Rheoliadau Cynllunio Gwlad a Thref (Asesu Effeithiau Amgylcheddol) (Adolygiadau Amhenderfynedig o Hen Ganiatadau Mwynau) (Cymru) 2009

Cyfarwyddiadau sgrinio gan Weinidogion Cymru

11.—( 1) Rhaid i geisydd neu apelydd sydd, yn unol â rheoliad 10(2), yn gwneud cais am i Weinidogion Cymru roi cyfarwyddyd sgrinio o dan y rheoliad hwn, gyflwyno ynghyd â'r cais hwnnw—

(a) copi o'r cais AHGM;

(b) cynllun sy'n ddigonol ar gyfer adnabod y tir;

(c) disgrifiad o natur a phwrpas y datblygiad AHGM a'i effeithiau posibl ar yr amgylchedd;

(ch) unrhyw sylwadau y dymuna'r ceisydd neu'r apelydd eu gwneud.

(2) Rhaid i geisydd neu apelydd sy'n gwneud cais am gyfarwyddyd yn unol â rheoliad 10(2) mewn cysylltiad â chais AHGM amhenderfynedig sydd gerbron awdurdod cynllunio mwynau i'w benderfynu, anfon copi o'r cais am gyfarwyddyd ar unwaith at yr awdurdod cynllunio mwynau perthnasol, ynghyd â chopi o unrhyw sylwadau y mae'r person hwnnw wedi eu gwneud wrth Weinidogion Cymru.

(3) Rhaid i Weinidogion Cymru, os ydynt o'r farn na chawsant wybodaeth ddigonol i roi cyfarwyddyd sgrinio, hysbysu'r ceisydd, apelydd neu weithredwr perthnasol, mewn ysgrifen, o'r wybodaeth ychwanegol (“gwybodaeth sgrinio”) sy'n ofynnol ganddynt, ac o'r materion a nodir ym mharagraff 2 o Atodlen 3.

(4) At ddibenion paragraff (3), gweithredwr perthnasol yw unrhyw weithredwr yr ystyria Gweinidogion Cymru yn rhesymol ei fod, neu y dylai fod, yn alluog i ddarparu gwybodaeth sgrinio.

(5) Rhaid i Weinidogion Cymru anfon copi o unrhyw hysbysiad ysgrifenedig a roddir o dan baragraff (3) at yr awdurdod cynllunio mwynau perthnasol.

(6) Caiff Gweinidogion Cymru ofyn, mewn ysgrifen, i'r awdurdod cynllunio mwynau perthnasol ddarparu pa bynnag wybodaeth y gall ei darparu, ynglŷn â gwybodaeth sgrinio a geisir o dan baragraff (3).

(7) Rhaid i awdurdod cynllunio mwynau y gwneir cais iddo o dan baragraff (6), o fewn tair wythnos o'r dyddiad y gwneir y cais, neu ba bynnag gyfnod hwy a gytunir mewn ysgrifen gyda Gweinidogion Cymru–

(a) darparu pa bynnag wybodaeth y gall ynglŷn â'r wybodaeth sgrinio; neu

(b) hysbysu Gweinidogion Cymru mewn ysgrifen o'r rhesymau pam na all ddarparu unrhyw wybodaeth o'r fath.

(8) Rhaid darparu gwybodaeth sgrinio sy'n ofynnol yn unol â hysbysiad ysgrifenedig a roddir o dan baragraff (3) o fewn cyfnod o dair wythnos, sy'n cychwyn ar y dyddiad y rhoddir yr hysbysiad neu ba bynnag gyfnod hwy a gytunir mewn ysgrifen gyda Gweinidogion Cymru (“y cyfnod perthnasol”).

(9) Os na ddarperir gwybodaeth sgrinio sy'n ofynnol yn unol â hysbysiad ysgrifenedig a roddir o dan baragraff (3) o fewn y cyfnod perthnasol, bydd y caniatâd cynllunio y mae'r cais AHGM amhenderfynedig yn ymwneud ag ef yn peidio ag awdurdodi unrhyw ddatblygiad mwynau o ddiwedd y cyfnod perthnasol ymlaen.

(10) Rhaid i Weinidogion Cymru roi cyfarwyddyd sgrinio cyn gynted ag y bo'n rhesymol ymarferol ar ôl y diweddaraf o'r dyddiadau canlynol—

(a) y dyddiad y ceir cais yn unol â rheoliad 10(2);

(b) os yw'r person sy'n gwneud y cais wedi ei hysbysu yn unol â pharagraff (3), y dyddiad y ceir yr wybodaeth sgrinio sy'n ofynnol;

(c) y dyddiad y ceir ymateb ysgrifenedig o dan baragraff (7).

(11) Os yw'r datblygiad AHGM sy'n destun cais sgrinio a wnaed yn unol â rheoliad 10(2) yn ddatblygiad o fath a restrir yn Atodiad I i'r Gyfarwyddeb, rhaid i Weinidogion Cymru roi cyfarwyddyd bod y datblygiad hwnnw yn ddatblygiad AEA.

• Nid yw hyn yn rhagfarnu rheoliad 9.

(12) Rhaid i Weinidogion Cymru cyn gynted ag y bo'n rhesymol ymarferol ar ôl rhoi cyfarwyddyd sgrinio o dan y rheoliad hwn, anfon at y person a wnaeth y cais am gyfarwyddyd—

(a) copi o'r cyfarwyddyd sgrinio a roddwyd; a

(b) pan fo'r cyfarwyddwyd sgrinio i'r perwyl bod y datblygiad dan sylw yn ddatblygiad AEA, hysbysiad ysgrifenedig o'r materion a nodir ym mharagraff 3 o Atodlen 3.

(13) Caiff Gweinidogion Cymru dynnu'n ôl hysbysiad ysgrifenedig a roddir o dan baragraff (3) ar unrhyw bryd cyn y daw'r cyfnod perthnasol i ben.