Rheoliadau'r Gwasanaeth Iechyd Gwladol (Gwasanaethau Deintyddol Cyffredinol) a (Ffioedd Deintyddol) (Diwygio) (Cymru) 2003

Nodyn Esboniadol

(Nid yw'r nodyn hwn yn rhan o'r Rheoliadau)

Mae'r Rheoliadau hyn yn diwygio ymhellach Reoliadau'r Gwasanaeth Iechyd Gwladol (Gwasanaethau Deintyddol Cyffredinol) 1992 (OS 1992/661) (“Rheoliadau 1992”) a Rheoliadau'r Gwasanaeth Iechyd Gwladol (Ffioedd Deintyddol) 1989 (OS 1989/394) (“Rheoliadau 1989”).

Mae Rheoliadau 1992 yn rheoleiddio'r telerau y darperir gwasanaethau deintyddol cyffredinol odanynt yn ôl Deddf y Gwasanaeth Iechyd Gwladol 1977. Mae Rheoliadau 1989 yn cynnwys darpariaethau sy'n ymwneud â'r ffioedd a godir am wasanaethau deintyddol cyffredinol.

Mae rheoliad 2 yn diwygio rheoliad 9 o Reoliadau 1992 sy'n pennu'r oedran pan fydd yn rhaid i Awdurdod Iechyd dynnu deintydd oddi ar ei restr ddeintyddol ar y sail bod y deintydd wedi cyrraedd ei 65 oed. Mae'r diwygiad yn codi'r oedran a bennir i 70 oed.

Mae rheoliad 3 yn diwygio Atodlen 2 i Reoliadau 1992, sy'n pennu'r telerau gwasanaeth sy'n gymwys i ddeintyddion drwy roi paragraff 17 newydd yn yr Atodlen honno. Mae'r paragraff newydd yn galluogi ystod ehangach o driniaethau achlysurol i'w darparu o dan y gwasanaethau deintyddol cyffredinol drwy gael gwared â'r gwahaniaeth rhwng y driniaeth sydd ar gael i gleifion sydd heb gofrestri a'r hyn sydd ar gael i'r cleifion achlysuron hynny sydd wedi cofrestri â deintydd mewn man arall. Mae hefyd yn darparu, os bydd deintydd yn llenwi dant neu wreiddyn dant o dan driniaeth achlysurol, fod y deintydd, gyda rhai eithriadau, o dan ddyletswydd i drwsio neu ail-wneud gwaith llenwi o'r fath ar gyfer y claf heb ffi hyd at 12 mis ar ôl ei ddarparu.

Mae rheoliad 4 yn diwygio Rheoliadau 1989 ymhellach i ddarparu nad yw ffi yn cael ei godi ar glaf os yw'r deintydd yn trwsio neu ail-wneud gwaith llenwi yn unol â pharagraff 17(4) o Atodlen 1 i Reoliadau 1992 (trwsio neu ail-wneud gwaith llenwi a wnaed gan ddeintydd fel triniaeth achlysurol). Mae hefyd yn estyn rheoliad 3(2)(f) i ddarparu bod pobl sydd yn iau na 25 oed a'r rhai sydd wedi cyrraedd eu 60 oed yn cael, cyhyd ag y gwneir datganiad o hawl yn y modd a ragnodir, asesiad i'w wneud yn unol â pharagraff 17(2)(a) o Atodlen 1, yn rhad ac am ddim.