Rheoliadau Cyd-bwyllgorau Corfforedig (Swyddogaethau Trafnidiaeth) (Cymru) 2021

NODYN ESBONIADOL

(Nid yw’r nodyn hwn yn rhan o’r Rheoliadau)

Mae Rhan 2 o Ddeddf Trafnidiaeth 2000 (p. 38) (“Deddf 2000”) yn gwneud darpariaeth am drafnidiaeth yng Nghymru. Yn benodol mae’n gwneud darpariaeth am Awdurdodau Trafnidiaeth Lleol yng Nghymru, sydd wedi eu diffinio at bwrpas Rhan 2 fel cynghorau sir neu gynghorau bwrdeistref sirol.

Mae adran 108 o Ddeddf 2000 yn ei gwneud yn ofynnol i Awdurdod Trafnidiaeth Lleol lunio cynllun trafnidiaeth lleol sy’n hyrwyddo trafnidiaeth ddiogel, integredig, effeithlon ac economaidd yn ei ardal.

Mae Rhan 5 o Ddeddf Llywodraeth Leol ac Etholiadau (Cymru) 2021 (dsc 1) yn rhoi pŵer i Weinidogion Cymru i sefydlu cyd-bwyllgorau corfforedig. Mae cyd-bwyllgorau corfforedig yn gyrff corfforedig sy’n cynnwys y cynghorau sir a’r cynghorau bwrdeistref sirol hynny yng Nghymru a bennir yn y Rheoliadau sy’n eu sefydlu. Caniateir iddynt arfer y swyddogaethau a bennir yn y Rheoliadau hynny, gan gynnwys (ymhlith pethau eraill) swyddogaethau penodedig cyngor sir neu gyngor bwrdeistref sirol o ran trafnidiaeth.

Mae’r rheoliadau hyn yn addasu Deddf 2000 mewn achosion pan fo cyd-bwyllgor corfforedig wedi ei sefydlu drwy reoliadau a’r swyddogaeth o ddatblygu polisïau o dan adran 108 o Ddeddf 2000 wedi ei rhoi i’r cyd-bwyllgor corfforedig. Mae’r addasiadau’n ei gwneud yn ofynnol i’r cyd-bwyllgor corfforedig ddatblygu polisïau trafnidiaeth a sefydlu cynllun trafnidiaeth rhanbarthol ar gyfer ei ardal. Fodd bynnag, rôl pob Awdurdod Trafnidiaeth Lleol yn ardal y cyd-bwyllgor corfforedig yw rhoi’r polisïau ar waith.

Mae’r swyddogaethau o dan adran 108 wedi eu rhoi i 4 cyd-bwyllgor corfforedig a sefydlir o dan y Rheoliadau a ganlyn—

(a) Rheoliadau Cyd-bwyllgor Corfforedig y De-ddwyrain 2021 (O.S. 2021/343) (Cy. 97);

(b) Rheoliadau Cyd-bwyllgor Corfforedig y De-orllewin 2021 (O.S. 2021/352) (Cy. 104);

(c) Rheoliadau Cyd-bwyllgor Corfforedig y Canolbarth 2021 (O.S. 2021/342) (Cy. 96);

(d) Rheoliadau Cyd-bwyllgor Corfforedig y Gogledd 2021 (O.S. 2021/339) (Cy. 93).

Mae’r Rheoliadau hyn yn gysylltiedig â Rheoliadau sy’n sefydlu cyd-bwyllgorau corfforedig penodol o dan Ran 5 o Ddeddf Llywodraeth Leol ac Etholiadau (Cymru) 2021. Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau sy’n sefydlu cyd-bwyllgorau corfforedig a rheoliadau cysylltiedig. O ganlyniad, lluniwyd asesiad effaith rheoleiddiol. Gellir cael copi oddi wrth: yr Is-adran Cyllid Strategol Llywodraeth Leol, Llywodraeth Cymru, Parc Cathays, Caerdydd, CF10 3NQ.