Rheoliadau’r Gwasanaeth Iechyd Gwladol (Rhestri Cyflawnwyr) (Cymru) (Diwygio) 2016

NODYN ESBONIADOL

(Nid yw’r nodyn hwn yn rhan o’r Rheoliadau)

Mae’r Rheoliadau hyn yn diwygio Rheoliadau’r Gwasanaeth Iechyd Gwladol (Rhestri Cyflawnwyr) (Cymru) 2004 (“y prif Reoliadau”).

Mae rheoliad 2 yn diwygio rheoliad 2 o’r prif Reoliadau i ddarparu diffiniadau pellach yn Rhan 2.

Mae rheoliad 3 yn diwygio rheoliad 4 o’r prif Reoliadau drwy fewnosod gofynion newydd sy’n ymwneud â threfniadau indemniad.

Mae rheoliadau 3 a 5 yn diweddaru cyfeiriadau at Ddeddf yr Heddlu 1997 ac yn gwneud darpariaethau mewn perthynas â gwiriadau’r Gwasanaeth Datgelu a Gwahardd.

Mae rheoliad 3(9) yn estyn cwmpas rheoliad 4(4)(g) o’r prif Reoliadau. Mae rheoliad 4(4)(g) bellach yn dal achosion yn y Deyrnas Unedig ac mewn mannau eraill.

Mae rheoliad 4 yn diwygio rheoliad 4A o’r prif Reoliadau. Mae rheoliad 4 yn diwygio’r wybodaeth y mae’n ofynnol i gyflawnwr sydd eisoes wedi ei restru ar restr cyflawnwyr Corff Gofal Sylfaenol ei darparu. Mae rheoliad 4 hefyd yn gwneud diwygiadau canlyniadol.

Mae rheoliad 6 yn diwygio rheoliad 23A o’r prif Reoliadau ac yn diwygio’r wybodaeth sydd i’w darparu gan ymarferwyr meddygol.

Mae rheoliad 7 yn gwneud mân ddiwygiadau i’r prif Reoliadau ac i’r seiliau dros dynnu enw ymarferydd meddygol yn fandadol gan Fwrdd Iechyd Lleol oddi ar ei restr cyflawnwyr meddygol.

Mae rheoliadau 8 a 9 yn diwygio Rhan 4 o’r prif Reoliadau drwy ddiweddaru cyfeiriadau a diffiniadau.

Mae rheoliad 10 yn diwygio rheoliad 30 o’r prif Reoliadau mewn perthynas â’r wybodaeth benodol y mae rhaid i ddeintyddion ei darparu.

Mae rheoliad 10(4) yn mewnosod rheoliad newydd 30A yn y prif Reoliadau, sy’n gwneud darpariaeth ar gyfer sut y mae ymarferwyr deintyddol sydd eisoes wedi eu rhestru ar restr cyflawnwyr deintyddol yng Nghymru, Lloegr, yr Alban neu Ogledd Iwerddon i wneud cais i gael eu cynnwys mewn rhestr cyflawnwyr deintyddol yng Nghymru ac sy’n pennu pa wybodaeth sydd i fynd gyda chais o’r fath.

Mae rheoliadau 11 a 12 yn gwneud diwygiadau canlyniadol mewn perthynas â hyfforddiant sylfaen deintyddol.

Ystyriwyd Cod Ymarfer Gweinidogion Cymru ar gynnal Asesiadau Effaith Rheoleiddiol mewn perthynas â’r Rheoliadau hyn. O ganlyniad, ystyriwyd nad oedd yn angenrheidiol cynnal asesiad effaith rheoleiddiol o’r costau a’r manteision sy’n debygol o ddeillio o gydymffurfio â’r Rheoliadau hyn.