Rheoliadau Bwydydd Newydd (Awdurdodiadau) a Chyflasynnau Mwg (Addasu Awdurdodiadau) (Cymru) 2022

NODYN ESBONIADOL

(Nid yw’r nodyn hwn yn rhan o’r Rheoliadau)

Mae’r Rheoliadau hyn yn gwneud darpariaeth ynghylch awdurdodiadau cynhyrchion bwyd rheoleiddiedig o ran Cymru. Gwneir Rhan 2 a’r Atodlenni yn unol â Rheoliad (EU) 2015/2283 a ddargedwir ar fwydydd newydd. Gwneir Rhan 3 yn unol â Rheoliad (EC) Rhif 2065/2003 a ddargedwir ar gyflasynnau mwg a ddefnyddir neu y bwriedir iddynt gael eu defnyddio mewn bwydydd neu arnynt.

Mae Rhan 2 a’r Atodlenni yn diweddaru, o ran Cymru, y rhestr o fwydydd newydd awdurdodedig yn Atodiad 1 i Reoliad (EU) 2017/2470 a ddargedwir sy’n sefydlu rhestr yr Undeb o fwydydd newydd—

• mae Atodlen 1 yn diwygio’r cofnod presennol ar gyfer 2’-Ffwcosyl-lactos/Deuffwcosyl-lactos (2’FL/DFL) er mwyn awdurdodi rhoi ar y farchnad y bwyd newydd hwnnw i’w ddefnyddio mewn diodydd wedi eu seilio ar laeth a chynhyrchion tebyg a fwriedir ar gyfer plant ifanc;

• mae Atodlen 2 yn mewnosod cofnod newydd, sy’n awdurdodi rhoi ar y farchnad straen penodol o Olew Schizochytrium sp. (FCC-3204) fel bwyd newydd i’w ddefnyddio mewn atchwanegiadau bwyd, ac ar gyfer fformiwla babanod a fformiwla ddilynol;

• mae Atodlen 3 yn mewnosod cofnod newydd, sy’n awdurdodi rhoi ar y farchnad straen penodol o Olew Schizochytrium sp. (WZU477) fel bwyd newydd i’w ddefnyddio mewn fformiwla babanod a fformiwla ddilynol;

• mae Atodlen 4 yn mewnosod cofnod newydd, sy’n awdurdodi rhoi ar y farchnad halen sodiwm 3’-Sialyl-lactos (3’-SL) (ffynhonnell ficrobaidd) fel bwyd newydd i’w ddefnyddio yn y categorïau o fwyd penodedig;

• mae Atodlen 5 yn mewnosod cofnod newydd, sy’n awdurdodi rhoi ar y farchnad halen sodiwm 6’-Sialyl-lactos (6’-SL) (ffynhonnell ficrobaidd) fel bwyd newydd i’w ddefnyddio yn y categorïau o fwyd penodedig.

Mae Rhan 3 yn cynnwys addasiadau i’r awdurdodiadau ar gyfer pum cynnyrch cynradd sy’n creu cyflas mwg yn yr Atodiad i Reoliad (EU) Rhif 1321/2013 a ddargedwir sy’n sefydlu rhestr yr Undeb o gynhyrchion cynradd a awdurdodir i greu cyflas mwg i’w defnyddio yn y modd hwnnw mewn bwydydd neu arnynt. Mae’r diwygiadau’n newid enwau a chyfeiriadau deiliaid awdurdodiad awdurdodiadau’r priod gynhyrchion.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, ystyriwyd nad oedd yn angenrheidiol cynnal asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn.