Gorchymyn Awdurdodau Lleol (Trefniadau Gweithrediaeth) (Addasu Deddfiadau a Darpariaethau Pellach) (Cymru) 2002

Nodyn Esboniadol

(Nid yw'r nodyn hwn yn rhan o'r Gorchymyn)

Mae'r Gorchymyn hwn yn addasu deddfwriaeth ac yn gwneud darpariaethau eraill er mwyn rhoi eu heffaith lawn i ddarpariaethau yn Rhan II o Ddeddf Llywodraeth Leol 2000 (“Deddf 2000”) (trefniadau mewn perthynas â gweithrediaethau etc.) ac o ganlyniad i hynny. Mae'r Gorchymyn yn gymwys i gynghorau sir a chynghorau bwrdeistref sirol yng Nghymru.

Mae Erthygl 3 yn addasu adran 101 o Ddeddf Llywodraeth Leol 1972 (“Deddf 1972 ”). Mae Erthygl 3(a) yn atal yr awdurdodau lleol rhag gwneud trefniadau i swyddogaethau gael eu cyflawni gan awdurdod lleol arall i'r graddau y mae'r swyddogaeth o dan sylw yn gyfrifoldeb i weithrediaeth yr awdurdod lleol arall hwnnw. Mewn achosion o'r fath, fe allai'r swyddogaeth (i'r graddau hynny) ddod yn gyfrifoldeb i weithrediaeth yr awdurdod lleol hwnnw, ond nid i'r awdurdod lleol ei hun.

Mae'r addasiadau yn erthygl 3 yn darparu hefyd fod y trefniadau i swyddogaethau awdurdod lleol gael eu cyflawni gan naill ai awdurdod lleol arall neu gyd-bwyllgor sy'n bodoli pryd y mae unrhyw un o'r awdurdodau lleol sy'n cymryd rhan ynddo yn dechrau rhoi trefniadau gweithrediaeth ar waith yn dod i ben i'r graddau y daw'r swyddogaeth o dan sylw yn gyfrifoldeb i weithrediaeth unrhyw un o'r awdurdodau hynny.

Mae Erthygl 4 yn addasu adran 102 o Ddeddf 1972 i alluogi'r awdurdodau lleol i benodi pwyllgorau ardal er mwyn cyflawni swyddogaethau a ddirprwyir gan y weithrediaeth. Bydd y diwygiad yn fodd hefyd i'r awdurdodau lleol benodi pwyllgorau ymgynghorol i gynghori gweithrediaeth yr awdurdod lleol ac unrhyw bwyllgor neu aelod unigol o'r weithrediaeth honNo.

Mae Erthygl 5 yn addasu adran 8 o Ddeddf Llywodraeth Leol a Thai 1989 (“Deddf 1989”), gan alluogi rheoliadau a wneir gan yr Ysgrifennydd Gwladol ynghylch rheolau sefydlog yr awdurdodau lleol mewn perthynas â staff gynnwys darpariaeth arbennig mewn perthynas â phenodi cynorthwyydd maer awdurdod lleol.

Os oes gan awdurdod lleol weithrediaeth maer a rheolwr cyngor, mae Erthygl 6 yn addasu adran 13 o Ddeddf 1989 i sicrhau y caiff rheolwr y cyngor, neu unrhyw swyddog arall a benodir yn lle'r person hwnnw, fod yn aelod sy'n pleidleisio o unrhyw gyd-bwyllgor (neu o is-bwyllgor i bwyllgor o'r fath) sy'n arfer swyddogaethau sy'n gyfrifoldeb i'r weithrediaeth ac y mae'r person hwnnw yn aelod ohoNo. Mae'r erthygl hon hefyd yn gwneud diwygiad canlyniadol i Atodlen 1 i Ddeddf 2000.

Mae Erthygl 7 yn cyflwyno gofyniad i awdurdodau lleol sydd wrthi yn gweithredu trefniadau gweithrediaeth o dan Ran II o Ddeddf Llywodraeth Leol 2000, neu a fydd yn eu gweithredu, wneud rheolau sefydlog mewn perthynas â chontractau'r awdurdod lleol ac yn pennu'r darpariaethau sydd i'w cynnwys yn y rheolau sefydlog, gan gynnwys y weithdrefn sydd i'w dilyn wrth i gontractau o'r fath gael eu gwneud.