Rhan 10 – Amrywiol
Pennod 1 - Darpariaethau Pellach Yn Ymwneud  Chontractau Meddiannaeth
Adran 233 – Effaith cyrraedd 18
494.Mae adran 7(6) yn darparu na all person o dan 18 oed fod yn ddeiliad contract o dan gontract meddiannaeth, ac mae paragraff 7(2) o Atodlen 2 yn darparu, pan fo’r holl denantiaid neu drwyddedeion sy’n byw mewn annedd o dan 18 oed, nid oes contract meddiannaeth. Mae’r adran hon yn ymwneud â’r hyn sy’n digwydd pan fo naill ai—
person o dan 18 oed sydd yr unig denant neu drwyddedai mewn perthynas ag annedd yn cyrraedd 18 oed, neu
tenantiaeth neu drwydded sydd â mwy nag un tenant neu drwyddedai, a’r holl denantiaid o dan 18 oed, a bod y tenant neu’r trwyddedai hynaf yn cyrraedd 18 oed.
495.Yn y naill neu’r llall o’r amgylchiadau hynny mae angen penderfynu a yw’r denantiaeth neu’r drwydded yn gontract meddiannaeth ac os felly, a yw’n gontract safonol neu ddiogel, a phwy fydd y deiliad neu’r deiliaid contract. Mae’r adran hon yn darparu bod y cwestiynau hynny (a atebir yn unol â gweddill y Ddeddf, a chan roi sylw i’r amgylchiadau arbennig sy’n codi) i’w hateb ar y sail bod y denantiaeth neu’r drwydded wedi ei gwneud ar y diwrnod y daeth y person yn 18 oed.
Adran 234 – Trefniadau ymgynghori ac Adran 235 - Datganiad o drefniadau ymgynghori
496.O dan adran 234, rhaid i landlordiaid cymunedol fod wedi gwneud trefniadau ar gyfer hysbysu deiliaid contractau am ‘gynigion perthnasol ar faterion rheoli tai’, a rhoi cyfle iddynt wneud sylwadau. Mae’r hyn sy’n ffurfio cynnig o’r fath yn cael ei nodi yn isadran (4), ac mae isadran (5) yn golygu nad yw’r gofyniad i ymgynghori yn ymwneud â newidiadau arfaethedig i rent neu gydnabyddiaeth, nac i gyfleusterau na thaliadau am wasanaethau.
497.Yn ogystal â hynny, nid yw’r gofynion hyn yn gymwys pan fo’r gofyniad i ymgynghori o dan baragraff 12(7) o Atodlen 2, sy’n ymwneud â chynlluniau ailddatblygu a’r seiliau rheoli ystad, yn gymwys.
498.O dan adran 235, rhaid i bob landlord cymunedol gyhoeddi datganiad ar y trefniadau a wnaed ganddo i fodloni’r gofynion yn adran 234(1), ynghyd â chrynodeb, a rhaid i’r ddau fod ar gael i’r deiliaid contract ac i aelodau’r cyhoedd, os ydynt yn gofyn amdanynt. Rhaid i landlordiaid cymdeithasol cofrestredig a darparwyr cofrestredig preifat tai cymdeithasol anfon copïau o’r datganiad at Weinidogion Cymru ac at yr awdurdod tai lleol ar gyfer yr ardal y mae’r anheddau o dan sylw wedi eu lleoli ynddi.
Adran 236 – Ffurf hysbysiadau, datganiadau a dogfennau eraill ac Adran 237 – Rhoi hysbysiadau, datganiadau a dogfennau eraill
499.Rhaid i unrhyw hysbysiadau neu ddogfennau eraill a roddir neu a wneir o dan y Ddeddf hon fod mewn ysgrifen, a chaiff Gweinidogion Cymru wneud darpariaeth mewn rheoliadau ynghylch ffurf hysbysiadau a dogfennau. Caiff hysbysiadau a dogfennau fod ar ffurf electronig, ar yr amod eu bod yn cynnwys llofnodion electronig ardystiedig unrhyw bartïon gofynnol (neu asiant a awdurdodwyd gan y parti), ond mae hyn yn ddarostyngedig i’r amodau yn adran 237(4).
500.Pan fo’n ofynnol neu pan awdurdodir, o dan y Ddeddf, roi hysbysiad neu ddogfen i berson, ystyrir bod yr eitem wedi ei rhoi os caiff ei danfon neu ei phostio i’r cyfeiriad neu’r man busnes olaf sy’n hysbys ar gyfer y person hwnnw, neu ei gadael yno, neu mewn unrhyw le arall a bennwyd gan y person hwnnw fel lle y gellir rhoi hysbysiadau neu ddogfennau iddo. Yn achos deiliad contract, mae’r annedd a feddiennir gan ddeiliad y contract hefyd yn gyfeiriad addas.
501.Gellir rhoi hysbysiad neu ddogfen yn electronig yn ogystal, os yw’r derbynnydd wedi cytuno i gael yr eitem yn y ffurf honno, os yw’n ddarllenadwy, ac os gellir defnyddio’r testun a gynhwysir ynddi ar gyfer cyfeirio ato yn ddiweddarach.
Pennod 2 - Tresmaswyr: Tenantiaethau a Thrwyddedau Goblygedig
Adran 238 – Tenantiaethau a thrwyddedau goblygedig
502.Pan fo landlord yn derbyn taliadau gan berson gan wybod ei fod yn dresmaswr , neu pan ddylai fod wedi gwybod fod y person yn dresmaswr, ac nad yw’n cymryd unrhyw gamau i droi’r person hwnnw allan, neu fel arall yn dangos bwriad i drin y person fel tresmaswr o fewn dau fis o dderbyn y taliad cyntaf, caiff contract cyfnodol ei greu rhwng y landlord a’r person. Tenantiaeth neu drwydded yw’r contract hwnnw. Mae hyn yn rhoi hawl i’r tresmaswr feddiannu’r annedd fel cartref iddo o’r diwrnod ar ôl i’r cyfnod hwnnw o ddau fis ddod i ben. Caiff swm y rhent a chyfnodau rhentu’r contract eu pennu ar sail swm ac amlder y taliadau a wnaed gan y tresmaswr, ac unrhyw amgylchiadau perthnasol eraill.
Pennod 3 - Tenantiaethau a Thrwyddedau Sy’N Bodoli Cyn I’R Bennod Hon Ddod I Rym
Adrannau 239 i 241 – Trwyddedau a thenantiaethau sydd eisoes yn bodoli
503.Mae adran 239 yn darparu, ar y diwrnod y daw i rym (‘y diwrnod penodedig’), na all unrhyw denantiaeth na thrwydded fod yn:
contract cyfyngedig;
tenantiaeth fyrddaliol warchodedig;
tenantiaeth ddiogel;
tenantiaethau sicr (o unrhyw fath);
tenantiaeth ragarweiniol; neu
tenantiaeth isradd.
504.Nid yw unrhyw denantiaethau neu drwyddedau presennol yn cael eu terfynu gan yr adran hon. Yn hytrach, mae adran 240 yn gymwys at ddiben penderfynu a fydd y denantiaeth neu’r drwydded yn trosi i fod yn gontract meddiannaeth, ac os felly, pa fath o gontract meddiannaeth. Nid effeithir ar natur a statws tenantiaethau a thrwyddedau sydd eisoes yn bodoli nad ydynt yn trosi’n gontract meddiannaeth.
505.Mae telerau presennol contractau a drosir yn parhau i gael effaith ar yr amod nad ydynt yn gwrthdaro â darpariaethau sylfaenol y Ddeddf a ymgorfforir fel telerau’r contract. I’r gwrthwyneb, mae darpariaethau atodol sy’n gymwys i’r contract meddiannaeth yn cael eu hymgorffori yn y contract oni bai eu bod yn gwrthdaro â thelerau presennol y contract. Os bydd contract wedi ei gytuno rhwng landlord a thenant neu drwyddedai cyn y diwrnod y daw darpariaethau perthnasol y Ddeddf i rym, ond bod y dyddiad meddiannu yn digwydd ar ôl y dyddiad hwnnw, mae’r Ddeddf yn gymwys i’r denantiaeth neu’r drwydded fel pe bai wedi ei gwneud ar y diwrnod y daw’r darpariaethau perthnasol i rym.
Atodlen 12 – Trosi tenantiaethau a thrwyddedau sy’n bodoli cyn cychwyn Pennod 3 o Ran 10
506.Mae Atodlen 12 yn amlinellu darpariaeth bellach ynghylch tenantiaethau a thrwyddedau sy’n trosi’n gontractau meddiannaeth. Mae’n gwneud darpariaeth sy’n gymwys i gontractau o’r fath yn unig, a hefyd yn addasu’r ffordd y mae rhai o ddarpariaethau’r Ddeddf yn gweithredu, o ran y ffordd y maent yn gweithredu mewn perthynas â chontractau o’r fath.
Adran 242 – Dehongli’r Bennod
507.Mae’r adran hon yn diffinio’r termau a ddefnyddir yn y Bennod.
