Rheoliadau Newid Amserau Sesiynau Ysgolion (Cymru) 2000

Enwi, cychwyn a chymhwyso

1.—( 1) Enw'r Rheoliadau hyn yw Rheoliadau Newid Amserau Sesiynau Ysgolion (Cymru) 2000 a deuant i rym ar 1 Medi 2000.

(2) Dim ond i Gymru y mae'r Rheoliadau hyn yn gymwys.

Y weithdrefn ar gyfer newid amserau sesiynau ysgolion

2.—( 1) Os bydd corff llywodraethu ysgol gymunedol, ysgol wirfoddol a reolir neu ysgol arbennig gymunedol yn bwriadu newid amserau sesiynau'r ysgol (neu, os nad oes ond un, sesiwn yr ysgol), rhaid iddynt —

(a) ymgynghori â'r awdurdod addysg lleol, y pennaeth a'r holl bersonau a gyflogir mewn swyddi addysgu neu swyddi nad ydynt yn swyddi addysgu yn yr ysgol cyn cymryd unrhyw un o'r camau a nodir ym mharagraffau (b) i (e);

(b) paratoi datganiad—

(i) sy'n dangos eu bod yn bwriadu newid yr amserau hynny,

(ii) sy'n pennu'r newid arfaethedig a phryd maent yn bwriadu iddo ddod yn weithredol,

(iii) sy'n tynnu sylw at unrhyw sylwadau ar y cynnig a gynhwysir fel atodiad i'r datganiad yn rhinwedd paragraff (c) ac sy'n cynnwys unrhyw ymateb i'r sylwadau y barnant i fod yn briodol, a

(iv) sy'n rhoi manylion am ddyddiad, amser a lleoliad y cyfarfod y mae'n ofynnol iddynt ei gynnal yn rhinwedd paragraff (dd);

(c) cynnwys, mewn atodiad i'r datganiad hwnnw, unrhyw sylw ysgrifenedig ar y cynnig y bydd yr awdurdod addysg lleol yn ei ddarparu i'r perwyl hwnnw, os yw'r awdurdod yn gofyn amdano;

(ch) cynhyrchu'r datganiad hwnnw ac unrhyw atodiad mewn unrhyw iaith neu ieithoedd (yn ychwanegol at y Gymraeg neu'r Saesneg), os o gwbl, barnant yn briodol neu'n unol ag unrhyw gyfarwyddyd gan yr awdurdod addysg lleol;

(d) cymryd unrhyw gamau sy'n rhesymol ymarferol i sicrhau—

(i) bod rhieni(1) pob plentyn cofrestredig yn yr ysgol yn cael (yn rhad ac am ddim) gopi o'r datganiad ac unrhyw atodiad nid llai na phythefnos cyn y cyfarfod y mae'n ofynnol i'r corff llywodraethu ei gynnal yn rhinwedd paragraff (dd), a

(ii) bod copïau o'r datganiad ac unrhyw atodiad ar gael i'w harchwilio (ar bob adeg resymol ac yn rhad ac am ddim) yn yr ysgol yn ystod y cyfnod o bythefnos yn union cyn y cyfarfod;

(dd) rhoi cyfle i drafod y cynnig mewn cyfarfod sy'n agored i—

(i) bob un o rieni disgyblion cofrestredig yn yr ysgol,

(ii) y pennaeth, a

(iii) unrhyw bersonau arall y bydd y corff llywodraethu yn eu gwahodd;

(e) ystyried unrhyw sylwadau a gyflwynwyd ar y cynnig yn y cyfarfod cyn penderfynu a ddylid newid yr amserau ac (os dylid) a ddylid gweithredu'r cynnig gan ei addasu neu heb ei addasu;

(2) Yn ddarostyngedig i baragraff (3), os bydd y corff llywodraethu yn penderfynu gweithredu'r newid arfaethedig (gan ei addasu neu heb ei addasu), rhaid iddynt, o fewn dim llai na chwe wythnos cyn bod unrhyw newid yn yr amserau hynny i ddod yn weithredol—

(i) hysbysu'r awdurdod addysg lleol o'r newid a phryd y bwriedir iddo ddechrau dod yn weithredol, a

(ii) cymryd unrhyw gamau sy'n rhesymol ymarferol i sicrhau bod rhieni pob disgybl cofrestredig yn yr ysgol yn cael eu hysbysu.

(3) Pan fydd a wnelo'r newid â'r amserau y bwriedir i sesiwn ysgol ddechrau yn y bore neu ddod i ben yn y prynhawn (neu'r ddau) ni fydd y cyfnod y cyfeirir ato ym mharagraff (2) yn llai na thri mis.

Amserau sesiynau ysgolion a newidiwyd yn dod yn weithredol

3.   Ni fydd newid i amserau sesiynau ysgolion yn cael ei wneud ond er mwyn iddo ddod yn weithredol —

(a) pan fydd rheoliad 2(3) yn gymwys, ar ddechrau blwyddyn ysgol; a

(b) ym mhob achos arall, ar ddechrau tymor ysgol.

Rheoli'r cyfarfodydd

4.   Bydd trafodion unrhyw gyfarfod y mae'n rhaid darparu cyfle i drafod ynddo yn rhinwedd Rheoliad 2(1)(dd) o dan reolaeth y corff llywodraethu.

Llofnodwyd ar ran Cynullaid Cenedlaethol Cymru o dan adran 66(1) o Ddeddf Llywodraeth Cymru 1998(2)

Jane Davidson

Y Dirprwy Lywydd, Cynulliad Cenedlaethol Cymru

24 Gorffennaf 2000