Rheoliadau Cofrestru Deintyddiaeth Breifat (Cymru) 2017

Rheoliad 4

ATODLEN 3 Gwybodaeth a Dogfennau sydd i Gael eu Cyflenwi ar Gais i Gofrestru fel Rheolwr Practis Deintyddol Preifat

RHAN 1

Gwybodaeth

1.   Enw llawn, dyddiad geni, cyfeiriad presennol, rhif ffôn a chyfeiriad post electronig (os oes un) y ceisydd.

2.   Manylion am gymwysterau proffesiynol neu dechnegol y ceisydd, a’i brofiad o reoli practis deintyddol preifat, i’r graddau y mae’r cymwysterau hynny a’r profiad hwnnw yn berthnasol i ddarparu gwasanaethau i bersonau y mae gwasanaethau i gael eu darparu iddynt yn y practis deintyddol preifat.

3.   Manylion am hyfforddiant proffesiynol y ceisydd sy’n berthnasol i gynnal neu reoli practis deintyddol preifat.

4.   Manylion am hanes cyflogaeth y ceisydd, gan gynnwys enw a chyfeiriad ei gyflogwr presennol ac enw a chyfeiriad unrhyw gyflogwyr blaenorol.

5.   Manylion am unrhyw fusnes y mae’r ceisydd yn ei gynnal neu’n ei reoli neu wedi ei gynnal neu ei reoli.

6.—( 1) Enw a chyfeiriad dau ganolwr—

(a) nad ydynt yn berthnasau i’r ceisydd;

(b) y mae’r ddau ohonynt yn gallu darparu geirda o ran cymhwysedd y ceisydd i reoli practis deintyddol preifat o’r un disgrifiad â’r practis deintyddol preifat; ac

(c) y mae un ohonynt wedi cyflogi’r ceisydd am gyfnod o 3 mis o leiaf.

(2) Ni chaniateir i’r gofyniad am enw a chyfeiriad canolwr sydd wedi cyflogi’r ceisydd am gyfnod o 3 mis o leiaf fod yn gymwys pan fo’n anymarferol cael geirda oddi wrth berson sy’n bodloni’r gofyniad hwnnw.

7.   Enw, cyfeiriad, rhif ffôn, rhif ffacs (os oes un), a chyfeiriad post electronig (os oes un) y practis deintyddol preifat.

8.   Os yw’r ceisydd yn ddeintydd neu’n broffesiynolyn gofal deintyddol—

(a) rhif cofrestru proffesiynol y person cyfrifol; a

(b) manylion unrhyw amodau a osodwyd ar gofrestriad proffesiynol y person cyfrifol neu wrth ei gynnwys ar restr perfformwyr deintyddol.

RHAN 2

Dogfennau

9.   Tystysgrif geni’r ceisydd.

10.   Tystysgrifau neu dystiolaeth addas arall sy’n ymwneud â chymwysterau proffesiynol neu dechnegol y ceisydd, i’r graddau y mae’r cymwysterau hynny yn berthnasol i ddarparu gwasanaethau i bersonau y mae gwasanaethau i gael eu darparu iddynt yn y practis deintyddol preifat.

11.   Datganiad gan y ceisydd ynghylch cyflwr ei iechyd corfforol a meddyliol.

12.   Tystysgrif cofnod troseddol manwl a ddyroddir o dan adran 113B o Ddeddf yr Heddlu 1997 ac, fel y bo’n gymwys, wybodaeth addasrwydd sy’n ymwneud ag oedolion hyglwyf (fel y diffinnir “suitability information relating to vulnerable adults” yn adran 113BB o’r Ddeddf honno) neu wybodaeth addasrwydd sy’n ymwneud â phlant (fel y diffinnir “suitability information relating to children” yn adran 113BA o’r Ddeddf honno) neu’r ddwy, a bod llai na thair blynedd wedi mynd heibio mewn cysylltiad â’r wybodaeth addasrwydd.