Rheoliadau Trwyddedu a Rheoli Tai Amlfeddiannaeth a Thai Eraill (Darpariaethau Amrywiol) (Cymru) 2006

Personau yr ystyrir eu bod yn ffurfio aelwyd unigol at ddibenion adran 254 o'r Ddeddf: cyflogeion

3.—( 1) Pan fo—

(a) person (“person A”) yn meddiannu llety i fyw mewn adeilad neu ran o adeilad; a

(b) mae person arall (“person B”) ac unrhyw aelod o deulu person B sy'n byw gyda person B yn meddiannu llety i fyw yn yr un adeilad neu'r un rhan ohono,

dim ond os mai'r amgylchiadau a ddisgrifir ym mharagraff (2) yw eu hamgylchiadau y mae'r personau hynny i'w hystyried fel petaent yn ffurfio aelwyd unigol.

(2) Yr amgylchiadau yw—

(a) mae person A yn gwneud gwaith neu'n cyflawni gwasanaeth o natur ddomestig yn unig i berson B neu i aelod o'r fath o deulu person B;

(b) mae llety byw person A yn cael ei gyflenwi gan berson B neu aelod o'r fath o deulu person B fel rhan o'r gydnabyddiaeth am wneud y gwaith neu am gyflawni'r gwasanaeth; ac

(c) nid yw person A yn talu unrhyw rent na chydnabyddiaeth arall o ran y llety byw (heblaw gwneud y gwaith neu gyflawni'r gwasanaeth).

(3) Mae gwaith a wneir fel arfer neu wasanaeth a gyflawnir fel arfer gan unrhyw un o'r rhai a ganlyn i gael ei ystyried yn waith neu'n wasanaeth o natur ddomestig at ddibenion paragraff (2)(a)—

(a) au pair;

(b) mamaeth;

(c) nyrs;

(ch) gofalwr;

(d) dysgodres;

(dd) gwas, gan gynnwys morwyn, bwtler, cogydd neu lanhawr;

(e) gyrrwr;

(f) garddwr;

(ff) ysgrifenydd; neu

(g) cynorthwywr personol.

(4) Pan fo person A a person B i gael eu hystyried fel petaent yn ffurfio aelwyd unigol o dan baragraff (1) mae unrhyw aelod o deulu person A sy'n meddiannu'r llety byw gyda pherson A i gael ei ystyried fel petai yn ffurfio aelwyd unigol gyda pherson A, person B ac unrhyw aelod o deulu person B sy'n byw gyda pherson B at ddibenion adran 254 o'r Ddeddf.