Mesur y Gymraeg (Cymru) 2011

RHAN 2 LL+C GWYBODAETH, DOGFENNAU A THYSTIOLAETH LAFAR

Hysbysiadau tystiolaeth LL+C

5 (1) Yn ystod ymchwiliad, caiff y Comisiynydd roi hysbysiad tystiolaeth i berson (A).

(2) Yn y Mesur hwn, ystyr “hysbysiad tystiolaeth” yw hysbysiad sy'n ei gwneud yn ofynnol i A wneud un neu ragor o'r canlynol—

(a) darparu gwybodaeth sydd ym meddiant A;

(b) cyflwyno dogfennau sydd ym meddiant A;

(c) rhoi tystiolaeth lafar.

(3) Caiff hysbysiad o dan y paragraff hwn gynnwys darpariaeth ynghylch—

(a) y ffurf ar wybodaeth, ar ddogfennau neu ar dystiolaeth;

(b) amseru unrhyw beth sydd i'w wneud yn unol â'r hysbysiad.

(4) Ni chaniateir i hysbysiad o dan y paragraff hwn ei gwneud yn ofynnol i A wneud unrhyw beth na allai A gael ei orfodi i'w wneud mewn achos gerbron yr Uchel Lys.

(5) Rhaid i hysbysiad o dan y paragraff hwn hysbysu A—

(a) beth fydd y canlyniadau os na fydd A yn cydymffurfio â'r hysbysiad; a

(b) am yr hawl i apelio o dan baragraff 9.

Gwybodaeth Cychwyn

I1 Atod. 10 para. 5 ddim mewn grym ar Cydsyniad Brenhinol, gweler a. 156(2)

I2 Atod. 10 para. 5 mewn grym ar 7.7.2015 gan O.S. 2015/1413, ergl. 3(h)

6 (1) Mae'r paragraff hwn yn gymwys os bydd person (B), yn ystod ymchwiliad—

(a) yn darparu gwybodaeth,

(b) yn cyflwyno dogfennau, neu

(c) yn rhoi tystiolaeth lafar.

(2) Caiff y Comisiynydd, os gwêl yn dda, dalu i B—

(a) symiau mewn cysylltiad â threuliau a dynnwyd yn briodol gan B, a

(b) lwfansau yn iawndal am i B golli amser.

(3) Mae unrhyw daliad i B i'w wneud—

(a) yn unol â graddfeydd y caniateir eu pennu gan y Comisiynydd, a

(b) yn ddarostyngedig i amodau y caniateir eu pennu gan y Comisiynydd.

Gwybodaeth Cychwyn

I3 Atod. 10 para. 6 ddim mewn grym ar Cydsyniad Brenhinol, gweler a. 156(2)

I4 Atod. 10 para. 6 mewn grym ar 7.7.2015 gan O.S. 2015/1413, ergl. 3(h)

Cyfrinachedd etc LL+C

7 O ran hysbysiad o dan baragraff 5—

(a) ni chaniateir i'r hysbysiad ei gwneud yn ofynnol i berson ddarparu gwybodaeth y gwaherddir i'r person ei datgelu yn rhinwedd deddfiad, a

(b) ni chaniateir i'r hysbysiad ei gwneud yn ofynnol i berson wneud unrhyw beth na allai'r person hwnnw gael ei orfodi i'w wneud mewn achos gerbron yr Uchel Lys.

Gwybodaeth Cychwyn

I5 Atod. 10 para. 7 ddim mewn grym ar Cydsyniad Brenhinol, gweler a. 156(2)

I6 Atod. 10 para. 7 mewn grym ar 7.7.2015 gan O.S. 2015/1413, ergl. 3(h)

8 (1) Rhaid i A ddiystyru hysbysiad a roddir o dan baragraff 5, a rhaid iddo hysbysu'r Comisiynydd fod A yn ei ddiystyru, i'r graddau y mae A o'r farn y byddai'n ofynnol i A—

(a) datgelu gwybodaeth sensitif o fewn ystyr paragraff 4 o Atodlen 3 i Ddeddf y Gwasanaethau Cudd-wybodaeth 1994 (Y Pwyllgor Cudd-wybodaeth a Diogelwch),

(b) datgelu gwybodaeth a allai arwain at wybod pwy yw cyflogai neu asiant gwasanaeth cudd-wybodaeth (ac eithrio un y mae eisoes yn hysbys i'r Comisiynydd pwy ydyw),

(c) datgelu gwybodaeth a allai ddarparu manylion prosesau a ddefnyddir i recriwtio, dewis neu hyfforddi cyflogeion neu asiantau gwasanaeth cudd-wybodaeth,

(d) datgelu gwybodaeth a allai ddarparu manylion gwybodaeth sy'n dod o fewn unrhyw un neu ragor o baragraffau (a) i (c) neu na ellir yn ymarferol eu gwahanu oddi wrth yr wybodaeth honno, neu

(e) datgelu gwybodaeth sy'n ymwneud â gwasanaeth cudd-wybodaeth ac a fyddai'n niweidiol i fuddiannau diogelwch gwladol.

(2) Yn is-baragraff (1) ystyr “gwasanaeth cudd-wybodaeth” yw—

(a) y Gwasanaeth Diogelwch,

(b) y Gwasanaeth Cudd-wybodaeth Cyfrinachol, ac

(c) Pencadlys Cyfathrebu'r Llywodraeth.

(3) Os bydd A yn hysbysu'r Comisiynydd o dan is-baragraff (1) uchod—

(a) nid yw paragraffau 9 a 10 yn gymwys mewn perthynas â'r rhan honno o'r hysbysiad o dan baragraff 5 y mae'r hysbysiad o dan is-baragraff (1) uchod yn ymwneud â hi,

(b) caiff y Comisiynydd wneud cais i'r tribiwnlys a sefydlwyd gan adran 65 o Ddeddf Rheoleiddio Pwerau Ymchwilio 2000 am orchymyn sy'n ei gwneud yn ofynnol i'r person gymryd y camau y gellir eu pennu yn y gorchymyn i gydymffurfio â'r hysbysiad,

(c) bydd darpariaethau canlynol y Ddeddf honno yn gymwys mewn perthynas ag achosion o dan y paragraff hwn fel y maent yn gymwys mewn perthynas ag achosion o dan y Ddeddf honno (gydag unrhyw addasiadau angenrheidiol)—

(i) adran 67(7), (8) a (10) i (12) (dyfarniad),

(ii) adran 68 (gweithdrefn), a

(iii) adran 69 (rheolau), a

(d) rhaid i'r tribiwnlys a sefydlwyd gan adran 65 o'r Ddeddf honno ddyfarnu achosion o dan y paragraff hwn drwy ystyried barn A yn unol â'r egwyddorion a gâi eu cymhwyso gan lys ar gais am adolygiad barnwrol ar roi'r hysbysiad.

(4) Os daw gwybodaeth neu ddogfennau i law'r Comisiynydd oddi wrth wasanaeth cudd-wybodaeth neu'n ymwneud â gwasanaeth cudd-wybodaeth mewn ymateb i hysbysiad o dan baragraff 5, rhaid i'r Comisiynydd storio a defnyddio'r wybodaeth neu'r dogfennau'n unol ag unrhyw drefniadau a bennir gan yr Ysgrifennydd Gwladol.

Gwybodaeth Cychwyn

I7 Atod. 10 para. 8 ddim mewn grym ar Cydsyniad Brenhinol, gweler a. 156(2)

I8 Atod. 10 para. 8 mewn grym ar 7.7.2015 gan O.S. 2015/1413, ergl. 3(h)

Apelau LL+C

9 Caiff A wneud cais i'r Tribiwnlys i ddileu'r hysbysiad o dan baragraff 5 ar y sail bod gofyniad a osodir gan yr hysbysiad—

(a) yn ddiangen o ystyried pwrpas yr ymchwiliad, neu

(b) yn afresymol neu'n anghymesur mewn modd arall.

Gwybodaeth Cychwyn

I9 Atod. 10 para. 9 ddim mewn grym ar Cydsyniad Brenhinol, gweler a. 156(2)

I10 Atod. 10 para. 9 mewn grym ar 7.7.2015 gan O.S. 2015/1413, ergl. 3(h)

10 Caiff A wneud cais i'r Tribiwnlys i ddileu'r hysbysiad o dan baragraff 5 ar y sail bod y gofyniad a osodir gan yr hysbysiad yn annymunol am resymau diogelwch gwladol, ac eithrio am y rheswm y byddai'n gofyn am ddatgelu gwybodaeth o'r math y mae paragraff 8(1) yn gymwys iddo.

Gwybodaeth Cychwyn

I11 Atod. 10 para. 10 ddim mewn grym ar Cydsyniad Brenhinol, gweler a. 156(2)

I12 Atod. 10 para. 10 mewn grym ar 7.7.2015 gan O.S. 2015/1413, ergl. 3(h)

Gorfodi LL+C

11 (1) Mae'r paragraff hwn yn gymwys os yw'r Comisiynydd o'r farn bod A—

(a) wedi methu heb esgus rhesymol â chydymffurfio â hysbysiad o dan baragraff 5, neu

(b) yn debygol o fethu heb esgus rhesymol â chydymffurfio â hysbysiad o dan baragraff 5.

(2) Caiff y Comisiynydd wneud cais i lys sirol am orchymyn yn ei gwneud yn ofynnol i A gymryd y camau y gellir eu pennu yn y gorchymyn i gydymffurfio â'r hysbysiad.

Gwybodaeth Cychwyn

I13 Atod. 10 para. 11 ddim mewn grym ar Cydsyniad Brenhinol, gweler a. 156(2)

I14 Atod. 10 para. 11 mewn grym ar 7.7.2015 gan O.S. 2015/1413, ergl. 3(h)