Gorchymyn Iechyd Planhigion (Cymru) 2018

Hysbysu ymlaen llaw ynglŷn â glanio

6.—( 1) Ni chaiff unrhyw berson lanio unrhyw ddeunydd perthnasol hysbysadwy, pan fo Cymru yn fan cyrraedd yr Undeb Ewropeaidd iddo, oni bai y rhoddir hysbysiad yn unol â’r erthygl hon.

(2) Rhaid i hysbysiad—

(a) bod yn unol â gofynion Atodlen 11;

(b) cael ei roi i Weinidogion Cymru yn y cyfeiriad penodedig; ac

(c) cael ei roi mewn pryd er mwyn cyrraedd y cyfeiriad penodedig—

(i) yn achos unrhyw ddeunydd perthnasol y deuir ag ef drwy hedfan, o leiaf bedair awr waith cyn i’r deunydd perthnasol gael ei lanio; a

(ii) mewn unrhyw achos arall, o leiaf dri diwrnod gwaith cyn i’r deunydd perthnasol gael ei lanio.

(3) Yn achos ffrwythau sitrws ar gyfer eu prosesu, rhaid cynnwys enwau, cyfeiriadau a lleoliadau’r mangreoedd y mae’r ffrwythau i’w prosesu ynddynt o dan eitem 13 o’r hysbysiad a nodir yn Atodlen 11.

(4) Os gall person ddangos yn rhesymol nad oedd yn bosibl rhoi hysbysiad yn unol â pharagraff (2)(c) am nad oedd y person yn ymwybodol bod y deunydd wedi ei draddodi, caiff y person roi hysbysiad cyn gynted ag y bo’n rhesymol ymarferol.

(5) Mae paragraff (1) yn ddarostyngedig i erthyglau 8(1), 16 a 30(3).

(6) Yn yr erthygl hon—

(a) ystyr “cyfeiriad penodedig” (“specified address”) yw’r cyfeiriad a roddir gan Weinidogion Cymru o bryd i’w gilydd at ddibenion yr erthygl hon;

(b) ystyr “awr waith” (“working hour”) yw cyfnod o un awr yn ystod diwrnod gwaith.