Rheoliadau Bwyd Anifeiliaid (Safonau Diogelwch Sylfaenol) (Cymru) 2018

Enwi, cymhwyso a chychwyn

1.—( 1) Enw’r Rheoliadau hyn yw Rheoliadau Bwyd Anifeiliaid (Safonau Diogelwch Sylfaenol) (Cymru) 2018.

(2) Mae’r Rheoliadau hyn yn gymwys o ran Cymru.

(3) Daw’r Rheoliadau hyn i rym ar 6 Chwefror 2018.

Dehongli

2.—( 1) Yn y Rheoliadau hyn—

ystyr “awdurdod bwyd anifeiliaid” (“feed authority”) yw awdurdod a nodir yn adran 67(1A) o Ddeddf Amaethyddiaeth 1970 fel yr awdurdod sydd â’r ddyletswydd i orfodi Rhan IV o’r Ddeddf honno o fewn ei ardal neu ddosbarth yn ôl y digwydd;

mae i “bwyd anifeiliaid” yr ystyr a roddir i “feed” yn Erthygl 3 o Reoliad (EC) Rhif 178/2002 Senedd Ewrop a’r Cyngor;

ystyr “sylwedd ymbelydrol” (“radioactive substance”) yw unrhyw sylwedd sy’n cynnwys un neu ragor o radioniwclidau nad oes modd diystyru ei actifedd neu ei grynodiad actifedd o safbwynt amddiffyn rhag ymbelydredd.

(2) At ddibenion y Rheoliadau hyn mae “mewnforio” (“import”) ac “allforio” (“export”) i gael eu dehongli yn unol â’r ystyron sydd i “importation” ac “exportation” at ddibenion Ddeddf Rheoli Tollau Tramor a Chartref 1979(1).

Gwahardd arferion

3.   Ni chaiff neb ychwanegu sylwedd ymbelydrol yn fwriadol wrth gynhyrchu bwyd anifeiliaid.

4.   Ni chaiff neb fewnforio nac allforio unrhyw fwyd anifeiliaid y mae sylwedd ymbelydrol wedi ei ychwanegu ato’n fwriadol wrth gynhyrchu’r bwyd anifeiliaid hwnnw.

Troseddau a chosbau

5.   Mae unrhyw berson sy’n mynd yn groes i reoliad 3 neu reoliad 4 yn euog o drosedd ac yn agored ar euogfarn ddiannod i ddirwy neu i garchariad am gyfnod nad yw’n hwy na 3 mis, neu’r ddau ohonynt.

Gorfodi

6.   Dyletswydd awdurdod bwyd anifeiliaid o fewn ei ardal yw gorfodi’r Rheoliadau hyn.

Diwygio Rheoliadau Bwyd Anifeiliaid (Hylendid, Samplu etc. a Gorfodi) (Cymru) 2016

7.—( 1) Mae Rheoliadau Bwyd Anifeiliaid (Hylendid, Samplu etc. a Gorfodi) (Cymru) 2016(2) wedi eu diwygio yn unol â pharagraff (2).

(2) Yn Atodlen 1 (cyfraith bwyd anifeiliaid benodedig), ar ôl y cofnod ar gyfer “Rheoliadau Bwyd Anifeiliaid (Hylendid, Samplu etc. a Gorfodi) (Cymru) 2016”, mewnosoder—

• “Rheoliadau Bwyd Anifeiliaid (Safonau Diogelwch Sylfaenol) (Cymru) 2018”.

Diwygio Rheoliadau Rheolaethau Swyddogol ar Fwyd Anifeiliaid a Bwyd (Cymru) 2009

8.—( 1) Mae Rheoliadau Rheolaethau Swyddogol ar Fwyd Anifeiliaid a Bwyd (Cymru) 2009(3) wedi eu diwygio yn unol â pharagraff (2).

(2) Yn Atodlen 2 (diffiniad o gyfraith bwyd anifeiliaid berthnasol), ar ôl paragraff (dd), mewnosoder y paragraff a ganlyn—

“(e) Rheoliadau Bwyd Anifeiliaid (Safonau Diogelwch Sylfaenol) (Cymru) 2018.”

Vaughan Gething

Ysgrifennydd y Cabinet dros Iechyd a Gwasanaethau Cymdeithasol, un o Weinidogion Cymru

15 Ionawr 2018