Rheoliadau Cynhyrchion Jam a Chynhyrchion Tebyg (Cymru) 2004

Rheoliad 2(1) a (2)

ATODLEN 2 CYNHWYSION YCHWANEGOL A GANIATEIR A THRINIAETHAU AWDURDODEDIG AR GYFER CYNHYRCHION A DDISGRIFIWYD YN EITEMAU 1 I 7 O ATODLEN 1

1.   Caniateir defnyddio'r cynhwysion ychwanegol canlynol, i'r graddau a nodir isod:

(a) mêl fel y'i diffinnir yng Nghyfarwyddeb y Cyngor 2001/110/EC dyddiedig 20 Rhagfyr 2001 ynglŷn â mêl(1): mewn pob cynnyrch fel amnewidyn cyfan neu rannol ar gyfer siwgrau;

(b) sudd ffrwythau: dim ond mewn jam;

(c) sudd ffrwythau sitrws: mewn cynhyrchion a gafwyd o fathau eraill o ffrwythau: dim ond mewn jam, extra jam, jelly a extra jelly;

(ch) suddau ffrwythau coch: dim ond mewn extra jam a weithgynhyrchwyd o egroes, mefus, mafon, gwsberins, cyrains cochion, eirin a rhiwbob;

(d) sudd betys coch: dim ond mewn jam a jelly a weithgynhyrchwyd o fefus, mafon, gwsberins, cyrains cochion ac eirin;

(dd) olewau naws ffrwythau sitrws: dim ond mewn marmalade a jelly marmalade;

(e) olewau a brasterau bwytadwy fel cyfryngau gwrth-ewynnu: mewn pob cynnyrch;

(f) hylif pectin: mewn pob cynnyrch;

(ff) pilion sitrws: mewn jam, extra jam, jelly a extra jelly;

(g) dail Pelargonium odoratissimum: mewn jam, extra jam, jelly a extra jelly, pan fyddant wedi'u gwneud o gwins;

(ng) gwirodydd, gwin a gwin liqueur, cnau, perlysiau, fanila ac echdynion fanila: mewn pob cynnyrch;

(h) fanilin: mewn pob cynnyrch;

(i) unrhyw sylwedd a ganiateir yn unol â Chyfarwyddeb y Cyngor 89/107/EEC ar gyd-ddynesu cyfreithiau Aelod-wladwriaethau ynghylch ychwanegion bwyd yr awdurdodwyd eu defnyddio mewn bwydydd a fwriedir ar gyfer eu bwyta gan bobl(2).

2.   Caniateir i ffrwythau, mwydion ffrwythau, piwrî ffrwythau ac echdynnyn dyfrllyd ffrwythau gael eu trin yn y ffyrdd canlynol:

(a) eu twymo, eu hoeri neu eu rhewi;

(b) eu sychrewi;

(c) eu dwysáu, i'r graddau ei bod yn dechnegol bosibl;

(ch) ac eithrio mewn perthynas â extra jam neu extra jelly, eu sylffito, hynny yw caniateir defnyddio sylffwr deuocsid (E 220) neu ei halwynau (E 221, E 222, E 223, E 224, E 226 ac E 227) yn gyfrwng cymorth i weithgynhyrchu ar yr amod nad yw'r cyfanswm ohono yn uwch na'r uchafswm cynnwys o ran sylffwr deuocsid a bennwyd yng Nghyfarwyddeb 92/2/EC(3).

3.   Caniateir i fricyll ac eirin sydd i'w defnyddio wrth weithgynhyrchu jam gael eu trin â phrosesau sychu eraill ar wahân i sych-rewi.

4.   Yn ychwanegol caniateir i bilion sitrws gael eu preserfio mewn heli.

(1)

OJ Rhif L.010, 12/01/2002, t.47.

(2)

OJ Rhif L.040, 11/02/1989, t.27.

(3)

OJ Rhif L.61, 18.03.95, t.1.