Gorchymyn Iechyd Planhigion (Cymru) 2018

Eithriadau rhag gwaharddiadau a gofynion penodol

8.—( 1) Nid yw’r darpariaethau a ganlyn yn gymwys i unrhyw eitemau esempt a gyflwynir i Gymru ym mhaciau teithiwr neu dramwywr arall os yw’r eitemau’n bodloni’r amodau ym mharagraff (2)—

(a) erthygl 5(1)(e) ac (f);

(b) erthygl 6(1);

(c) erthygl 7(1);

(d) erthygl 10(1).

(2) Yr amodau yw—

(a) nad yw’r eitemau esempt yn arddangos unrhyw arwyddion bod pla planhigion yn bresennol;

(b) na fwriedir i’r eitemau esempt gael eu defnyddio wrth fasnachu neu redeg busnes; ac

(c) y bwriedir yr eitemau esempt at ddefnydd aelwydydd.

(3) Yn yr erthygl hon—

(a) ystyr “eitemau esempt” (“exempt items”) yw—

(i) ffrwythau a llysiau amrwd (ac eithrio tatws), nad yw cyfanswm eu pwysau yn fwy na dau kg;

(ii) un tusw o flodau wedi eu torri (a gaiff gynnwys rhannau o blanhigion);

(iii) pecynnau o hadau, ac eithrio hadau tatws neu Fraxinus L., nad yw eu cyfanswm yn fwy na phum paced;

(iv) bylbiau, cormau, cloron, ac eithrio tatws, a risomau, a dyfwyd yn ardal Ewrop a Môr y Canoldir ac a draddodwyd ohoni, ac nad yw cyfanswm eu pwysau yn fwy na dau kg; neu

(v) planhigion ar gyfer eu plannu, ac eithrio bylbiau, cormau, cloron neu risomau neu blanhigion Fraxinus L. a fwriedir ar gyfer eu plannu, a dyfwyd yn ardal Ewrop a Môr y Canoldir ac a draddodwyd ohoni ac nad yw eu cyfanswm yn fwy na phump;

(b) ystyr “pecyn o hadau” (“packet of seeds”) yw pecyn o hadau o fath a werthir i’r defnyddiwr fel arfer ac eithrio i’w ddefnyddio wrth fasnachu neu redeg busnes neu becyn o hadau o faint tebyg.