23a(6) o Reoliad (EU) Rhif 1308/2013 (fel y’i diwygiwyd). Mae rheoliad 3 o’r Rheoliadau hyn yn darparu y gall Gweinidogion Cymru dalu’r cymorth gwladol hwn i geiswyr sy’n cael cymorth Undeb ac yn cadarnhau y caiff Gweinidogion Cymru bennu’r math neu’r dosbarth o sefydliad addysgol neu gynhyrchion llaeth y caniateir talu cymorth gwladol mewn perthynas â hwy. Mae hefyd yn darparu bod unrhyw daliad cymorth gwladol yn ddarostyngedig i’r un rheolau, gofynion ac amodau ag sy’n gymwys i gymorth Undeb.

Mae rheoliad 4 yn darparu, pan fo cymorth gwladol yn cael ei roi mewn cysylltiad â chyflenwi llaeth cyflawn neu laeth hanner sgim, â chyflas neu heb gyflas, i ddisgyblion sy’n cael addysg mewn sefydliad addysgol cymhwysol ac sydd yn y flwyddyn derbyn, blwyddyn 1 neu flwyddyn 2, y caiff cyfanswm y cymorth hwnnw fod yn swm sy’n ddigonol at ddibenion talu unrhyw gost a fyddai fel arall yn gorfod cael ei thalu gan y disgyblion hynny neu gan eu rhieni neu eu gwarcheidwaid o dan amgylchiadau pan na fo cymorth Cymunedol yn talu’n llawn am gost cyflenwi’r cynnyrch hwnnw.

Mae’r Rheoliadau hyn hefyd yn darparu ar gyfer cadw’n ôl neu adennill unrhyw gymorth Undeb neu unrhyw daliad gwladol, a wneir o dan reoliad 3 o’r Rheoliadau, nad yw ceisydd yn gymwys i’w gael neu pan fo’r ceisydd wedi torri unrhyw ymrwymiadau a roddwyd fel amod o’r cymorth Undeb hwnnw neu’r cymorth gwladol hwnnw (rheoliad 5). Mae rheoliad 6 yn darparu ar gyfer codi llog.

Mae’n ofynnol i Aelod-wladwriaethau ymgymryd â gwiriadau gweinyddol a gwiriadau yn y fan a’r lle o fangre’r ceisydd o dan Erthyglau 9 a 10 o Reoliad Gweithredu’r Comisiwn (EU) 2017/39. Mae rheoliadau 7 (pwerau mynediad) ac 8 (pwerau arolygu) yn helpu Gweinidogion Cymru (drwy bersonau awdurdodedig) i gydymffurfio â rhwymedigaethau’r UE i ymgymryd â gwiriadau yn y fan a’r lle effeithiol er mwyn sicrhau cydymffurfedd ac atal gwallau a thwyll.

Mae rheoliad 9 yn diwygio Rheoliadau Cynlluniau Cymorth y Polisi Amaethyddol Cyffredin nad ydynt yn rhai IACS (Apelau) (Cymru) 2004 o ganlyniad i’r newidiadau sy’n cael eu gwneud i gyfraith yr UE. O dan y Rheoliadau hynny gall Gweinidogion Cymru barhau i sefydlu gweithdrefn ar gyfer rhoi ystyriaeth bellach i benderfyniad cychwynnol a wneir o dan y Cynllun Llaeth Ysgol.