Rheoliadau Rheolaethau Swyddogol (Iechyd Planhigion ac Organeddau a Addaswyd yn Enetig) (Cymru) 2020

[F1 RHAN 1 LL+C Y pŵer i osod sancsiynau sifil

Diwygiadau Testunol

F1 Atod. 4A wedi ei fewnosod (15.12.2020) gan Rheoliadau Rheolaethau Swyddogol (Iechyd Planhigion ac Organeddau a Addaswyd yn Enetig) (Cymru) (Diwygio) (Rhif 2) 2020 (O.S. 2020/1303), rhl. 1, Atod.

Hysbysiad cydymffurfio LL+C

1.— (1) Mae’r paragraff hwn yn gymwys pan fo’r awdurdod priodol wedi ei fodloni yn ôl pwysau tebygolrwydd bod person wedi cyflawni trosedd o dan Ran 11 o’r Rheoliadau hyn.

(2) Caiff yr awdurdod priodol drwy hysbysiad (“hysbysiad cydymffurfio”) osod ar y person hwnnw ofyniad i gymryd unrhyw gamau a bennir gan yr awdurdod priodol, o fewn unrhyw gyfnod a bennir ganddo, i sicrhau na fydd y drosedd yn parhau nac yn ailddigwydd.

(3) Ni chaniateir gosod hysbysiad cydymffurfio ar fwy nag un achlysur mewn perthynas â’r un weithred neu anweithred.

Hysbysiad adfer LL+C

2.— (1) Mae’r paragraff hwn yn gymwys pan fo’r awdurdod priodol wedi ei fodloni yn ôl pwysau tebygolrwydd bod person wedi cyflawni trosedd o dan Ran 11 o’r Rheoliadau hyn.

(2) Caiff yr awdurdod priodol drwy hysbysiad (“hysbysiad adfer”) osod ar y person hwnnw ofyniad i gymryd unrhyw gamau a bennir gan yr awdurdod priodol, o fewn unrhyw gyfnod a bennir ganddo, i sicrhau bod y sefyllfa, i’r graddau y bo’n bosibl, yn cael ei hadfer i’r hyn a fyddai wedi bod pe na bai’r drosedd wedi ei chyflawni.

(3) Ni chaniateir gosod hysbysiad adfer ar fwy nag un achlysur mewn perthynas â’r un weithred neu anweithred.

Gosod cosb ariannol benodedig LL+C

3.— (1) Mae’r paragraff hwn yn gymwys pan fo’r awdurdod priodol wedi ei fodloni yn ôl pwysau tebygolrwydd bod person wedi cyflawni trosedd o dan Ran 11 o’r Rheoliadau hyn.

(2) Caiff yr awdurdod priodol drwy hysbysiad osod ar y person hwnnw ofyniad i dalu cosb ariannol i’r awdurdod priodol o £250 pan fo’r person yn unigolyn a £2000 pan fo’r person yn gorff corfforedig, partneriaeth neu gymdeithas anghorfforedig (“cosb ariannol benodedig”).

(3) Ni chaniateir gosod cosb ariannol benodedig ar fwy nag un achlysur mewn perthynas â’r un weithred neu anweithred.

(4) Caiff yr awdurdod priodol adennill unrhyw gosb ariannol benodedig a osodir o dan y paragraff hwn fel pe bai’n daladwy o dan orchymyn gan y llys.

(5) Rhaid i gosb ariannol benodedig a delir i’r awdurdod priodol o dan y paragraff hwn gael ei thalu i’r Gronfa Gyfunol.

Gosod cosb ariannol amrywiadwy LL+C

4.— (1) Mae’r paragraff hwn yn gymwys pan fo’r awdurdod priodol wedi ei fodloni yn ôl pwysau tebygolrwydd bod person wedi cyflawni trosedd o dan Ran 11 o’r Rheoliadau hyn.

(2) Caiff yr awdurdod priodol drwy hysbysiad osod ar y person hwnnw ofyniad i dalu cosb ariannol i’r awdurdod priodol o unrhyw swm a benderfynir ganddo (“cosb ariannol amrywiadwy”).

(3) Ni chaniateir gosod cosb ariannol amrywiadwy ar fwy nag un achlysur mewn perthynas â’r un weithred neu anweithred.

(4) Ni chaniateir i swm cosb ariannol amrywiadwy fod yn fwy na £250,000.

(5) Cyn cyflwyno hysbysiad mewn perthynas â chosb ariannol amrywiadwy, caiff yr awdurdod priodol ei gwneud yn ofynnol i’r person y mae’r hysbysiad hwnnw i’w gyflwyno iddo ddarparu’r wybodaeth honno sy’n rhesymol i bennu swm unrhyw fudd ariannol sy’n deillio o ganlyniad i’r drosedd.

(6) Caiff yr awdurdod priodol adennill unrhyw gosb ariannol amrywiadwy a osodir o dan y paragraff hwn fel pe bai’n daladwy o dan orchymyn gan y llys.

(7) Rhaid i gosb ariannol amrywiadwy a delir i’r awdurdod priodol o dan y paragraff hwn gael ei thalu i’r Gronfa Gyfunol.

Hysbysiad o fwriad LL+C

5.— (1) Os yw’r awdurdod priodol yn bwriadu cyflwyno i berson hysbysiad cydymffurfio, hysbysiad adfer neu hysbysiad yn gosod cosb ariannol benodedig neu gosb ariannol amrywiadwy o dan y Rhan hon, rhaid iddo gyflwyno i’r person hwnnw hysbysiad o’r hyn a fwriedir (“hysbysiad o fwriad”).

(2) Rhaid i’r hysbysiad o fwriad gynnwys—

(a) y seiliau dros gyflwyno’r hysbysiad arfaethedig;

(b) gofynion yr hysbysiad arfaethedig ac, yn achos cosb, y swm sydd i’w dalu a sut y gellir talu;

(c) yn achos cosb ariannol benodedig—

(i) datganiad y gellir cael rhyddhad rhag atebolrwydd am y gosb drwy dalu 50% o’r gosb o fewn 28 o ddiwrnodau gan ddechrau â’r diwrnod y cyflwynir yr hysbysiad, a

(ii) gwybodaeth am effaith rhyddhau’r gosb;

(d) gwybodaeth o ran—

(i) yr hawl i wneud sylwadau a gwrthwynebiadau o fewn 28 o ddiwrnodau gan ddechrau â’r diwrnod y cyflwynir yr hysbysiad o fwriad, a

(ii) o dan ba amgylchiadau na chaiff yr awdurdod priodol gyflwyno’r hysbysiad arfaethedig.

Cyfuniad o gosbau LL+C

6.— (1) Ni chaiff yr awdurdod priodol gyflwyno hysbysiad o fwriad sy’n ymwneud â chosb ariannol benodedig os, mewn perthynas â’r un drosedd—

(a) cyflwynwyd hysbysiad cydymffurfio, hysbysiad adfer neu hysbysiad stop i’r person hwnnw (gweler paragraffau 1, 2 a 17),

(b) gosodwyd cosb ariannol amrywiadwy ar y person hwnnw (gweler paragraff 4), neu

(c) derbyniwyd ymgymeriad trydydd parti neu ymgymeriad gorfodi oddi wrth y person hwnnw (gweler paragraffau 9 a 23).

(2) Ni chaiff yr awdurdod priodol gyflwyno hysbysiad o fwriad sy’n ymwneud â hysbysiad cydymffurfio, hysbysiad adfer neu gosb ariannol amrywiadwy, na chyflwyno hysbysiad stop os, mewn perthynas â’r un drosedd—

(a) gosodwyd cosb ariannol benodedig ar y person hwnnw, neu

(b) rhyddhawyd y person hwnnw rhag atebolrwydd am gosb ariannol benodedig yn dilyn cyflwyno hysbysiad o fwriad i osod y gosb honno.

Rhyddhau rhag atebolrwydd – cosbau ariannol penodedig LL+C

7.   Caiff cosb ariannol benodedig ei rhyddhau os yw person y cyflwynwyd hysbysiad o fwriad iddo yn talu 50% o swm y gosb o fewn 28 o ddiwrnodau gan ddechrau â’r diwrnod y cyflwynir yr hysbysiad.

Gwneud sylwadau a gwrthwynebiadau LL+C

8.   Caiff person y cyflwynwyd hysbysiad o fwriad iddo, o fewn 28 o ddiwrnodau gan ddechrau â’r diwrnod y cyflwynir yr hysbysiad, wneud sylwadau a gwrthwynebiadau ysgrifenedig i’r awdurdod priodol mewn perthynas â’r bwriad o gyflwyno hysbysiad cydymffurfio, hysbysiad adfer neu hysbysiad yn gosod cosb ariannol benodedig neu gosb ariannol amrywiadwy.

Ymgymeriadau trydydd parti LL+C

9.— (1) Caiff person y cyflwynwyd hysbysiad o fwriad iddo mewn perthynas â hysbysiad cydymffurfio, hysbysiad adfer neu gosb ariannol amrywiadwy gynnig ymgymeriad o ran camau sydd i’w cymryd gan y person hwnnw (gan gynnwys talu swm o arian) er budd unrhyw drydydd parti yr effeithir arno gan y drosedd (“ymgymeriad trydydd parti”).

(2) Caiff yr awdurdod priodol dderbyn neu wrthod ymgymeriad trydydd parti.

(3) Rhaid i’r awdurdod priodol ystyried unrhyw ymgymeriad trydydd parti y mae’n ei dderbyn wrth benderfynu pa un ai i gyflwyno hysbysiad terfynol ai peidio, ac, os yw’n cyflwyno hysbysiad yn gosod cosb ariannol amrywiadwy, wrth benderfynu swm y gosb.

Hysbysiad terfynol LL+C

10.— (1) Ar ôl diwedd y cyfnod ar gyfer gwneud sylwadau a gwrthwynebiadau, rhaid i’r awdurdod priodol benderfynu p’un ai i osod y gofynion a ddisgrifir yn yr hysbysiad o fwriad, gyda neu heb addasiadau.

(2) Pan fo’r awdurdod priodol yn penderfynu gosod gofyniad, rhaid i’r hysbysiad sy’n ei osod (yr “hysbysiad terfynol”) gydymffurfio â pharagraff 11 (ar gyfer hysbysiadau cydymffurfio neu hysbysiadau adfer) neu 12 (ar gyfer cosbau ariannol penodedig neu amrywiadwy).

(3) Ni chaiff yr awdurdod priodol osod hysbysiad terfynol ar berson pan fo’r awdurdod priodol wedi ei fodloni na fyddai’r person hwnnw, oherwydd unrhyw amddiffyniad, hawlen neu drwydded, yn agored i gael ei euogfarnu o’r drosedd y mae’r hysbysiad yn ymwneud â hi.

(4) Pan fo’r awdurdod priodol yn cyflwyno hysbysiad terfynol sy’n ymwneud â chosb ariannol benodedig mewn cysylltiad ag unrhyw drosedd, ni chaiff yr awdurdod priodol mewn perthynas â’r drosedd honno gyflwyno—

(a) hysbysiad cydymffurfio,

(b) hysbysiad adfer,

(c) hysbysiad yn gosod cosb ariannol amrywiadwy, neu

(d) hysbysiad stop.

(5) Nid yw’r paragraff hwn yn gymwys i berson sydd wedi ei ryddhau rhag cosb ariannol benodedig yn unol â pharagraff 7.

Cynnwys hysbysiad terfynol: hysbysiadau cydymffurfio a hysbysiadau adfer LL+C

11.   Rhaid i hysbysiad terfynol sy’n ymwneud â hysbysiad cydymffurfio neu hysbysiad adfer gynnwys gwybodaeth o ran—

(a) y seiliau dros gyflwyno’r hysbysiad,

(b) pa gamau cydymffurfio neu adfer sy’n ofynnol ac o fewn pa gyfnod y mae rhaid eu cwblhau,

(c) hawliau i apelio, a

(d) canlyniadau methu â chydymffurfio â’r hysbysiad.

Cynnwys hysbysiad terfynol: cosbau ariannol penodedig a chosbau ariannol amrywiadwy LL+C

12.   Rhaid i hysbysiad terfynol sy’n ymwneud â chosb ariannol benodedig neu gosb ariannol amrywiadwy gynnwys gwybodaeth o ran—

(a) y seiliau dros osod y gosb,

(b) y swm sydd i’w dalu,

(c) sut y gellir talu,

(d) o fewn pa gyfnod y mae rhaid talu (y “cyfnod talu”), ni chaiff y cyfnod hwnnw fod yn llai na 56 o ddiwrnodau, gan ddechrau â’r diwrnod y cyflwynir yr hysbysiad,

(e) yn achos cosb ariannol benodedig, manylion y disgownt am dalu’n gynnar (gweler paragraff 13) a’r cosbau am dalu’n hwyr (gweler paragraff 15(2) a (3)),

(f) hawliau i apelio, ac

(g) canlyniadau methu â chydymffurfio â’r hysbysiad.

Cosb ariannol benodedig: disgownt am dalu’n gynnar LL+C

13.   Os yw person y cyflwynwyd hysbysiad o fwriad iddo mewn perthynas â chosb ariannol benodedig arfaethedig yn gwneud sylwadau neu wrthwynebiadau ynglŷn â’r hysbysiad hwnnw o fewn y terfyn amser a bennir ym mharagraff 8, caiff y person hwnnw ryddhau’r hysbysiad terfynol drwy dalu 50% o’r gosb derfynol o fewn 28 o ddiwrnodau gan ddechrau â’r diwrnod y cyflwynir yr hysbysiad terfynol.

Apelau yn erbyn hysbysiad terfynol LL+C

14.— (1) Caiff y person y cyflwynwyd hysbysiad terfynol iddo apelio yn ei erbyn.

(2) Y seiliau dros apelio yw—

(a) bod y penderfyniad yn seiliedig ar wall ffeithiol;

(b) bod y penderfyniad yn anghywir mewn cyfraith;

(c) yn achos cosb ariannol amrywiadwy, bod swm y gosb yn afresymol;

(d) yn achos gofyniad nad yw’n ofyniad ariannol, bod natur y gofyniad yn afresymol;

(e) bod y penderfyniad yn afresymol am unrhyw reswm arall;

(f) bod y penderfyniad yn anghywir am unrhyw reswm arall.

Cosb ariannol benodedig: peidio â thalu o fewn y cyfnod talu a nodir LL+C

15.— (1) Mae’r paragraff hwn yn gymwys i hysbysiad terfynol sy’n ymwneud â chosb ariannol benodedig.

(2) Os na thelir y gosb derfynol o fewn y cyfnod talu a nodir, cynyddir y swm sy’n daladwy gan 50%.

(3) Yn achos apêl sy’n aflwyddiannus, mae’r gosb yn daladwy o fewn 28 o ddiwrnodau o benderfynu’r apêl, ac os nad yw wedi ei dalu o fewn 28 o ddiwrnodau, cynyddir swm y gosb gan 50%.

Achosion troseddol LL+C

16.— (1) Os—

(a) cyflwynir hysbysiad cydymffurfio neu hysbysiad adfer i unrhyw berson,

(b) derbynnir ymgymeriad trydydd parti gan unrhyw berson,

(c) cyflwynir hysbysiad yn gosod cosb ariannol amrywiadwy i unrhyw berson, neu

(d) cyflwynir cosb ariannol benodedig i unrhyw berson,

ni chaniateir ar unrhyw adeg euogfarnu’r person hwnnw o drosedd o dan Ran 11 o’r Rheoliadau hyn mewn cysylltiad â’r weithred neu’r anweithred sy’n arwain at yr hysbysiad cydymffurfio, yr hysbysiad adfer, yr ymgymeriad trydydd parti, y gosb ariannol amrywiadwy neu’r gosb ariannol benodedig ac eithrio mewn achos sy’n dod o fewn paragraff (a) neu (b) (ac nad yw hefyd yn dod o fewn paragraff (c)) pan fo’r person yn methu â chydymffurfio â hysbysiad cydymffurfio, hysbysiad adfer neu ymgymeriad trydydd parti (yn ôl y digwydd).

(2) Caniateir cychwyn achos troseddol am droseddau y mae hysbysiad neu ymgymeriad trydydd parti yn is-baragraff (1) yn ymwneud â hwy ar unrhyw adeg hyd at 6 mis o’r dyddiad pan fydd yr awdurdod priodol yn hysbysu’r person y mae’r achos i’w gymryd yn ei erbyn fod y person hwnnw wedi methu â chydymffurfio â’r hysbysiad neu’r ymgymeriad hwnnw.]