Rheoliadau Addysg (Cynigion Trefniadaeth Ysgolion) (Cymru) (Diwygio) 2004

Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn yn diwygio Rheoliadau Addysg (Cynigion Trefniadaeth Ysgolion) (Cymru) 1999 (OS 1999/1671) (“y Prif Reoliadau”). Mae'r Rheoliadau —

• yn gweithredu'r diwygiad i adran 28 o Ddeddf Safonau a Fframwaith Ysgolion 1998 a wnaed gan adran 154 o Ddeddf Addysg 2002; ac

• yn diwygio'r Prif Reoliadau er mwyn caniatáu i ysgolion gymryd rhan mewn cynlluniau peilot Cymraeg sydd wedi'u cymeradwyo gan Gynulliad Cenedlaethol Cymru, heb gyhoeddi cynigion (rheoliad 7).

Mae'r Rheoliadau'n rhagnodi newidiadau i ysgolion meithrin a gynhelir ac y mae'n rhaid i awdurdodau addysg lleol gyhoeddi cynigion ar eu cyfer (rheoliadau 5 ac 8).

Mae rheoliad 4 yn ailddiffinio'r term “mainstream school” i gynnwys ysgolion meithrin a gynhelir. Effaith hyn yw

• rhagnodi gwybodaeth i'w chynnwys mewn cynigion cyhoeddedig;

• rhagnodi dull cyhoeddi cynigion;

• rhagnodi materion penodol mewn perthynas â gwrthwynebiadau; a

• rhagnodi materion penodol mewn perthynas ag addasiadau,

lle y mae a wnelo cynigion ag ysgolion meithrin a gynhelir (rheoliad 4).

Mae rheoliad 9 yn gwneud diwygiadau canlyniadol i Atodlen 3 o'r Prif Reoliadau (gwybodaeth i'w chynnwys mewn cynigion cyhoeddedig).

Mae Atodlen 4 o'r Prif Reoliadau (gwybodaeth i'w darparu ar gyfer y Cynulliad) yn gymwys i gynigion ynghylch ysgolion meithrin a gynhelir yn rhinwedd y diwygiadau i adran 28 o Ddeddf 1998 a wnaed gan adran 154 o Ddeddf 2002 a rheoliad 6 o'r prif Reoliadau. Mae rheoliad 10 yn diwygio Atodlen 4 i'r Prif Reoliadau er mwyn gwneud darpariaeth benodol bellach mewn perthynas ag ysgolion meithrin a gynhelir ac addysg feithrin sydd i'w darparu mewn ysgolion cynradd nad ydynt yn ysgolion meithrin.