Adran 95 – Cydymffurfio â hysbysiad gwybodaeth a chyflwyno copïau o ddogfennau ac adran 96 – cyflwyno copïau o ddogfennau
104.Mae adran 95 yn nodi bod rhaid i berson y dyroddir hysbysiad gwybodaeth iddo gydymffurfio â’r hysbysiad a darparu’r wybodaeth ofynnol neu’r dogfennau gofynnol o fewn cyfnod, mewn lleoliad (na all fod yn rhywle a ddefnyddir fel annedd yn unig) ac yn y modd a bennir yn yr hysbysiad gwybodaeth. Fel corff cyhoeddus, rhaid i ACC ymddwyn yn rhesymol wrth bennu’r amser, y lleoliad a’r dull cyflwyno. Caiff y ddyletswydd i gydymffurfio â’r hysbysiad gwybodaeth ei hatal os yw’r derbynnydd wedi gofyn am adolygiad o’r hysbysiad neu wedi apelio yn ei erbyn. Gall person fod yn agored i gosb o dan Bennod 5 o Ran 5 o’r Ddeddf os yw’r person hwnnw’n methu â chydymffurfio â hysbysiad gwybodaeth.
105.Pan fo hysbysiad gwybodaeth yn ei gwneud yn ofynnol i’r person gyflwyno dogfen, mae adran 96 yn darparu y gall y person gydymffurfio drwy gyflwyno copi o’r ddogfen wreiddiol (oni bai bod yr hysbysiad yn gofyn yn benodol am y ddogfen wreiddiol, neu os yw ACC yn gofyn am y ddogfen wreiddiol o fewn 6 mis i gyflwyno’r copi). Mae hyn yn ddarostyngedig i unrhyw amodau a osodir gan reoliadau a wneir gan Weinidogion Cymru.
