Rheoliadau Cynhyrchion sy'n Tarddu o Anifeiliaid (Mewnforion Trydydd Gwledydd) (Cymru) 2004

Nodyn Esboniadol

(Nid yw'r nodyn hwn yn rhan o'r Rheoliadau.)

Mae'r Rheoliadau hyn yn cydgrynhoi Rheoliadau Cynhyrchion sy'n Deillio o Anifeiliaid (Mewnforion Trydydd Gwledydd) (Cymru) 2002 (O.S. 2002/1387 (Cy.136)), Rheoliadau Cynhyrchion sy'n Deillio o Anifeiliaid (Mewnforion Trydydd Gwledydd) (Cymru) (Diwygio) (Rhif 2) 2002 (O.S. 2002/3230 (Cy.307)), a Rheoliadau Cynhyrchion sy'n Deillio o Anifeiliaid (Mewnforion Trydydd Gwledydd) (Cymru) (Diwygio) 2003 (O.S. 2003/976 (Cy.135)), ac yn gwneud nifer o ddiwygiadau pellach.

Mae'r prif ddiwygiadau fel a ganlyn—

• gweithredu Penderfyniad y Comisiwn 2002/349/EC sy'n nodi'r rhestr o gynhyrchion sydd i'w harchwilio wrth fannau archwilio ar y ffin o dan Gyfarwyddeb y Cyngor 97/78/EC (OJ Rhif L121, 8.5.2002, t.6) (y diffiniad o 'product' yn rheoliad 2(1));

• y gofyniad bod cynhyrchion y gwrthodwyd iddynt ddod i mewn i'r Gymuned (ac nad ydynt wedi'u hailanfon) yn cael eu gwaredu yn unol â Rheoliad (EC) Rhif 1774/2002 Senedd Ewrop a'r Cyngor (OJ Rhif L273, 10.10.2002, t.1) (fel y'i diwygiwyd) sydd wedi diddymu Cyfarwyddeb y Cyngor 90/667/EEC (OJ Rhif L363, 27.12.1990, t.51) (rheoliadau 21, 22, 24, 25, 26 a 43);

• y gofyniad bod cyflenwadau arlwyo na ddefnyddiwyd mohonynt o gyfryngau cludo sy'n gweithredu'n rhyngwladol yn cael eu gwaredu'n unol â Rheoliad (EC) Rhif 1774/2002 (rheoliad 29);

• pan fydd cyflenwadau arlwyo o'r fath na ddefnyddiwyd mohonynt yn cael eu gwaredu drwy eu claddu ar safle tirlenwi, y gofyniad mai dim ond ar safle tirlenwi a gymeradwywyd yn unol â rheoliad 30 y dylid eu gwaredu;

• cynnwys Rhan 5 newydd sy'n nodi (1) y mecanwaith ar gyfer cymeradwyo safleoedd tirlenwi sy'n cael cyflenwadau arlwyo na ddefnyddiwyd mohonynt, (2) y rhwymedigaethau ar weithredwyr safleoedd tirlenwi a gymeradwywyd, (3) y weithdrefn ar gyfer diwygio, atal a dirymu cymeradwyaethau o'r fath, a (4) y weithdrefn ar gyfer apelio yn erbyn diwygiad neu ataliad;

• diwygio'r weithdrefn ar gyfer apelio yn erbyn ffioedd milfeddygol a dalwyd i Gynulliad Cenedlaethol Cymru neu'r Asiantaeth Safonau Bwyd (rheoliad 58), sef y weithdrefn sy'n ei gwneud yn ofynnol ymhlith pethau eraill fod rhaid i'r person annibynnol beidio â bod yn swyddog nac yn was i Gynulliad Cenedlaethol Cymru neu'r Asiantaeth (oni bai bod yr apelydd yn cydsynio â hynny), a bod rhaid i'r gwrandawiad, os yw'r apelydd yn gofyn am hynny, fod yn gyhoeddus a bod rhaid darparu copi o adroddiad y person annibynnol i'r apelydd; a

• diwygio Atodlen 2.

Mae'r Rheoliadau hyn yn gweithredu ar gyfer Cymru Gyfarwyddeb y Cyngor 97/78/EC sy'n gosod yr egwyddorion sy'n llywodraethu'r dull o drefnu gwiriadau milfeddygol ar gynhyrchion sy'n dod i mewn i'r Gymuned o drydydd gwledydd (OJ Rhif L24, 30.1.98, t.9). Mae'r Gyfarwyddeb yn gymwys i gynhyrchion sy'n tarddu o anifeiliaid — cig, pysgod (gan gynnwys cregynbysgod), llaeth, a chynhyrchion sydd wedi'u gwneud o'r rhain, ynghyd â chynhyrchion ŵ y a nifer mawr o sgil-gynhyrchion anifeiliaid, gan gynnwys casinau, crwyn, esgyrn a gwaed — o drydydd gwledydd.

Mae'r cynhyrchion y mae'r Rheoliadau yn gymwys iddynt wedi'u diffinio yn rheoliad 2(1) ac mae'r gofynion y mae'n rhaid iddynt gydymffurfio â hwy wedi'u rhestru, drwy gyfeirio at y ddeddfwriaeth Gymunedol berthnasol, yn Atodlen 2. Mae samplau masnachol a chynhyrchion sydd wedi'u bwriadu ar gyfer eu harddangos neu eu hastudio neu eu dadansoddi yn esempt rhag y Rheoliadau (rheoliad 3(1)). Mae cynhyrchion sydd wedi'u bwriadu at ddefnydd personol ac sy'n cydymffurfio â'r amodau yn rheoliad 3(3), yn esempt rhag pob un ond ychydig o'r Rheoliadau.

Mae rheoliadau 4 ac 16 yn diffinio'r awdurdodau sy'n gorfodi'r Rheoliadau. Wrth fannau archwilio ar y ffin, awdurdodau iechyd porthladd sy'n penodi milfeddygon swyddogol ac archwilwyr pysgod swyddogol i gynnal gwiriadau milfeddygol wrth bob man archwilio ar y ffin yn eu hardal, fydd y rhain (rheoliad 6). Mae rheoliadau 7, 8 a 9 yn rhoi'r pwerau gorfodi angenrheidiol. Mae'r Comisiynwyr Tollau Tramor a Chartref yn gorfodi rheoliad 16 wrth bwyntiau mynediad eraill.

Mae Rhan 3 yn sefydlu'r system archwilio a fydd yn gymwys i'r mwyafrif o gynhyrchion. Gwaherddir cyflwyno i Gymru gynhyrchion nad ydynt yn cydymffurfio â gofynion Atodlen 2, oni bai eu bod yn cael eu cludo ar draws Gymru (rheoliad 15). Rhaid cyflwyno cynhyrchion wrth fannau archwilio ar y ffin, rhaid hysbysu ymlaen llaw y byddant yn cael eu cyflwyno, a rhaid trefnu iddynt fod ar gael i'w harchwilio, ynghyd â'r dogfennau gofynnol, wrth fan archwilio ar y ffin (rheoliadau 16 i 19). Mae rheoliadau 21 i 28 yn ymdrin â chynhyrchion sy'n cael eu gwrthod yn ystod archwiliad, sy'n cael eu cyflwyno'n anghyfreithlon, neu sy'n peri risg i iechyd anifeiliaid neu iechyd y cyhoedd.

Mae Rhannau 4 i 9 yn gosod darpariaethau arbennig sy'n gymwys i gategorïau cynnyrch penodol (cyflenwadau arlwyo ar y cyfrwng cludo, cynhyrchion sydd wedi'u bwriadu ar gyfer cylchrediad rhydd yn y Gymuned, cynhyrchion sydd ar eu taith ar draws Cymru, cynhyrchion sydd wedi'u bwriadu ar gyfer eu rhoi mewn warws o dan gyfundrefnau tollau penodol, a chynhyrchion sydd wedi'u hallforio o'r Gymuned ac sydd wedi'u dychwelyd wedyn iddi).

Mae Rhan 10 yn ymdrin â chyfrifo a thalu ffioedd am y gwiriadau milfeddygol y darparwyd ar eu cyfer yn y Rheoliadau; mae Rhan 11 yn rhoi pŵer i Gynulliad Cenedlaethol Cymru a'r Asiantaeth Safonau Bwyd wahardd cynhyrchion rhag cael eu cyflwyno i Gymru o wledydd nad ydynt yn wledydd yr Ardal Economaidd Ewropeaidd (AEE) ac sy'n wledydd lle mae clefyd anifeiliaid wedi brigo; mae Rhan 12 yn sefydlu tramgwyddau a chostau; ac mae Rhan 13 yn ymdrin â chyflwyno hysbysiadau a hysbysu o benderfyniadau.

Mae arfarniad rheoliadol mewn perthynas â Rhan 5 (Claddu Cyflenwadau Arlwyo na Ddefnyddiwyd Mohonynt sydd ar y Cyfrwng Cludo ar Safleoedd Tirlenwi) wedi'i baratoi. Gellir cael copïau o Adran yr Amgylchedd, Cynllunio a Chefn Gwlad, Cynulliad Cenedlaethol Cymru, Parc Cathays, Caerdydd CF10 3NQ. Fel arall nid oes arfarniad rheoliadol wedi'i baratoi ar gyfer y Rheoliadau hyn.