Pennod 5 - Delio: Trosglwyddiadau
Adran 139 – Trosglwyddiad ar farwolaeth unig ddeiliad contract
342.Caiff contract safonol cyfnod penodol gynnwys teler sy’n darparu bod y contract, os bydd deiliad y contract yn marw, yn gallu cael ei drosglwyddo i berson arall, yng nghwrs gweinyddu ystad y deiliad contract ymadawedig. Os yw’r teler hwn wedi ei gynnwys, ni fydd yr hawl i olynu o dan adran 73 yn gymwys (fel bod y contract yn trosglwyddo fel rhan o weinyddu’r ystad, yn hytrach nag o dan y darpariaethau olynu ym Mhennod 8 o Ran 3); ac ni fydd adran 155, sy’n darparu bod y contract yn dod i ben ar farwolaeth unig ddeiliad y contract, wedi ei hymgorffori fel un o delerau’r contract.
Adran 140 – Trosglwyddiadau a orfodir
343.Caiff contract safonol cyfnod penodol gynnwys teler sy’n caniatáu i gyd-ddeiliad contract ei gwneud yn ofynnol fod y cyd-ddeiliad contract arall neu’r cyd-ddeiliaid contract eraill yn ymuno mewn trosglwyddiad o’r contract. Os yw’n gwneud hynny, mae’r adran hon yn darparu y caiff cyd-ddeiliad contract sy’n gosod gofyniad o’r fath wneud cais am orchymyn llys i orfodi’r gofyniad hwnnw.
Adran 141 – Buddiant cyd-ddeiliad contract
344.Pan fo contract safonol cyfnod penodol yn cynnwys teler sy’n caniatáu i gyd-ddeiliad contract drosglwyddo ei hawliau a’i rwymedigaethau o dan y contract i berson arall, rhaid i’r contract hefyd ddarparu, os yw deiliad y contract yn methu â rhoi hysbysiad o’r trosglwyddiad i’r cyd-ddeiliaid contract eraill, na ellir gwneud y trosglwyddiad. Rhaid i’r contract hefyd ddarparu mai dim ond â chydsyniad y cyd-ddeiliaid contract eraill y caiff y person y trosglwyddir yr hawliau a’r rhwymedigaethau iddo feddiannu’r annedd.
Adran 142 – Trosglwyddo ar farwolaeth cyd-ddeiliad contract
345.Mae’r adran hon yn gymwys pan fo contract safonol cyfnod penodol yn cynnwys teler sy’n darparu, ar farwolaeth cyd-ddeiliad contract, y caniateir trosglwyddo ei hawliau a’i rwymedigaethau o dan y contract i berson arall yng nghwrs gweinyddu ei ystad. Fel yn achos adran 141, os yw’r contract yn cynnwys teler o’r fath, rhaid i’r contract hefyd ddarparu, os yw’r cyd-ddeiliad contract yn methu â rhoi hysbysiad i’r cyd-ddeiliaid contract eraill y gwneir trosglwyddiad o’r fath ar ei farwolaeth, ni ellir gwneud y trosglwyddiad. Rhaid i’r contract ddarparu hefyd na chaiff y person y trosglwyddir yr hawliau a’r rhwymedigaethau iddo feddiannu’r annedd oni bai bod y cyd-ddeiliaid contract eraill yn cydsynio i hynny.
