Rheoliadau Datblygiadau o Arwyddocâd Cenedlaethol (Meini Prawf Penodedig a Chydsyniadau Eilaidd Rhagnodedig) (Cymru) (Diwygio) 2016

NODYN ESBONIADOL

(Nid yw’r nodyn hwn yn rhan o’r Rheoliadau)

Mae’r Rheoliadau hyn yn diwygio Rheoliadau Datblygiadau o Arwyddocâd Cenedlaethol (Meini Prawf Penodedig a Chydsyniadau Eilaidd Rhagnodedig) (Cymru) 2016 (“y Prif Reoliadau”). Mae’r Prif Reoliadau yn darparu bod adeiladu gorsaf cynhyrchu trydan o ynni’r gwynt ar y tir (fferm wynt ar y tir) sydd â gallu cynhyrchu rhwng 10 a 50 megawat o arwyddocâd cenedlaethol at ddibenion adran 62D o Ddeddf Cynllunio Gwlad a Thref 1990. Maent hefyd yn darparu bod estyn neu addasu fferm wynt ar y tir o arwyddocâd cenedlaethol os mai effaith y gwaith estyn neu addasu bydd cynyddu’r gallu cynhyrchu gan o leiaf 10 megawat ond nid fel bod y gallu cynhyrchu gosodedig yn uwch na 50 megawat.

Mae’r Rheoliadau hyn yn diwygio’r meini prawf o ran bod adeiladu, estyn neu addasu fferm wynt ar y tir yn ddatblygiad o arwyddocâd cenedlaethol.

Nid yw’r diwygiadau a wneir i’r Prif Reoliadau yn cymryd effaith hyd nes bod Gorchymyn Gorsafoedd Cynhyrchu Trydan o Ynni’r Gwynt ar y Tir (Esemptiad) (Cymru a Lloegr) 2016 a Gorchymyn Cynllunio Seilwaith (Gorsafoedd Cynhyrchu Trydan o Ynni’r Gwynt ar y Tir) 2016 wedi dod i rym.

Effaith Gorchymyn Gorsafoedd Cynhyrchu Trydan o Ynni’r Gwynt ar y Tir (Esemptiad) (Cymru a Lloegr) 2016 yw nad oes angen cydsyniad gan yr Ysgrifennydd Gwladol ar gyfer ffermydd gwynt ar y tir yng Nghymru a Lloegr o dan adran 36(4) o Ddeddf Trydan 1989, yn ddarostyngedig i ddarpariaethau arbed.

Effaith Gorchymyn Cynllunio Seilwaith (Gorsafoedd Cynhyrchu Trydan o Ynni’r Gwynt ar y Tir) 2016 yw nad oes angen cydsyniad datblygu mwyach ar gyfer adeiladu, addasu neu estyn ffermydd gwynt ar y tir yng Nghymru a Lloegr o dan Ddeddf Cynllunio 2008 (“Deddf 2008”).

Mae rheoliad 3 yn diwygio rheoliad 4 o’r Prif Reoliadau. Mae’n diwygio’r diffiniad o “gorsaf gynhyrchu” ac yn mewnosod diffiniadau o “gorsaf cynhyrchu trydan o ynni’r gwynt ar y tir” a “y Gorchmynion”.

Mae rheoliad 3 hefyd yn mewnosod rheoliad newydd 4A. Mae’r rheoliad newydd yn nodi’r meini prawf o ran bod adeiladu, estyn neu addasu fferm wynt ar y tir yn ddatblygiad o arwyddocâd cenedlaethol.

Effaith y diwygiadau yn rheoliad 3 yw bod rhaid cyflwyno ceisiadau ar gyfer caniatâd cynllunio i (a) adeiladu ffermydd gwynt ar y tir fydd â gallu cynhyrchu o 10 megawat neu uwch, a (b) estyn neu addasu fferm wynt ar y tir mewn modd sy’n cynyddu ei gallu cynhyrchu disgwyliedig gan 10 megawat neu uwch, yng Nghymru i Weinidogion Cymru.

Gwneir darpariaethau arbed ar gyfer cydsyniadau o dan Ddeddf Trydan 1989, cydsyniadau datblygu o dan Ddeddf 2008 a cheisiadau ar gyfer cydsyniad datblygu o dan Ddeddf 2008 a dderbyniwyd gan yr Ysgrifennydd Gwladol.

Lluniwyd asesiad effaith mewn perthynas â’r Rheoliadau hyn. Gellir cael copïau oddi wrth yr Arolygiaeth Gynllunio, Llywodraeth Cymru, Parc Cathays, Caerdydd, CF10 3NQ.