Rheoliadau Plant (Perfformiadau a Gweithgareddau) (Cymru) 2015

RHAN 1 Cyffredinol

Enwi, cychwyn a chymhwyso

1.—( 1) Enw’r Rheoliadau hyn yw Rheoliadau Plant (Perfformiadau a Gweithgareddau) (Cymru) 2015 a deuant i rym ar 30 Hydref 2015.

(2) Mae’r Rheoliadau hyn yn gymwys mewn perthynas â’r canlynol—

(a) rhoi trwyddedau mewn cysylltiad â phlant sy’n preswylio yng Nghymru gan awdurdodau lleol yng Nghymru i gymryd rhan mewn perfformiadau neu weithgareddau ym Mhrydain Fawr, pan fo’n ofynnol gan adran 37(1) o Ddeddf 1963;

(b) rhoi trwyddedau mewn cysylltiad â phlant nad ydynt yn preswylio ym Mhrydain Fawr gan awdurdodau lleol yng Nghymru i gymryd rhan mewn perfformiadau neu weithgareddau ym Mhrydain Fawr, pan fo’r ceisydd am y drwydded yn preswylio neu pan fo ganddo fan busnes o fewn ardal yr awdurdod lleol hwnnw, pan fo hynny’n ofynnol gan adran 37(1) o Ddeddf 1963;

(c) perfformiadau yng Nghymru, nad yw’n ofynnol cael unrhyw drwydded ar eu cyfer yn rhinwedd adran 37(3)(a) o Ddeddf 1963;

(d) rhoi trwyddedau gan ynadon heddwch yng Nghymru o dan adran 25 o Ddeddf 1933 i alluogi plant i gymryd rhan mewn perfformiadau neu weithgareddau dramor i wneud elw.

Dehongli

2.   Yn y Rheoliadau hyn—

mae i “awdurdod addysg” yr ystyr a roddir i “education authority” gan adran 135(1) o Ddeddf Addysg (Yr Alban) 1980(1);

ystyr “awdurdod lletyol” (“host authority”) yw’r awdurdod lleol neu, yn yr Alban, yr awdurdod addysg y mae perfformiad neu weithgaredd yn digwydd yn ei ardal;

ystyr “awdurdod trwyddedu” (“licensing authority”) yw’r awdurdod lleol y mae’r cais am drwydded wedi ei wneud iddo ac sy’n rhoi’r drwydded;

ystyr “Deddf 1933” (“the 1933 Act”) yw Deddf Plant a Phobl Ifanc 1933;

ystyr “Deddf 1963” (“the 1963 Act”) yw Deddf Plant a Phobl Ifanc 1963;

ystyr “deiliad trwydded” (“licence holder”) yw’r person y mae trwydded wedi ei rhoi iddo gan yr awdurdod trwyddedu;

ystyr “diwrnod” (“day”) yw cyfnod o bedair awr ar hugain gan ddechrau a dod i ben am hanner nos ac, at ddibenion rheoliad 30 a pharagraff 13 o Ran 2 o Atodlen 2, rhaid barnu bod unrhyw berfformiad sy’n digwydd ar ôl hanner nos a chyn yr awr gynharaf a ganiateir fel y’i diffinnir yn rheoliad 23 wedi digwydd cyn hanner nos;

ystyr “gweithgaredd” (“activity”) yw cymryd rhan mewn chwaraeon, neu weithio fel model o dan yr amgylchiadau a bennir yn adran 37(1)(b) o Ddeddf 1963;

mae i “hebryngwr” (“chaperone”) yr ystyr a roddir yn rheoliad 17(1);

ystyr “oedran gadael ysgol” (“school leaving age”) yw’r oedran pan fo person yn peidio â bod yn berson o oedran ysgol gorfodol yn unol ag adran 8(3) o Ddeddf Addysg 1996(2);

ystyr “rhiant” (“parent”) yw person sydd â chyfrifoldeb rhiant, fel y diffinnir “parental responsibility” yn adran 3 o Ddeddf Plant 1989(3), dros y plentyn o dan sylw;

ystyr “wythnos” (“week”) yw cyfnod o saith niwrnod gan ddechrau ar y diwrnod y mae’r perfformiad neu’r gweithgaredd cyntaf y mae’r drwydded wedi ei rhoi ar ei gyfer yn digwydd neu unrhyw seithfed diwrnod wedi hynny; ac

ystyr “ymarfer” (“rehearsal”), ac eithrio at ddibenion paragraff 15 o Ran 2 o Atodlen 2, yw unrhyw ymarfer ar gyfer, neu baratoad ar gyfer, perfformiad, a hwnnw’n ymarfer sy’n digwydd ar ddiwrnod y perfformiad neu yn ystod y cyfnod sy’n dechrau gyda’r perfformiad cyntaf ac yn dod i ben gyda’r perfformiad olaf.

Dirymiadau

3.   Mae’r Rheoliadau a restrir yn Atodlen 1 wedi eu dirymu mewn cysylltiad â Chymru.

(1)

1980 p. 44. Diwygiwyd y diffiniad hwn gan Ddeddf Llywodraeth Leol etc. (Yr Alban) 1994 (p. 39), Atodlen 13, paragraff 118(9).

(2)

1996 p. 56.

(3)

1989 p. 41.