Adran 22: Cyfnod para darpariaethau’r isafbris
82.Mae’r adran hon yn darparu i’r gyfundrefn isafbris a sefydlir gan y Ddeddf beidio â chael effaith ar ôl 6 mlynedd o’r dyddiad y daw adran 2 i rym, oni bai bod Gweinidogion Cymru yn gwneud rheoliadau, cyn i’r gyfundrefn beidio â chael effaith, sy’n darparu fel arall. Ni all Gweinidogion Cymru wneud rheoliadau i’r effaith hon tan o leiaf 5 mlynedd ar ôl i adran 2 ddod i rym. Bydd yr adroddiad y cyfeirir ato yn adran 21 yn cael ei ystyried wrth benderfynu pa un ai i wneud rheoliadau o’r fath.
83.Os na wneir rheoliadau o’r fath erbyn diwedd 6 mlynedd, mae darpariaethau’r isafbris wedi eu diddymu.
84.Os yw darpariaethau’r isafbris wedi eu diddymu ar ôl 6 mlynedd, mae is-adran (3) yn darparu y caiff Gweinidogion Cymru, drwy reoliadau, wneud unrhyw ddarpariaeth angenrheidiol neu hwylus o ganlyniad i’r ffaith honno. Byddai hyn yn cynnwys unrhyw ddarpariaeth drosiannol, ddarfodol neu arbed. Felly, er enghraifft, pe bai Deddf arall yn croesgyfeirio at ddarpariaethau’r isafbris cyn iddynt gael eu diddymu, gallai’r pŵer hwn gael ei ddefnyddio i ddileu’r cyfeiriad hwnnw.
85.Mae is-adran (4) yn diffinio’r hyn a olygir gan ddarpariaethau’r isafbris at y dibenion hyn.
