Rheoliadau Diogelu Iechyd (Cyfyngiadau Coronafeirws) (Rhif 5) (Cymru) (Diwygio) (Rhif 21) 2021

NODYN ESBONIADOL

(Nid ywʼr nodyn hwn yn rhan oʼr Rheoliadau)

Mae Rhan 2A o Ddeddf Iechyd y Cyhoedd (Rheoli Clefydau) 1984 yn galluogi Gweinidogion Cymru, drwy reoliadau, i wneud darpariaeth at ddiben atal, diogelu rhag, rheoli neu ddarparu ymateb iechyd y cyhoedd i fynychder neu ledaeniad haint neu halogiad yng Nghymru.

Mae’r Rheoliadau hyn wedi eu gwneud mewn ymateb i’r bygythiad difrifol ac uniongyrchol i iechyd y cyhoedd a berir gan fynychder a lledaeniad coronafeirws syndrom anadlol acíwt difrifol 2 (SARS-CoV-2) yng Nghymru.

Mae’r Rheoliadau hyn yn diwygio Rheoliadau Diogelu Iechyd (Cyfyngiadau Coronafeirws) (Rhif 5) (Cymru) 2020 (O.S. 2020/1609 (Cy. 335)) (“y prif Reoliadau”) er mwyn—

• darparu, pan fo oedolyn wedi ei hysbysu ei fod wedi dod i gysylltiad agos â pherson sydd wedi cael canlyniad positif am y coronafeirws sy’n amrywiolyn Omicron, neu a all fod yn amrywiolyn Omicron, fod rhaid i’r oedolyn hunanynysu am nad yw’r esemptiadau yn y prif Reoliadau sy’n ymwneud â statws brechu, treialon clinigol a chynlluniau profi yn gymwys mwyach;

• darparu (yn yr un modd), pan fo oedolyn wedi ei hysbysu bod plentyn y mae gan yr oedolyn gyfrifoldeb drosto wedi dod i gysylltiad agos â pherson sydd wedi cael canlyniad positif am y coronafeirws sy’n amrywiolyn Omicron, neu a all fod yn amrywiolyn Omicron, fod rhaid i’r plentyn hunanynysu;

• egluro bod “swyddog olrhain cysylltiadau”, at ddibenion rheoliadau 6 a 7 o’r prif Reoliadau, yn cynnwys Ymddiriedolaeth GIG Iechyd Cyhoeddus Cymru a’r Ysgrifennydd Gwladol fel y cânt hysbysu pobl am ganlyniadau profion positif.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. Yn unol â’r Cod, ni luniwyd asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn, oherwydd bod angen eu rhoi ar waith ar frys i ddelio â bygythiad difrifol ac uniongyrchol i iechyd y cyhoedd.