Gorchymyn Senedd Cymru (Taliadau Swyddogion Canlyniadau) 2021

Y cyfanswm mwyaf sy’n adenilladwy am dreuliau yr eir iddynt mewn etholiad etholaethol i’r Senedd a ymleddir

6.—( 1) Ni chaiff y cyfanswm y caiff swyddog canlyniadau etholaethol ei adennill am dreuliau yr eir iddynt ar gyfer etholiad etholaethol i’r Senedd a ymleddir, neu mewn cysylltiad ag etholiad o’r fath, fod yn fwy na’r canlynol—

(a) swm cyfanredol colofn 3(a) a (b) yn y tabl yn Atodlen 1;

(b) mewn cysylltiad â threuliau safonol yn unig, y cyfanswm yng ngholofn 3(a) yn y tabl yn Atodlen 1;

(c) mewn cysylltiad â threuliau’r coronafeirws yn unig, y cyfanswm yng ngholofn 3(b) yn y tabl yn Atodlen 1.

(2) Caiff swyddog canlyniadau adennill treuliau safonol yr eir iddynt ar gyfer y canlynol neu mewn cysylltiad â’r canlynol—

(a) penodi a thalu personau i gynorthwyo’r swyddog canlyniadau etholaethol;

(b) treuliau teithio a chynhaliaeth dros nos y swyddog canlyniadau etholaethol ac unrhyw berson a benodir i gynorthwyo’r swyddog canlyniadau etholaethol;

(c) costau’r broses enwebu;

(d) argraffu neu gynhyrchu fel arall y papurau pleidleisio;

(e) argraffu neu gynhyrchu fel arall neu brynu deunyddiau pleidleisio drwy’r post;

(f) argraffu neu gynhyrchu fel arall gardiau pleidleisio, a threfnu i’w dosbarthu;

(g) argraffu neu gynhyrchu fel arall yr holl hysbysiadau a dogfennau etholiad, a’u cyhoeddi;

(h) rhentu, gwresogi, goleuo, glanhau, addasu neu adfer unrhyw adeilad neu ystafell;

(i) darparu a chludo cyfarpar;

(j) darparu cyfarpar a meddalwedd technoleg gwybodaeth a chyfathrebu a chostau cysylltiedig;

(k) darparu diogelwch, gan gynnwys storio blychau pleidleisio, papurau pleidleisio a dogfennau gwirio yn ddiogel;

(l) cynnal y gwirio a’r cyfrif;

(m) darparu a chael hyfforddiant;

(n) darparu deunyddiau ysgrifennu a thalu costau postio, ffonio, argraffu, cyfieithu a bancio a chostau eitemau amrywiol eraill.

(3) Caiff swyddog canlyniadau adennill treuliau yr eir iddynt o ganlyniad i’r angen i gydymffurfio â deddfiad sy’n ymwneud â’r coronafeirws neu i ddilyn canllawiau sy’n ymwneud â’r coronafeirws a ddyroddir gan Weinidogion Cymru, gan gynnwys—

(a) penodi a thalu personau i gynorthwyo i orfodi rheoliadau’r coronafeirws;

(b) argraffu neu gynhyrchu fel arall arwyddion sy’n ymwneud â’r coronafeirws;

(c) cyfarpar diogelu personol ar gyfer personau sy’n cynorthwyo’r swyddog canlyniadau etholaethol a’r gweinyddwyr etholiadol;

(d) cynhyrchion glanhau ychwanegol yn yr orsaf bleidleisio a lleoliadau cyfrif;

(e) costau ychwanegol sy’n gysylltiedig ag angen i estyn y cyfnod dilysu a chyfrif oherwydd mesurau’r coronafeirws;

(f) hyfforddiant ar reoliadau’r coronafeirws.