Rheoliadau Iechyd Planhigion (Ffioedd Arolygu Mewnforio) (Cymru) (Diwygio) 2012

Nodyn Esboniadol

(Nid yw'r nodyn hwn yn rhan o'r Rheoliadau.)

Mae'r Rheoliadau hyn yn diwygio Rheoliadau Iechyd Planhigion (Ffioedd Arolygu Mewnforio) (Cymru) 2010 (O.S. 2010/2917 (Cy.242)) (“y prif Reoliadau”).

Mae'r prif Reoliadau yn gweithredu Erthygl 13d o Gyfarwyddeb y Cyngor 2000/29/EC (OJ Rhif L 169, 10.7.2000, t1) (“y Gyfarwyddeb”) sy'n ei gwneud yn ofynnol bod Aelod-wladwriaethau'n codi ffioedd i dalu costau'r gwiriadau dogfennol, gwiriadau adnabod a gwiriadau iechyd planhigion ar fewnforion penodol o blanhigion, cynhyrchion planhigion a gwrthrychau eraill o drydydd gwledydd a nodir yn Atodiad V, Rhan B o'r Gyfarwyddeb.

Mae Atodlen 2 i'r prif Reoliadau yn nodi'r ffioedd cyfradd ostyngol ar gyfer planhigion penodol a chynhyrchion planhigion sy'n ddarostyngedig i arolygiadau llai aml y cytunwyd arnynt o dan y weithdrefn a ddarparwyd ar eu cyfer yn Erthyglau 13d(2) a 18(2) o'r Gyfarwyddeb. Mae'r Rheoliadau hyn yn rhoi Atodlen 2 newydd yn lle'r un bresennol yn y prif Reoliadau i roi effaith i'r cytundeb diweddaraf gan Bwyllgor Sefydlog yr UE ar Iechyd Planhigion mewn perthynas â ffioedd cyfradd ostyngol. Mae'r gyfradd arolygu ar gyfer Malus o Tsieina wedi cynyddu o 25% i 50% gyda chynnydd cyfatebol mewn ffioedd. Nid yw Mangifera o Brasil a Citrus o Honduras yn gymwys bellach i ffioedd cyfradd ostyngol, gan eu bod yn ddarostyngedig i amlder arolygiadau o 100% ac yn unol â hynny mae'r ffioedd yn Atodlen 1 i'r prif Reoliadau wedi eu cymhwyso i'r llwythi hyn. Mae pob cyfradd arolygu arall, a'r ffioedd yn unol â hynny, wedi gostwng.

Rhagwelir y bydd y Rheoliadau hyn yn cael effaith ar y sectorau preifat neu wirfoddol, ond ni pharatowyd asesiad effaith rheoleiddiol, gan eu bod yn gweithredu yn unol â newidiadau blynyddol mewn ffioedd â lefel rhagderfynedig yn hytrach na newidiadau sylfaenol i'r gyfundrefn reoleiddiol ei hun.