Pennod 4 - Terfynu Contractau Diogel (Hysbysiad Deiliad Y Contract)
Adran 163 - Hysbysiad deiliad y contract ac Adran 164 – Y cyfnod hysbysu byrraf a ganiateir
395.Mae’r adrannau hyn yn darparu y caiff deiliad y contract derfynu’r contract meddiannaeth drwy roi o leiaf bedair wythnos o rybudd i’r landlord.
Adran 165 – Adennill meddiant
396.Caiff landlord wneud hawliad i adennill meddiant ar y sail bod deiliad contract, ar ôl rhoi hysbysiad i’r landlord i ddiweddu’r contract o dan y teler o’r contract sy’n ymgorffori adran 163, wedi methu ag ildio meddiant ar y dyddiad a bennwyd yn yr hysbysiad hwnnw.
Adran 166 – Cyfyngiadau ar adran 165
397.Mae’r adran hon yn gosod cyfyngiadau ar arfer pŵer y landlord i geisio meddiant ar y sail a nodir yn adran 165. Rhaid i’r landlord roi hysbysiad adennill meddiant sy’n datgan y sail i ddeiliad y contract. Caiff y landlord wneud hawliad meddiant ar neu ar ôl y diwrnod y rhoddir yr hysbysiad adennill meddiant i ddeiliad y contract, ond ni chaiff wneud hynny’n ddiweddarach na chwe mis ar ôl y diwrnod hwnnw. At hynny, ni ellir rhoi’r hysbysiad adennill meddiant fwy na dau fis ar ôl y dyddiad a bennir yn hysbysiad deiliad y contract fel y dyddiad y byddai meddiant yn cael ei ildio.
Adran 167 - Terfynu contract ar dderbyn hysbysiad deiliad y contract
398.Pan fo deiliad y contract yn ildio meddiant o’r annedd ar neu cyn y dyddiad a bennir yn yr hysbysiad a roddwyd o dan y teler o’r contract sy’n ymgorffori adran 163, bydd y contract yn parhau tan y dyddiad hwnnw. Pan fo deiliad y contract yn ildio meddiant ar ôl y dyddiad a bennir yn yr hysbysiad ac na wneir gorchymyn i adennill meddiant, bydd y contract yn dod i ben ar y dyddiad y mae deiliad y contract yn ildio meddiant. Os gwneir gorchymyn adennill meddiant ar y sail yn adran 165, daw’r contract i ben yn unol ag adran 206 (sy’n nodi effeithiau gorchymyn adennill meddiant).
399.Os yw deiliad y contract, cyn diwedd y cyfnod o rybudd, yn tynnu’r hysbysiad a roddwyd o dan y teler o’r contract sy’n ymgorffori adran 163 yn ôl, ac nad yw’r landlord yn gwrthwynebu hynny mewn ysgrifen, o fewn cyfnod rhesymol, mae’r hysbysiad yn peidio â chael effaith.
